Ralhrang ralkap hotu Min Aung Hlaing cun ram buainak ruangah Myanmar ram suahsantu siseh ram buai hlanih rak suak cia pawl khal Myanmar ram ah tlungsal thluh thlang dingin a sawm hai. Min Aung Hlaing cun 2021 ah veikhat ramleng ih umpawl tlung dingin a rak sawm zo ih,tuitum ah a sawm pehsal.
Min Aung Hlaing ih thusuak an thlahmi cu hitin a si, “Thuhla phunphun ruangah Myanmar ram suahsantu nan zaten ratlungsal dingin kan lo sawm. Hivek in nan tlannak san cu dankalh pawlkom CRPH, NUG le PDF pawl ruangah a si. Nan tlannak hmunah na harsa, nan him lo, nan buai ti kan thei ih, tlung thluhsal dingin kan lo sawm.
“Dankalh pawlkom pawlin tlawnginn an nawkkang, mipi inn an nawkkang, cozah zung an nawkkang, mipi himnak an cokbuai tikah tlan phah nan si ih,cuvek pawl lakin nan him theinak dingah theitawk kan suah dingih ,ratlung thlang uh. Hahdam ten ratlung pawl cu hahdam ten kan rak cohlang ve men. Mino pawl lula zetin um caan a silo, ratlung uhla rampi dintha sal uhsi,” tin ramleng suak le raltlan pawl sawmnak an nei.
Ralhrang ralkap cun 2021,February 1 ah ralthuam rinsan in rampi thuneihnak an la ih, an thuneihnak duhlotu mipi pawl cun ralhrang uknak cu daiziar lamzawhnak in an dokalh. Cutikah ,ralhrang pawlin lamzawhnak nei mipi pawl cu ralthuam hmangin an thekdarh ih, mipi lam khalin ralthuam an kaih ve phah.
Cutin, Myanmar ram sungah doawknak phunphun a um ih, mipi ting 9 hrawng cu inn ah um ngam loin an tlan thlang. Ram buainak ruangih tlan pawl cu Min Aung Hlaing in tlungsal thlang dingin a sawm nan, hmun tamsawn cu tlunsal ngam ci siloin a buai rero lai a si.
Leave a Reply