Min Aung Hlaing Tongtu Ding Pawlkom 10

Ralhrang ralkap hotu Min Aung Hlaing cun April 28 ah tlangpar ralthuamkai hotu pawl hmaiton ih biak a duh thu a rak simthei hai ih, May 9 tiang amah tong duhtu pawl hminpe dingin a theihter.

Tu ahcun hmaiton ih Min Aung Hlaing tongtu ding pawlkom 10 an um fel zo ih, pawlkom 3 cun boruak kan thlir hrih ding tin an sim. Boruak thlir hrih ding pawlkom 3 pawl cu AA, MNDAA le TNLA pawl an si.

Hmaiton in Min Aung Hlaing tongtu ding pawlkom 10 pawl cu ALP, DKBA, KNLA PC, LDU, NMSP, PNLO, RCSS , NDAA, SSPP le UWSP pawl an si. An lakah ALP, DKBA, KNLA PC, LDU, NMSP, PNLO le RCSS pawl cu ralhrang thawn kap aw lo dingin NCA hminkhen rak ngan an si.

NCA hminkhen ngan cingin Min Aung Hlaing tong lo dingih thu felfai suah zotu pawl cu ABSDF, KNU le CNF pawl an si. NCA hminkhen ngan lo hrimhrim tlangpar ralthuamkai lakin KIA le KNPP khalin Min Aung Hlaing an ton lo ding thu felfai zetin mipi an rak simthei zo.

Ralhrang hotu Min Aung Hlaing cun amah tong dingin NUG, CRPH le PDF pawl cu a sawm lo hrimhrim ih, Min Aung Hlaing tongtu ding pawlkom 10 lakah dothlengnak pawlkom an tel lo. Min Aung Hlaing tong dingin hminpe pawlkom 10 pawl cu tuitum dothlengnak khalah ralhrang ralkap do lo pawl an si.

Tuitum dothlengnak ih nasa ten ralhrang dotu KNU, KIA, KNPP , ABSDF le CNF pawl cun Min Aung Hlaing an ton lo ding thu mipi an simthei zo. Hivek a si tikah pawlkom 10 le Min Aung Hlaing men cun ziang remnak hman an tuah thei cuang lo dingih, tonawknak mumal lo ah a suak thotho ding tin Myanmar Politics thiam pawl cun an sim.