Min Aung Hlaing le China Palai An Tongaw

Min Aung HLaing Le China Palai An Tongaw – Ralhrang ralkap hotu Min Aung Hlaing le China Asia palai Deng Xijun tei pahnih cu March 6 ah Nipidaw khawpi ah an tongaw.

China Asia palai cun kan dung December 29 khalah Naypidaw ah Min Aung HLaing a rak tong zo.

March 6 ih ram pahnih palai an tonawk thu ah ralhrang cun ramri thuhla, ramsung buainak thuhla, ram pahnih tuantlang dan ding, ramsung dinhmun pawl an reltlang ti’n thu an suah. China Asia palai cun China ramri ih tlangpar ralthuamkai pawl khal a rak tongzo ih, thurelpinak a nei hai.

Myanmar Politics thlirtu U Hla Tun cun “China hi Myanmar thawn pehparawknak tamzet nei an si. Ralhrang lawng an pehtlaih lo ih ,ramri ih tlangpar ralthuamkai pawl khal China thawn pehtlaih aw lo an um lo. Ramri a si tikah ralthuam thuhla ah siseh sipuazi thuhla khalah pehtlaih aw a si.

“China cun an hlawknak ding hlir an ruat ih thildang zianghman an ruat lo. Cutikah ralhrang khal an tuanpi ih tlangpar ralthuamkai khal an tuanpi. A tuanpitu pawl hrang khalah China fehsan hi sunnak nasa tuk a si ve. Curuangah khatlam khatlam in tuanpi aw an si,” ti’n a sim.

US Le S.Korea Thungrul Tum N.Korea – US le S.Korea cun March 8 in 13 tiang ram pahnih raldo zirtlangnak neih an tum. Cucu, N.Korea lamin an duh lo tukih ralrinnak an pe rero zo.

Tu ahcun N.Korea lam an tongsuak hrih ih, S.Korea le N.Korea in raldo zirtlangnak an nei thotho asile kan thungrul ding ti’n thu an suah.

N.Korea cun “Korea ram pahnih hrang a that lo ruangah US le S.Korea cu raldo zirtlangnak nei lo dingin kan sim rero zo. Tu ah ralrinnak kan pe rero cingin cangvaih an tum thotho pei maw tikhal kan thlir ringring. Ralrinnak kan pe cingin ram pahnih raldo zirtlangnak an nei thotho asile buai an duh tin kan ruat dingih kan thungrul cih ding a si,” tin N.Korea lam cun an sim.

N.Korea in S.Korea le US ram pahnih ziangtin thungrul an tum timi cu an phuangtel lo ih an cangvaih tum dan an sim hrih lo. Korea ram pahnih hi 2022 lamin an karlak boruak buainak a sosang ciamco sal ih ram pahnih ralthuam lamah nasaten an zuam aw.