Ralhrang Hotu Le Russia Ralbawi An Tongaw – Thuhla a darh bangin Russia ralkap bawi le anmah dungthlun pawl cu Myanmar an thleng fel zo ih, ralhrang hotu Min Aung Hlaing thawn Naypidaw ah tongaw in thurel tlangnak an nei.
Ralhrang ralkap cun “Russia ralbawi Alexey Rostislavovich hohami pawl thawn kan tongaw. Cumi ahcun kannih Myanmar lamin kan hotu Min Aung HLaing , Ye Win, Moe Min Htun le ralbawi dang pawl an tel. Tonawknak ih kan relmi cu dankalh cangvaihnak kham bet dan , ramsung remnak tuah dan ding le leitlun ah remdaihnak um thei dan pawl kan rel. Remnak lam kan rel hnu ahcun sizuazi, fimzirnak , harhdamnak, thialthil zirnak le tuantlag dan ding thuhla pawl kan rel bet a si,” tin ralhrang cun thu an suah.
Ralhrang in rampi thuneihnak an lak hnuah ralhrang hotu Min Aung Hlaing cun vei 8 hnakin mal lo Russia a rak tlawng zo ih, Russia ralbawi pawl khal Myanmar ah an tlawng rero ve zo. Ralhrang in Russia tuahmi raldonak vanzam SU-30 khal an rak lei zo ih, SU-30 mawn dan khal anmah Russia ralkap pawlin Myanmar ram sungah ralhrang pawl an rak zirh. Cutlukin Russia ralkap le ralhrang pawl an tuantlang.
CNA le NUG In Paletwa An Duh – Paletwa CDF hrang sumpai hawlnak ah NUG palai Dr.Sasa le CNA hotu sangtu Dr.Lian Hmung Sakhong cun Paletwa hmunram an duh thu tuk an rel ih, Paletwa hmunram kan lak thei ahcun ramleng thawn olsam zetin kan pehtlaih aw thei ding tin an sim.
Chin ramkulh Paletwa peng hi Rakhine ralthuamkai AA in 2009 lamin an rak luhcilh zo ih, Paletwa peng sungin hmun hrekkhat tluk cu AA pawlin an ciahneh. Paletwa khawpi le a kiang naivai lam lawng ralhrang pawlin an umcilh hrih ih, khuate lam le Rakhine ramri pawl cu AA lamin an hmunram an la ve.
Ralhrang in rampi thuneihnak an lak hnuah CDF Paletwa an rak ding ve nan, sumpai le ralthuam an neih lo tuk ruangah duh vekin an cangvai thei lo ih,hmunram ti ih rel ding an nei tam lo. Paletwa peng sung hi ralhrang le AA in a hrek veve an uk deuh in a lang. Hivek dinhmun ah NUG le CNA cun thinlung takin Paletwa an buaipi ih, ramleng dawrnak ah a tha tuk ding tin an sim.
NUG palai Dr.Sasa cun “Paletwa hmunram kan lak thei ahcun olsam zetin ramdang kan dawr thei dingih paletwa ah duhtawk in ralthuam le thilri kan phur lut thei ding. Cutikah dothlengnak hrang tampi a tangkai ding a si,” tin a sim.
CNA hotu sangtu Dr.Lian Hmun Sakhong khalin “Paletwa hi ramleng thawn hnatuan tlangnak ah hmunram thatuk a si ih, Paletwa hmunram kan lak thei ahcun hamthatnak tampi kan ngah ding,” tin a sim ve.
CNA le NUG tuantlang in Paletwa hmunram lak tum bangta sehla ralhrang lawng siloin AA khal an do a tul dingin a lang. Paletwa peng sungih AA an um ruangah CNA cun vei tampi AA hnenah Paletwa hmunram suahsan dingin an rak sim rero nan, ram buai hlanpi ihsin AA cun Paletwa hmunram an suahsan duh lo. Tu ah AA le ralhrang cu kap aw lo dingin remnak an tuah ih,thildang khalah remnak tuah vivo dingin an be aw rero.
Ramleng le ramdang dawrnak hrangih hmun thatuk an timi Paletwa peng hi zoi kutah a um ding, ziangtin an cuh aw ding timi cu tulai Chin mipi le Myanmar mipi thinlung luah zettu pakhat a si ve.
Hakha Ah Ralhrang 55 An Thi – Chin ramkulh Hakha le Thantlang karlak Timit hmunram sungih Novemthla sung doawknak ah ralhrang 55 an thi tin Chin ralkap CNA cun thu an suah.
CNA cun “Kannih CNA le kan tuanpi pawlin November thla sung Timit hmunram ih ralhrang kan donak thuhla pawl cu a hnuailam bangin mipi kan lo theihter duh. Kannih CNA le kan tuanpi pawl cun November thla sungah Thantlang le Hakha karlak timit hmunram ah nasaten ralhrang kan do ih, ralhrang 55 kan thianfai thei tlunah ralhrang hriamhma ngah an tam ih ,ralthuam laksakmi khal kan nei.
“Doawknak ih ralhrang thi an tam ruangah ralhrang cun raldonak vanzam pahnih le raldonak Helicopter pathum thawn in kap. Hakha ih ralhrang hmunpi khalin ralthuampi thawn in kap ciamco. Doawknak ralhrang pawlih meithal zun 9 kan laksak thei. Thla khat sung doawknak ahcun CNA ralkap pakhat cun ram le miphun hrang a nunnak a hlan a si,” tin CNA cun thu an suah.
CNA ralkap pakhat cun “November 24 ih kan doawknak lawng hmanah ralhrang ruang 4 kan sar ih, ralhrang thi an phummi 9 kan hmu. Ralhrang thi lak ahcun ralhrang bawi khal an tel ding. November thla sungah ralhrang thawn kan doaw tam ngaingai a si,” tin a sim.
CNDF In Ralhrang 37 An Thianfai – Chin miphun humhimtu CNDF cun September thla le November thla sungih ralhrang an donak thuhla cu November 30 zan ah mipi theihternak an nei.
CNDF cun “September thla in November thla sung tiang kannih CNDF cun Chin ramkulh Falam peng le Sagaing ramthen kalaymyo ralhrang ralkap vei 12 kan do. November 15 in 23 tiang ralhrang cun tlunzuang raldonak thawn nasaten in kap. Doawknak ah ralhrang 37 an thi ih, kannih lamin hriamhma ngah 5 an um. Ralhrang pawlih kahsuakmi ruangah Tibual khua in inn 3 a kang. Ralhrang pawl cun Bualte khua ih rualban lo pakhat an that ih, thinlung kim lo nunau pakhat khal an kai.
“September 25 ah Tuphei ih ralhang pakhat kan kap that. November 15 in PDF Zoland CDM Siyin, CJDC le MEDF pawl thawn Tibual sakhan kan kap thok. A thoknak ni ah ralhrang 8 an thi ih, kannih lamin hriamhma ngah pahnih an um. November 16 khalahTibual ih ralhrang pawl kan kap betih ralhrang 5 an thi. November 16 ahcun Kalay peng khalah CDF KKG thawn ralhrang kan kap ih, ralhrang pakhat a thi.
“November 17 ah Tibual ih ralhrang kan kap betih ralhrang 6 an thi ih, kannih lam hriamhma ngah pakhat a um. November 18 khalah Tibual ih ralhrang kan kap ih, ralhrang 4 an thi. November 19 khalah Tibual ih ralhrang kan kap ih ralhrang 6 an thi. November 20 khalah Tibual ih ralhrang kan kap ih ralhrang 2 an thi. November 21 le 22 khalah Tibual ih ralhrang kan kap bet. November 23 ah Tibual ih ralhrang pakhat kan kap that. November 26 ah Kalay peng Zayagyo ih ralhrang umhmun cu kan tuanpi pawl thawn kan kap ih ralhrang 3 an thi,” tin CNDF cun thu an suah.
Ralhrang Ruang Phur Bomb An Puah – Tanintharyi ramthen Tayet chuang myone ih ralhrang bawi thi cu ralhrang pawlin mawtaw 2 in a ruang an phur ih, lamlak ah PDF pawlin an rak kap.
Tayet Chuang PDF cun “Sun nazi 1:20 hrangah a si ih, ralhrang bawi cu Win Hty Naing tin an ko. Ralhrang thi ruang cu mawtaw pahnih in an phur ih ralhrang tamzetin an thlun. Cucu, kannih PDF komkhawm in lamlak ah bomb kan rak puah ih kan kap.
“Minute 10 sung hrawng ralhrang pawl thawn kan kap aw ih, cumi ahcun ralhrang 4 an thi. Tuitum ah kanmah lawng siloin kan tuanpi pawlkom 3 thawn ralhrang pawl rak do kan si,” tin thu an suah.
KIA In Ralhrang Puhnak An El – Ralhrang ralkap cun 2022 kum sungah kIA le PDF pawl cun Kachin, Chin, Sagaing le Makui pawl ah mipi inn 500 tlun an urkang tin thu an suah. Ralhrang in KIA le PDF sual an puh thu ah KIA cun ralhrang pawl an let cih.
KIA thuphuangtu Nawbu cun “Ralhrang ralkap sawn hi doawknak ih thi an tam tikah mipi inn nawkkang ringringtu an si. Kannih PDF le KIA cun ziangtik hmanah mipi inn kan nawkkang lo ding. Sun ruangah mipi inn nawkkang tivek kan hmang lo.
“A tufang kannih KIA hmunram sung ahcun Phakan, Bamaw le Moemauk pawlah ralhrang thawn kan kap aw. Phakan hi milian pawl umnak a si ruangah ralhrang pawlin nasaten in nor ih, phakan hmunram lak an tum. Ralhrang cun tlunzuang raldonak tiang hmangin kan hmunram in do nan, ralhrang remnak tuahpi tumnak kan nei lo a si,” tin a sim.
Ralhrang ralkap cun ramsung doawknak ih inn an urkangmi pawl cu PDF pawl urkangmi tin thu an suah ringring ih, ramleng ah PDF pawl thangsiatter an tum. Cucu PDF le tlangpar ralthuamkai pawlin an duh lo tikah ralhrang pawl cangvaihnak an pholang rero ve.
Argentina Sungsuak An Lut – 2022 FIFA World Cup C pawl khal December 1 zingah an puai netabik an lek ih Argentina cun 2-0 in Poland an neh thei ruangah sungsuak an lut. Khatlam puai ah Mexco in 2-1 in Saudi Arabia an neh ih Poland thawn hmat 4 veve an nei nan,goal dinhmun ih Poland a thatsawn ruangah Poland khal Argetina dungthlun in sungsuak an lut ve.
Aregentina hrang Minute 39 ah Captain Messi in penalty a sit goal lo nan, minute 46 ah Allister in Argentina hrang a sit goal ih, minute 67-nak ah Argentina hrang Alvarez in a sit goal bet. Cutin caan a cem ih group hmaihruaitu dinhmun in Argentina cun sungsuak an lut.
Group D in France le Australia In Sungsuak An Lut – 2022 FIFA World Cup group D pawl khal November 30 zan ah an lek theh ih, team 4 lakin hmat hmu tam team hnih France le Australia in sungsuak an lut.
Group D puai netabik ah Tunisia cun 1-0 in France an neh nan, France hi hmat 6 nei cia an si ruangah a hlankhan in sungsuak rak lut thei zo an si. Tunisia cun France an neh thei nan, hmat 4 lawng an nei ih, sungsuak an lut ban lo. Australia in 1-0 in Denmark a neh ih, hmat 6 thawn sungsuak an lut ve.
Tuizan December 1 Myanmar caan nazi 9:30 ah Group F pawl an lek dingih Cabada vs Morocco, Croatia vs Belgium tin an do aw ding. Tui dinhmun ah Cratia hmat 4, Morocco hmat 4, Belgium h mat 3 le Canada hmat nei lo tin an um lo ih result ih zir in Croatia, Morocco le Belgiuam lakin Team 2 in sungsuak an lut ding. Canada cu nehnak an co khalle an tla fel zo. Sungsuak ah Argentina vs Australia an do aw dingih, France le Poland an do aw ding.
Leave a Reply