Thuneihnak latu ralhrang hotu Min Aung Hlaing cun Pathein ih a tlawnnak ah a kuthnuai pawl thusimnak a nei ih, cumi ahcun Myanmar mipi pawl zirhnak an ngai thupi lo ruangah an aa tin a tongsuak.
Min Aung Hlaing cun “Myanmar ram sungih um mipi lakin hrekkhat cu ram thuhla thei an um nan, hrekkhat cu thei lo bembem khal an tam. Ram thuhla theih lo cu fimnak thawn pehparmi khal a si ih, a dik lo zawngin ram thuhla lakawi dingih forhtu khal an tam deuhdeuh.
“Kan ram fimzirnak cu kum tin in kan tlaniam deuhdeuh ih, mifim mithiam kan nei mal deuhdeuh. Zirnak kan ngai thupi lo ruangah kan theihnak le fimnak khal kan nei lo. Tuih dinhmun rampi kan kaihruainak san cu lo theih lo ruangah a si ih, cucu ralkap pawlin nan theihfeng a tul. Mipi cu zirhnak an ngai thupi lo ruangah an aa thluh a si,” tin a tongsuak.
Ralhrang ralkap hotu Min Aung Hlaing cu July 4 ah Patthein tlawng a si ih, Pathein ih thu a simmi pawl cu July 5 ah ralhrang thuthang cahnah Kyimung in an suah.
Tahan Thlanmual Hlunah Ralhrang Pawl An Um – Kalaymyo Tahan veng thlanmual hlun tikhal ih an kawhmi Kawlkulh Covid 19 center ah ralhrang pawl umhmun an khuar ih, ralthuam le eiin hrekkhat an keng lut.
Ralhrang pawl cu July 5 zingah covid 19 Center ah lut an si ih, Kawlkulh le Varpi lamin Tahan ih lut theu Mipi ralkap pawl kham an tum siko ding tin an sim.
Tahan ih um pakhat cun “Ralhrang pawl ziangtik tiang an um ding timi cu kan thei lo. Asinan, mawtawpi in thil tamzet an phur ih ralthuam le eiin a siko ding. Hivek cu Kawlkulh le Varpi lamin mipi ralkap pawl Tahan ih lut thei nawn lo dingin kham an tum siko ding. Mipi ralkap lam ziangtin an cangvai ve ding tithu cu kan thei lo. Asinan, doawknak cu a suak cing ko ding,” tin a sim.
Yangon Ah Ling A Hnin – July 5, zinglam nazi 7:39 hrawngah yangon Hlaing myone ihsin peng 1 hrawng hla ah ling a hnin thok ih, Yangon sungin myone 4 pawlin linghnin an thei.
Magnitude 3.0 hrawngih linghnin a sinan, khawpi sungih linghnin a si tikah a hmunih um pawl hrang ttih tham a tling. Tho hrih lo pawl an harh thluh ih, veng hrekkhat cu thinphang in lengih suak man khal an um.
Linghnin cu Hlaing myone, Mayankung, Insein, le Seik- kyi khanuang pawlin an thei. Asinan, veng khat le veng khat linghnin an theih dan cu a bang aw lo. Hlaing myone kiangkap ih um pawlin linghnin naa zetin an thei.
Hlaing myone ih um pakhat cun “Magnitude 3.0 fang hrawng lawngin tuanvo neitu lam cun thu an suah nan, kannih a tuartu lam cun cu hnakin naa in kan thei. Linghnin a rei lo ih, rei sehla inn siat phah khal a um thei ding. Kan umnak hmun cun a hnin curco rori a si,” tin a sim.
AA Ralkap 6 An Thi – Ralhrang ralkap in Rakhine ralkap AA sakhan pakhat vanzam pahnih in bomb an thlakmi ah AA ralkap 6 an thi ti’n AA cun July 5 zingah thu an suah.
Ralhrang ralkap cun Thailand le Myanmar ramri ih um AA sakhan pakhat cu July 4, sun nazi 12:25 hrawngah vanzam pahnih in bomb an va thlak ciamco ih, AA lam ziangthei lo cu tlan man lo tampi an um. Tlan man lo AA lamin mi 6 an thi ih, hriamhma ngah khal tampi an um bet.
AA sakhan sungin sikha,sizung le umnak hrekkhat khal an siat thluh ih, ralhrang raldonak vanzam pahnih cu Thailand ramri lamin an umnak hmun lamah an kirsal timi cu AA lam thusuak a si.
AA lam cun doawknak zianghman a um lo nan, ralhrang lamin tum nei in bomb in rak thlakmi a si tin thu an suah zo ih, AA le ralhrang karlak boruak a se deuhdeuh.
Tuih ralhrang bomb thlakmi AA sakhan pakhat cu karen ramkulh Myanmar le Thailand ramri KNU hmunram 5-nak sungih um an si. Ralhrang in AA sakhan bomb an thlak tikah AA lam an cangvai ve asile Myanmar rampi buainak a luar sinsin dingin a langih, dothlengnak ralkap pawl cun AA khal a takin cangvai dingin an rak sawm ve.
Ralhrang in AA sakhan pakhat bomb an thlakmi thuhla ah a san theih a si hrih lo nan, thuhla tampi a um. AA in PDF pawl raldo an zirh ruangah sipei maw? AA in Rakhine ramkulh sungih ralhrang pawl an kaih rero ruagnah sipei maw? AA in Paletwa peng sungih ralhrang hmun an rak kah zo ruangah sipei maw? timi cu mipi thusuhhak a si ih, hrekkhat cun KNU le ralhrang buainak ah ralhrang cun anmah hro rerotu AA sakhan khal tumhrim in an kap siko ding titu khal an um ve.
Tutiang cu ralhrang lamin AA sakhan bomb an thlakmi thuhla thawn pehparaw in thusuahmi zianghman an nei hrih lo. 2014 kum khalah ralhrang ralkap cun Kachin ramkulh Laiza ih KIA raldo zirnak hmun bomb an rak thlak zo ih, cumi tumah TNLA ralkap 11, AA ralkap 8, CNA ralkap 2 le ABSDF ralkap 2 pawl an rak thi.
Lamzin Ih Sumpai Dil Ralhrang An Kap – Karen ramkulh Kawh-kareih le Myawaddy lamzin karlak ih mipi sumpai diltu ralhrang ralkap pawl cu july 5, zinglam nazi 6 hrawngah Kawh-kareih PDF pawlin hlaral kahnak Sniper in an kap ih, ralhrang 3 an thi tin mipi an simthei.
PDF aiawh cun “Zinglam nazi 6 hrawngin nazi 8:30 tiang hrawng kan kap aw. Lamzin feh pawl cu ralhrang ralkap pawlin Gate man tin sumpai an dil ringring. Cumi ruangah kap kan si. A hmun ralhrang ralkap 3 an thi rori a si,” ti’n a sim.
Karen ramkulh Kawh-kareih le Myawaddy lamzin tluan cu KNU le PDF pawlin ralhrang ralkap donak hmun pakhat a si ih, June 30 khalah mipi ralkap lamin kawh-karaih le Myawaddy lamzin tlunah ralhrang an rak kap zo ih, cumi tum ahcun ralhrang 5 an thi tin mipi an rak theihter zo.
Mipi Ralkap Hrang Diamond Zunghruk A Pe – Sagaing ramthen Kalay peng NLD hlutdaw palai hlun pakhat Daw Thant Wai Kyaw cun amai bulpak neihmi diamond zunghruk cu mipi ralkap hrang a zuar ih, a man zaten mipi ralkap hnenah a pe ding.
Daw Thant Wai Kyaw cu ralhrang in rampi thuneihnak an lak hnuah theitawk in ralhrang uknak rak dotu a si ve ih, inn khalah um ngam loin Kalay ih a innpi a suahsannak khal a rei zo. Ralhrang uknak dotu a si tlunah ralhrang huat tukmi NLD palai a si ruangah ralhrang cun Kalay ih a inn khal an kharsak zo.
Tu ah Diamond zunghruk cu ting 15 kyats in zuar thok a si ih, Australia ih Myanmar mi pakhat cun ting 20 in a ngam thu a sim zo. Midang pakhat leh cun a ngamsang bik ka zuam ding tin a rak bawh cia ve.
Daw Thant Wai Kyaw cun “Ka zunghruk cu Mogok lungmankhung le sui tleu mawi hmangih tuahmi a si ih, ka duhdan rori’n ka tuahtermi a si. Himi zunghruk man ih sumpai ka ngahmi zaten ka duhnak mipi ralkap umnak hmun le raltlan pawl umnak hmunah ka pe ding. A leitu hnenah a thleng rori ding a si,” tin a sim.
Russia In Ukraine Khawpi An La Bet – Ukraine lamin thusuah felfai an nei zo ih, Lysychansk khawpi cu Russia kutah a um zo tin mipi an theihter.
Asinan, Ukraine president Zelensky cun ramdang bomnak ralthuam thatha thawn Lysychansk khawpi laksal an tum tin mipi a simthei ih, khawpi a suahnak san cu Ukraine ralkap tampi humhimnak hrang a si tin a rel.
Lysychansk khawpi cu Luhansk ramthen sungih um khawpi pakhat a si ih, Luhansk ramthen sung cu Russia ralkap pawl in an ciah-neh deuhdeuh. Tu ahcun Russia ralkap pawl cu Donbas ramthen sungin Donetsk lamah hmunram lak bet vivo an tum ih, Donetsk le Luskhansk cu zalennak an pek zomi, a takin zalenter an tummi a si.
Ukraine President Zelensky cun “Tu ah kan ralkap pawlin Lysychansk khawpi an suahsan fel zo nan, ralthuam thasawn le ralkap thazang caksawn in kan do kirsal leh ding. Tuih dung kan sipnak san cu thazang kan la hrih men a si ih, ramdang bawmnak ralthuam thatha kan don tikah kan ralkap thazang tharte thawn kan dosal ding.
“Kan ralkap pawl ih nunak humhim ding cu kan hna thupibik a si bangin , dinhmun le ralthuam ih a zir lo tikah nunnak hrang dungsip duak a tul theu. Tu ahcun a tharin timtuahnak kan neisal dingih, caksawn in kan ralkap pawl an krisal leh ding a si,” tin a sim.
Leave a Reply