Ralhrang hotu Min Aung Hlaing in remdaihnak hrang tlangpar ralthuamkai hotu pawl ka tong duh a timi cu may 20 in a thok thlang ding tin ralhrang lam cun thu an suah fel zo.
Min Aung Hlaing in remdaihnak hrang thurel dingin tlangpar ralthuamkai hotu pawl a sawm hnuah Ralhrang hotu Min Aung Hlaing tong dingin hminpe ralthuamkai pawlkom 10 an um ih, cumi pawl cu Min Aung Hlaing in a rualin ton a tum lo. Pawlkom pakhat teten a tong ding tin ralhrang cun thu an suah. Ralhrang hotu Min Aung Hlaing kan tong ding titu tlangpar ralthuamkai le pawlkom 10 an um ih,cumi lakin pawlkom 3 lawngin Min Aung Hlaing tongtu dingah an hotu bik an thlah ding. Culo pawlkom dang pawl cun hotu sang sawn an thlah ding thu an sim zo.
Ralhrang ralkap hotu Min Aung Hlaing kan tong ding tin hminpe tlangpar ralthuamkai pawlkom 10 lakah pawlkom 7 pawl cu ralhrang thawn kapaw lo dingin NCA hminkhen ngan an si ih, pawlkom 3 cu NCA hminkhen nganlo an si. Min Aung Hlaing tong dingin hminpe NCA hminkhen ngan tlangpar ralthuamkai pawlkom 7 pawl cu KNLA PC, PNLO, ALP, RCSS, DKBA, NMSP le LDU pawl an si. NCA hminkhen ngan lo tlangpar ralthuamkai le pawlkom lakin Min Aung Hlaing tong dingih hminpe pawlkom 3 pawl cu UWSA ,NDAA le SSPP pawl an si.
Ralhrang thuphuangtu Zaw Min Tun cun “May 20 in remnak hrang thurel kan thok taktak dingih hmaisabik ah Shan ralthuamkai RCSS thawn thu kan rel ding. Pawlkom pakhat tetein thu kan relpi dingih, ni 3 dan in thurelpi kan tum. Tonawknak ah hotu Min Aung Hlaing rori’n in tlangpar ralthuamkai pawl ih duhdan a sut dingih a relpi hai ding. Cumi hnuah kannih duhdan khal kan sim ve dingih, tui dinhmun tuah theihmi ,hmailam ih kekar dan ding le tuanthlang thei dan ding pawl kan reltlang ding a si,” tin a sim.
Tlawngta hotu pakhat cun “Remdaihnak hrang thurelkhawm dingin Min Aung Hlaing cun tlangpar ralthuamkai hotu pawl a sawm ih, a rak aupi. A tong dan vek asile hminpetu zaten a rualin thu a relpi dingah kan ruat. Asinan, tu ahcun pawlkom zaten veikhat ah thu a relpi lo dingih, pawlkom pakhat teten thu a relpi ding. Hivek cu remdaihnak hrang thurel a si thei lo. Hivek thurel cu mipi hrang hlawknak a um thei lo ding. Min Aung Hlaing in tlangpar ralthuamkai pawl pakhat hnu pakhat thupten a lemnak le thupten remnak a tuahpi tumnak men a si,” tin a sim.
Myanmar Politics thiam pakhat cun “Tufang ah ralhrang pawlih buaipi bikmi le ngaihsak bikmi cu tlangpar ralthuamkai pawl an si. Ramdang khal an buaipi ciamco duh lo ih, tlangpar ralthuamkai rori an buaipi. Anmah ralhrang ih ruah dan ahcun tlangpar ralthuamkai pawl remnak kan tuahpi thei asile Myanmar ram buainak a dai ko ding tin an ruat. CRPH, NUG le PDF pawl cu biak khal an tum lo ih, ziangah siar lo vekin an um. An buaipi bikmi cu tlangpar ralthuamkai pawl rori an si,” tin a sim ve.
An sim bangin PDF pawl raldo zirnak cu tlangpar ralthuamkai pawlkom hnenin a si ih, ralthuam an ngah theinak khal tlangpar ralthuamkai hnenin a si vivo thlang. Tlangpar ralthuamkai le PDF pawl tangtlang ding cu ralhrang lamin an ruat ngam lo ih, cumi ruangah tlangpar ralthuamkai pawl an leem rero in a lang.
Leave a Reply