Min Aung Hlaing Thu Dinpinak An Nei

Ralhrang ralkap hotu Min Aung Hlaing in remdaihnak hrang tlangpar ralthuamkai hotu pawl ton ka duh a timi cu a dik rori a si,remdaihnak hrang thurel a tul tin Min Aung Hlaing tongmi lungkim pawl cu Min Aung Hlaing dinpinak nei in an pungkhawm.

Naypidaw khawpi ahcun May 16 ah Min Aung Hlaing thurelmi dinpinak an nei ih, Yangon ahcun May 17 ah Min Aung Hlaing tongmi dinpinak an nei. Yangon ih an tuahmi Min Aung Hlaing dinpinak cu ralhrang ralkap lamin an kil thepthep ih, lamzawhnak an neih hnuah Yangon myodaw khanmah ah an pungkhawm.

Min Aung Hlaing tongmi dipitu pawl cu a tamsawn USDP party sungtel le tantu pawl an si. Anmah USDP party khalin Min Aung Hlaing ih tongmi an tawmpi thu ca in an rak suah zo. Cumi ahcun remnak um dingah biakawk a tul ih, ralthuam in doawknak ah remawknak a um lo tin an rak tarlang.

Ralhrang hotu Min Aung Hlaing cun May 28 ah tlangpar ralthuamkai hotu zaten ton a duh thu a simthei hai ih, May 9 tiang amah tong duhtu pawl hminpe dingin a theihter. Tu ah May 19 kan thleng zo ih, Min Aung Hlaing tong dingin hminpe khal an fiang thluh zo.

Tlangpar ralthuamkai lakin pawlkom 10 cun Min Aung Hlaing kan tong ding, thu kan relpi ding an ti ih, beisei an nei. Asinan, tlangpar ralthuamkai picang KIA,KNU, ABSDF, KNPP le CNA pawl cun ralhrang hotu Min Aung Hlaing kan tong lo ding tin thu felfai an suah thluh zo. Tlangpar ralthuamkai unau 3 ti ih theihmi AA, TNLA le MNDAA pawl cun ralhrang sawmnak an let lo hrimhrim.

Ralhrang ralkap cun remnak hrang thurel dingin tonkhawmawknak ah tlangpar ralthuamkai hotu pawl lawng an sawm ih, NUG, CRPH le PDF pawl an sawm lo. Hivek ruangah, tlangpar ralthuamkai tampi khal an tel lo phah.