Min Aung Hlaing In President Inn A Remtha

Pastor Nupi le Kawhhran Upa 2 An Kai – Yangon ramṭhen, Shwe PyiTha myone ah ralhrang ralkap pawl cun Cornerstone Baptist Church (CBC) Pastor Rev.Uk Ling Thang ih nupi le kawhhran upa 2 an kai tin kawhhran cun thu an suah.

August 9, zinglam nazi 10 hrawngah Shwe Pyi Tha, Bayitnaung lamzin ih um CBC biakinn cu ralkap/palik 7 an lutcilh ih kawhhran upa 2 le Pastor ih nupi Nu zing an kai.

Ralhrang ralkap lam cun nanmah Chinmi hnen ihsin CBC biakinn ah ramdangmi a um ih, ramdang tangka a phur ti`n heknak kan dong. Curuangah thusuh ding a um tin Pastor nupi le kawhhran upa 2 an hruai.

“Tuizing ah CBC biakinn ah hla le lam zir dingin sayama pakhat sawmmi cu a um. Asinan, ramdang tangka an phur tivek cu thudik lo a si” tin member pakhat cun a sim.

Ralhrang pawl ih kaihmi Pastor nupi Nu Zing cu kan dung July thla ah nau nei a si ih a sungkhat naivai pawl in an seherh tuk. Inntekpa Rev. Uk Ling Thang cu US ram ah Bible tlawngkai in a um. CBC kawhhran cun “kan ṭahnak Aw in ngai sak hram aw, Pathian” ti`n kaimi hrang Pathian hnenah dilnak an nei.

Myanmar Raltlan Hrang Dollar Ting 4 Man Thilri A Thleng – Project Mizoram pawlih tawlrelmi Mizoram ih Myanmar raltlan le BN Hospital Research Centre hrang sizung thilri dollar ting 4 man cu August 9 ah Aizawl a thleng tluangih, mawtaw dang a thleng bet ding tin tuanvo neitu pawl cun an sim.

Sizung thilri pawl cu American ih thleng Myanmar mipawl ih thawhkhawmmi a si ih, Project Mizoram tin an tangtlang. Sizung thilri thleng pawl cu August 10 ah tuanvo neitu pawlin zemnak an nei ding.

Tuanvo neitu pakhat cun “Pathian lamhruainak thawngin Mizoram ih um kan unau raltlan pawl hrang sizung thilri tampi a thleng. US ihsin tawlreltu pahnih Rev.Thang Moi le Philip khal Mizoram ah an um ve. Tuitum ah mawtawpi pakhat thilri a thengih, mawtawpi pakhat dang a thleng bet lai ding. Thilri pawl cu Myanmar raltlan pawl pek ding an si,” tin a sim.

Min Aung Hlaing In President Inn A Remtha – Ralhrang hotu Min Aung Hlaing cun Naypidaw ih Myanmar president innpi cu thasawn le mawisawn in a remtha ih, president ttuan rori a tum tin ralhrang sunglam thu a suak.

Naypidaw thuthang cun “President hmunram sungah innpi sak bet rero a si ih, president sunloinak donsang khal an tuah thar. Hnatuan pawl lawng a lutsuak thei ih, ralhrang ralkap le palik pawlin khoh zetin an kil. Mawtaw khal an siancin lawng an lut thei,” tin thu an suah.

Ralhrang ralkap in rampi thuneihnak an lak hnuah maten rampi lalbik sinak petu Min Aung Hlaing cun a hnget in Myanmar rampi president ttuan rori a tum timi cu Myanmar Politics thlirthiam pawl khalin an rak rel rero zo. 2023 kum ih ralhrang pawl tuah tummi hrilawknak ah Min Aung Hlaing president a si theinak lamzin a si tin PR hrilawknak theifiangtu pawl cun an sim.

Ralhrang cun 2023 rampi hrilawknak an tuah tummi ahcun NLD telter an tum lo ih, hlutdaw covo an neihmi hmangin thuneihnak lak peh an tum. Cumi ahcun Min Aung Hlaing in president ttuan rori a tum tin thuhla a suahnak khal a rei zo. Cuvek hnuah president in President innpi a remtha tin thu a suak betih, a tummi cu a fiang deuhdeuh in a lang.

Chuang Oo Ah Ralhrang 12 An Thi – Sagaing ramthen Chuang Oo myone Chuang Oo le Mungzua fehnak lamzin ah mii ralkap pawl cun ralhrang mawtaw bomb an puah ih, ralhrang 12 an thi tin thu an suah.

Chuang Oo PDF cun “August 8 zinglam nazi 2 hrawngah Chuang oo khua in ralhrang mipum 50 hrawng cu Chuang Oo lamzinpi thlunin an suak. Zinglam nazi 6:15 hrawngah ralhrang mawtaw pahnih le bike hrekkhat toin ralhrang mipum 70 hrawng an suak bet. Komkhawm cun ralhrang mipum 120 hrawng an si.

“Ralhrang pawl cun lamzin tluanih mipi inn an urkang phah hnuah zinglam nazi 10:15 hrawngah Pyu Saw Htee khua an thleng. Lamzin tluan ahcun ralhrang ralkap pawl vei 6 rori bomb kan rak puah. Sun nazi 2:36 hrawngah ralhrang pawl an suaksal ih, zanlam nazi 5:45 hrawngah tlangtluan an thleng. Ralhrang pawl cu lamzin tluanah bomb kan puah bet.

“Nikha pum lamzin tluanih ralhrang pawl bomb kan puahmi ah ralhrang 12 an thi ih, bomb 16 kan sar. Tuitum cu kanmah Chuang Oo PDf pawl komkhawm ih cangvaihnak a si ih, kan cangvaihnak ah kanmah lam thi kan um lo a si,” tin thu an suah.

KIA le Ralhrang Doawknak A Sosang – Kachin ramkulh Phakan myone Sezin khua kiangah Kachin ralkap KIA le ralhrang ralkap doawknak a sosang peh hrih ih, doawknak ruangah khuami tampi hmunhim panin an tlan.

KIA le PDF tangtlang in ralhrang ralkap le Shanni umtlangnak sakhan an lak hnuah ralhrang lamin raldonak vanzam thawn KIA le PDF tangtlang an dosal ih, cumi ruangah doawknak a sosang peh.

Khuami pakhat cun “Ralhrang pawl cun nazi 2 sung tluk raldonak vanzam in bomb in thlak ih,inn a kang phah. Doawknak a um peh ih, ralhrang pawl khal raldonak vanzam an hmang peh. Curuangah khua mipi pawl cu khua ah kan um ngam nawn lo ih, hmunhim kan ruahnak hmun pan in kan tlan thluh a si,” tin a sim.

Sezin khua kiang ahcun ralhrang ralkap le Shanni SNA pawl umtlangnak sakhan pakhat a um ih,July 16 lamin KIA le PDF cun ralhrang ralkap le Shanni pawl an rak do thok zo. August 8 ahcun KIA le PDF in ralhrang ralkap le Shanni umtlangnak sakhan an doneh nan, ralhrang lamin raldonak vanzam an hmang ciamco ih, cumi ruangah tutiang do aw peh rero lai an si.

Malaysia Ah Myanmar Mi 115 An Kai – Malaysia palik cun an ram sungih thupte lut pawl an hawl theu ih, a burin ramdangmi tampi an kai theu.

August 9 khalah Malay palik pawl cun Selangor peng Kajang ah ramdangmi pawl an um timi felfai zetin an thei ih,ramdangmi pawl umnak an luhcilh tikah Myanmar mi 115 khal an kai tel.

Malay palik pawl cun inn sangka ong duh lo pawl cu an inn sangka an vuak siat sak thluh ih, hrekkhat cu tap le khur phah cingin an suak. Hrekkhat cu inn sungih rak relh tivek khal an um nan, an luat cuang lo. Malay palik pawl cun Myanmar mi 115 tlunah Indonesia rammi 33 Bangladesh rammi 13, Nepal rammi 9, Sri Lanka rammi 4 le India rammi 1 pawl khal an kai tel.

Kaihmi zaten Malaysia um theinak Passport nei lo hlir an si ih, thuten Malaysia ih um an si ruangah kaih an si. Kaihmi lakah sungkua ih kaihmi tivek khal an um ih, nauhak tete khal an tel.

US In Ukraine An Bawmsal – Russia in Ukraine an do hnuah nasaten Ukraine dinpitu US cun Ukrane hnenah 1Billion an peksal ding thu leitlun an theihter.

US cun vei tampi Ukrane hrang sumpai le ralthuam a rak kuat rero zo ih, Russia in duh vekin Ukraine a do thei lo phah. US in One Billion Ukraine an pek ding thu mipi an theihter hnuah raldonak ralthuam phunphun khal Ukraine kan pe bet ding tin a simtel.

US cun Ukraine hnenih one billion an pek dingmi ah ralhtuam phunphun le mipi tuamhlawmawknak ding sii lam khal a tel ding tin an sim. Russia cun thla 6 sung Ukraine an do zo nan, an tum bangin Ukraine ram felfai zetin an la thei hrih lo ih, Ukraine nisuahnak lam Donbas ramthen sungah ram pahnih ralkap pawl nasaten an do aw rero lai.