Min Aung Hlaing In Mipi Thirleng Mawn A Fial – Ralhrang ralkap hotu Min AUng Hlaing cun datsi le meisa tha ren thiam dingin mipi pawl thirleng mawn a fial.
Min Aung Hlaing cun “Datsi siseh Diesel khal ramleng ihsin lakluh ringring a si ih, sumpai hman a tamter phah. Curuangah Cet thilri hrangih hmanmi datsi le Diesel pawl theitawk ih kan ren a tul. A cangthei asile rampi duhdawtnak langter in datsi le Diesel hman tum lomi thirleng mawng cio dingah ka lo sawm duh.
“Cuti siloin meisa tha le datsi lawnglawng kan hmang asile kan daih aw nawn lo ih, ren cetcoten kan hman a tul. Cumi ding ahcun datsi, meisa tha tul lo, diesel khal tul lo thirleng mawng men ding kan si,” tin Min Aung HLaing cun December 14 ah mipi theihternak a nei.
Min Aung Hlaing cun rampi thuneihnak a lak hnuah Naypidaw siseh Myanmar khawpi dang khalah meisa tha bus kan tlanter dingih,tlangleng cangkang khal kan tlanter ding. Leihnuai tlangleng khal kum 2 sungah kan tlanter ding tin a rak sim. Asinan, a tongmi thlaziat hman a kim hlanah Min Aung Hlaing cun meisa tha bus le tlangleng tlanter lamlam cu hram khal a thok thei lo ih,mipi cu thirleng mawng dingin a fialsawn riangri.
Ralhrang In UN Sual An Puh – UN in UN Myanmar palai hrang ralhrang dilmi hnongi U Kyaw Moe Tun sawn UN Myanmar palai ih an ret hrih ruangah ralhrang lungawi lo cun UN sual an puh.
UN cun December 12 ah UN Myanmar palai thuhla thawn pehparaw in palai hrilfelnak an nei ih, mithar hril loin mihlun U Kyaw Moe Tun sawn UN Myanmar palai ah an ret bet. Ralhrang cun UN ah palai sinak co ve dingin dilnak an rak thehlut ve nan, UN cun ralhrang ih dilnak an rak hnonsak. UN in Myanmar UN palai hrang U Kyaw Moe Tun an hril betmi cu December 16 ah Offial an phuang dingin U Kyaw Moe Tun cun a sim.
Ralhrang ralkap cun “U Kyaw Moe Tun hi kannih Myanmar ih palai a silo ih, NUG le CRPH pawl thawn tuantlang an si. Cuvek thei cingin UN cun Myanmar palai ah U Kyaw Moe Tun an hril betmi cu UN dankalh ralthuamkai pawlkom an dinpi,misual an tuanpi tinak a si,” tin ralhrang cun UN sual an puh.
Myanmar Politics thlirtu Sai Kyi Zin Soe cun “UN cun hril ciamco ding an nei hrih lo. Ziangahtile, Myanmar ram a buai tuk tikah UN palai hlun kha a kel bangin an ring hrih men. Cutikah ralhrang pawl lungawi lo ciamco an si,” tin a sim.
Ralhrang ralkap in rampi thuneihnak an lak hnuah UN Myanmar palai U Kyaw Moe Tun cun ralhrang ai a awh thei lo thu a sim ih, mipi lam a rak tang cih. Cumi ruangah ralhrang cun U Kyaw Moe Tun cu Myanmar palai a sinak in kan ban tin thu an rak suah. Cumi hnuin tuisun nitiang ralhrang cun UN ah palai co an tum rero nan, an hlawhsam ringring hrih.
World Cup Final Ah France – 2022 FIFA World Cup Semi final neta sawn cu December 15 zingah lek a si ih, France in 2-0 ih Morocco an neh hnuah 2022 FIFA World Cup final ah France an lut.
Caan hrek hmaisa sawn an thok hnu minute 5 lawng an lek tilaiah France hrang Hernandez cun a sit goal. Morocco lamin Mbappe an kil tuknak ah mahlawng rak um Hernandez in mawi zetin a sit goal. Morocco lamin sit goal tumin theitawk an suah ciamco nan, France khawl hmaiah an buai ringring ih,goal danglut bet loin cawlh an hmang.
Caan hrek neta sawn an thokih,Morocco cun nasaten France lam an nor. Asinan,khawlhmai ah Morocco lam duh vekin tih an nung lo. Morocco in an nor tuk luanah France cun minute 79 ah goal hnihnak an thun. Morocco lamin nasaten an nawr sal nan, goal dang lut bet nawn loin caan a cem.
Hitin France cun World Cup kum 2 peh in final an lut thei ih, World Cup kum 2 peh champion thei an si thlang. 2018 FIFA World Cup ah France an rak champion zo. 2022 FIFA World Cup final ahcun Argentina le France an do aw ding.
Argentina lamah leitlun bawhlung sitthiam hminthang Leonal Messi a um ih, France lam khalah thangthar mithiam Mbappe a um ve. 2022 FIFA World Cup final hi December 18 Myanmar caan zan nazi 9:30 ah lek ding an si.
France le Argentina hi 2018 FIFA World Cup sungsuak dinhmun ah an rak tongaw zo ih, France cun 4-3 in Argentina an rak neh. Cumi hnu tuitum ah do aw sal ding an si.
Leave a Reply