Matupi Ah Phone Line A Siat – Chin ramkulh Matupi peng sungah June 15 in phone line a tha nawn lo zo ih, July 1 zing ahcun phone hrimhrim hman a theih nawn lo tin matupi peng sungih um pawl cun an sim.
June 30 ahcun hmun hrekkhat ah phone be thei phahphah an um nan, July 1 ahcun zokhalin phone an be thei nawn lo tin an sim. Matupi peng sungah MPT, Telenor le Ooredoo company pawl an um ih, an zaten hman a theih nawn lo thluh. Ziangruangah phone line pawl a siat thluh timi cu zohman in a san an thei lo.
Chin ramkulh Paleta ahcun ni 5 sung meisa an ngah nawn lo tin Paletwa peng sungih umpawl cun an sim. Paletwa ahcun June 26 in meisa an nei nawn lo zo ih, June 30 tiang meisa a ra hrih lo tin an sim.
A hlan ahcun Paletwa khawpi ah ni 2 dan in meisa an rak pe theu ih, a hrekhrek in covo an rak pe. Asinan, tu ahcun ni 5 sung rori zokhal meisa ngah nawn loin an um. Meisa a um lo tikah sumpai nei pawl cun solar an hmangih, solar nei lo pawl cun hlan bangin meiin le phazawngdai an hmang.
Pyu Saw Htee Hotu An That – Sagang ramthen Sagaing myone Pauk-ka khua ih ralhrang lamtang Pyu Saw Htee hotu cu June 29 , zanlam nazi 3 hrawngah PDF pawlin an kai ih, an that lawlaw men tin thu an suah.
Sagaing PDF hotu cun “Lo ah cet a mawng timi kan thei ih, kan va kai. Hmunhim ah kan hruai ih, thuhla thaten kan sut. Amah khalin Pyu Saw Htee sungtel a si thu le hotu lam a si thu a phuangaw. A kuthnuai ah Pyu Saw Htee 130 hrawng an um tin a relsuak. Pyu Saw Htee pawlih thuthup le umnak kan suh tikah a rel duh lo. A pa le unau khal Pyu Saw Htee sungtel le hotu an si ve ih, ralhrang lakah an um.
“Thu kan suh tikah a kutah meithal pahnih a nei ih, Pistol a kolmi cu a u in a la tin a rel. Shan ramkulh lamah ralhrang pawl raldo an bawm timi khal a pom nan, a hmun a rel duh lo. Ralhrang pawl lamzin an hruai theu ih, khua hrekkhat an luhcilh thu khal a rel. Thusuhmi hrekkhat a let duh lo tikah kan that lawlaw men a si,” tin mipi a simthei.
PDF pawl ih thahmi Puah-ka khua Pyu Saw Htee hotu Nyi Nyi ( kum 35 ) cu Pyu Saw Htee raldo zirnak ah thla 6 sung raldo zirin thehsuak a si ih, Kan dung thla khalah a kuthnuai 130 pawl thawn Shan ramkulh sungah raldo in an feh.
June 27 ah Sagaing ramthen Minmu myone Kanphia khua ah Pyu Saw htee hotu Aung Khai , a nupi le khawlal pawl cu Minmu PDF pawlin an rak kai zo ih, thuhla an suh tikah Pyu Saw Htee cazin le Pyu Saw Htee pawlih cangvaihnak hminsin a neihmi pawl an phuang aw thluh.
Cumi ahcun tuitum ih an thahmi Puah-ka khua Pyu Saw Htee hotu Nyi Nyi ih hmin le a tuahmi hminsin pawl khal a rak um thluh. Cumi ihsin Nyi Nyi ih thuhla theih a si ih, Sagaing PDF pawlin an thianfai cih.
Hitin, Taihne pawlkom cun Pyu Saw Htee 5 an thianfai zo ih, thianfai vivo an tum tikah Pyu Saw Htee raldo zirnak in thehsuak zo hrekkhat pawl cun Pyu Saw Htee an bansan thu an sim ih, himnak an duhsawn thu an simthei hai tin Taihne cun thu an suah.
Phekung Ah Ralhrang 7 An Thi – Shan ramkulh le Kaya ramri Phekung myone Lwe Maku khua ih umhmun khuar ralhrang ralkap pawl cu Central Sniper le Fighter pawlkom in an do ih, ralhrang 7 an thi tin thu an suah.
June 23 ah Phekung myone Lwe Maku tlangpar ih umhmun khuar ralhrang ralkap pawl cu Sniper pawlkom in an kap ih,ralhrang 2 an thi. June 29 ah Phekung myone Lwe He khua ih umhmun khuar ralhrang ralkap pawl cu Sniper le Fighter pawlkom in an kap ih ralhrang 5 an thi tin Sniper le Fihgter pawlkom cun thu an suah.
Nikhat hmaisa sawn cu hlaral in ralhlrang pawl umnak Sniper in an kap ih, ralhrang 2 an rak thi. Ni neta sawn cu Sniper tlunah bomb puah in naivai deuh in an kap ih, ralhrang 5 an thi tin an thusuah ahcun an tarlang.
Ralhrang 20 An Thi Ih, Ralhrang 11 An Kai – Sagaing ramthen Bamauk ah KIA le PDF tangtlang cun ralhrang ralkap an do peh ih, June 30 an doawknak ah ralhrang 20 tlun an thi tin NUG cun thu an suah.
Kachin ramri Sagaing ramthen Bamuak myone ahcun KIA, Bamauk PDF, Katha PDF le Indaw PDF pawl tangtlang in a nitel in ralhrang ralkap pawl an do rero zo. June 30 ih an doawknak ah ralhrang 20 tlun an thi ih, ralhrang tampi kan ngai ngah. kaihmi ralhrang pawl cu leitlun ralkap daan vekin PDF pawlin thaten an tuamhlawm tin NUG cun thu an suah.
NUG cun “June 30 ah katha District Bamauk myone hmun pakhat ah ralhrang ralkap le mipi ralkap komkhawm pawl an do aw. Doawknak ah ralhrang 20 tlun an thi ih, hriamhma ngah ralhrang ralkap kaihmi pawl cu PDF pawlin sivai thawn thaten an tuamhlawm hai a si,” tin thu an suah.
NUG in KIA le PDF tangtlang pawlih ralrhang kaih ngahmi a zat cekci an tarlang tel lo nan, Bamauk dothlengnak media cun KIA le PDF pawl tangtlang in ralhrang 20 tlun an thah tlunah ralhrang 11 nungdam in an kai ngah tin an sim.
Min Aung Hlaing Le ASEAn Palai An Tongaw – A tufang Myanmar ih tlawng ASEAN palai Prak Sokhonn cun June 30 ni ah ralhrang hotu Min Aung Hlaing a tongih, thureltlangnak an nei tin ralhrang cun thu an suah.
ASEAn palai le ralhrang hotu Min Aung Haing tonawknak ahcun ASEAn le ralhrang pawlih remnak tuahmi 5, Myanmar ramsung buainak, tlangpar ralthuamkai thawn biakawknak thuhla le Myanmar mipi harsa pawl bom dan ding tivek pawl an rel tin ralhrang cun thu an suah.
Ralhrang lam cun ASEAN thawn remnak kan neihmi 5 pitlin dingin hmailam kan pan rero an ti nan, a takah hmuh ding a um lo ih, remnak an tuahmi 5 sungin pakhat hman tuahmi an nei hrih lo.
ASEAN palai khal PDF, NUG, CRPH le dothlengnak pawlkom pawl tonter an tum lo ih, Daw Aung San Suh Kyi tla cu thubuai nei lai a si ruangah zohman in an tong thei lo hrimhrim tin ralhrang lam cun thu an suah.
Ywangan PDF An Bang – Shan ramkulh thlanglam Danu mahte ukawknak hmun sung Ywangan khua hrambun PDF pawl cu harratnak a phunphun ruangah an pawlkom an cawlh thu June 30 zan ah mipi theihternak an nei.
Ywangan PDF cun “June 30 ihsin thokin kannih Ywangan PDF kan um nawn lo, kan bang thluh zo timi kan lo theihter duh. Harsatnak phunphun ruangah kan ding peh thei nawn lo ih, tu vekin kan bannak san a si,” tin thu an suah.
Ywangan PDF cu 2021, December 15 ah uknak tha lo ralhrang ralkap do dingin pawlkom an rak din ih, amahten siseh an tuanpi pawl thawn khalin ralhrang ralkap an do rero zo. Asinan, ralthuam le sumpai harsatnak ruangah an pawlkom balsal a si thu mipi an theihter.
Ywangan PDF hotu cun “Kan harsatnak pawl cu umnak ding kan nei nawn lo ih, ei ding khal kan nei nawn lo. Umnak ding kan neih lo tlunah ei ding kan nei lo vivo ih, cumi ruangah bang dingin kan lungkim ih, kan bangfel a si,” tin a sim.
Ywangan PDF cun June 9 ah harsatnak phunphun an nei ih Ywangan hmunram an suahsan thu mipi an rak theihter zo. Cumi ahcun caksawn le raltha sawn in kan rak kirsal ding tin mipi an tiam. Asinan, hramthok sal dingin sumpai an neih lo tikah June 30 ahcun Ywangan PDF an ban fel thu mipi an theihter.
April 9 ah ralhrang ralkap pawl cun Ywangan PDF umnak hmun an rak luhcilh ih, PDF pawl sakhan an rak siatsak thluh. Khaumi 6 khal PDF nan si tin an kai ih, an that. Thahmi lakah PDF khal an tel. Cumi hnu ihsin bawmtu an neih nawn lo ruangah dingsuak thei nawn lo an si in a lang.
Philippine In President Thar An Nei Fel – Philippine rampi hrilawknak ih nehnak cotu Ferdinand Marcos Jr cu June 30 ah Philippines President hrang thutiamternak neihter a si ih, Philippines president thar ah an nemhnget fel zo.
Kum 64 mi Marcos Jr cun Philippines ram hrilawknak ah olsam ten nehnak a co. A pa Marcos khal Philippines ralkap le President rak tuan zo a si ih, apa cu 1986 kum ah mipi lungrual in lungkim loin president a sinak a rak cawlter. Cumi hnu 2022 ah a pafa Marcos Jr in Philippines president a tuan ve ding.
Philippines president thar Marcos Jr cun an ram mipi zaten thlun thei ding zawngin rampi a kaihruai ding thu a sim ih, an ram thatsohnak dingah lungrual zetin hnatuan tlang uhsi tin mipi pawl a sawm. Ritheihsi tham le zuar pawl kap that hluhlo dingih thupetu Philippines president hlun Durterte cu a caan a kim fel zo ruangah president sinak cuh thei nawn lo a si.
Leave a Reply