Min Aung Hlaing In Thupi A Tibikmi A Sim

Ralrhang ralkap hotu Min Aung Hlaing cun June 9 zan ah a kuthnuai Yangon ralhrang cozah hruaitu pawl komnak a nei ih, cumi ahcun a tufang ih thupi a tibikmi simtheihnak a nei.

Ralhrang ralkap hotu Min Aung Hlaing cun thuneihnak a duh tuk ruangah 2021, February 1 ah rampi thuneihnak a rak la ih, thuneihnak a lak hnuah amah cu lalbik ah a ret aw. Thuneihnak a lak ruangah Myanmar ram a buai ih,a tlase rero nan, ralhrang hotu Min Aung Hlaing cun a kuthnuai pawl cu sipuazi ah nasaten zuam dingin a cah hai.

Min Aung Hlaing cun “Ram pakhat tungding dingin ramthu buaipitu, sipuazi buaipitu le humhimnak buaipitu tin thil pathum a um. Buainak a um lo cun ram a thangso dingih, humhimnak lam kan buaipi that cun kan ralkap thazang a cak sinsin ding. Ram thangso dingin le ralkap thazang cak dingin thupibik cu sipuazi a si. Curuangah, sum tuahnak ah hmailam pan dingin kan zuam a tul.

“Sipuazi tuah tikah ziangmi a tul, mipi in ziangkim kan thlasam, ziang kan tuah ah kan hlawk tivek a thupi ih, tlaksiat caan um theu hman sehla thasuah in lamzin dap vivo ding kan si,” tin a kuthnuai pawl a simthei hai.

Min Aung Hlaing Umlai Ah Bomb An Puah – Ralhrang ralkap hotu Min Aung Hlaing cu a tufang Yangon ah caan hmangin a um ih, Hmawbik ih ralhrang zirhnak hmun khal a hal phah. Ralhrang hotu Min Aung Hlaing Yangon a thlen rualin Yangon PDF pakhat Toxic Boys cun bomb puah in an rak hmuak.

Toxic Boys cun “Yangon ih thleng ralhrang hotu Min Aung Hlaing hmuahnak ah kannih cun June 10, zinglam nazi 9 hrawngah Mingaladung myone ih Htauk Kyan palik sakhan bomb kan puah. Kannih lam cu thi um loin himdamten dung kan sip thei ih, ralhrang thizat le hriam ngahzat khal kan fiah thei hrih lo a si,” tin mipi an theihter.

Ralhrang ralkap hotu Min Aung Hlaing cun Yangon a umsung ah Ngio-hna-pin pawlkomawknak a zoh phah ih, Hmawpi ih ralhrang zirhnak hmun khal a feh. Ralhrang hotu Min Aung Hlaig cu June 9, zanlam ah Yangon thleng a si ih, Yangon le Dala karlak lilawn tuahpi khal a hal. Yangon ih Min Aung Hlaing a um hrih ruangah hmun tinkim ah ralhrang an khat ih, khoh zetin Min Aung Hlaing an kil.