Min Aung Hlaing In Tlangpar Ralthuamkai Pawl Ralkap Ih Lut Dingin A Sawm

Min Aung Hlaing In Tlangpar Ralthuamkai Pawl Ralkap Ih Lut Dingin A Sawm – Ralhrang ralkap hotu Min Aung Hlaing cun tlangpar ralthuamkai pawl lakin ralthuamkai peh vivo duh an um asile kanmai thuhnuai ramri kil ralkap lole kanmah Myanmar ralkap ah an lut thei ding tin August 22 ih ralhrang vuanci meeting ah simnak a nei.

Ralhrang ralkap hotu Min Aung Hlaing cun “Tu khalah tlangpar ralthuamkai hrekkhat thawn kan tongaw rero zo ih, remnak phunphun ka neih zo bangin hminkhen khal kan ngan zikte thlang. Rel ding neuhneuh kan nei lai ih, neta hlutdaw meeting ah remdaihnak hrang tonawkkhawmnak khal kan tuah ding.

“Remdaihnak hrang thurelnak ahcun tlangpar miphun pawl ih covo le thansohnak khal zalen zetin kan rel thei ding. Remnak kan rak tuahmi le daan kan neih bangin tuah theihmi tampi a um ko. Tlangpar ralthuamkai pawlin ralthuam kaih vivo an duh asile ramri kil ralkap lole Myanmar ralkap ah an lut thei ding. Asinan, mipi tuar ding zawngin an cangvai asile daan vekin an thu kan relsak ding.

“Tu ah Sagaing ramthen sungah le hmundang ah tlangpar ralthuamkai lakin PDF bawm an um ih, ramri lanin in do. Himi ih langfiang zet cu tlangpar ralthuamkai hrekkhat in an ramri lan tiangin doawk an duh tinak siko. Curuangah ramri lanih in dotu pawl cu an theihnak thawn kekar thiam dingah kan theihter duh a si,” tin a sim.