Tedim Ah Sinpin Zung Le Penguk Zung A Kang – Chin ramkulh Tedim khawpi ih sinpi zung le penguk zung cu October 11, zan nazi 9 hrawngah a kangih, kiangkap mipi cun meithal puak awn khal an thei.
Tedim ih um pakhat cun “Zan sim hnu a si tikah kannih mipi cun kan pan ngam lo. Sipin zung le penguk zung a kang veten meithal puak awn kan thei cih. Ralthuampi puak awn le meithal puak awn kan thei. Ralthuampi cu ralhrang in an umnak hmunin an kapsuak in a lang.
“Meithal puak awn cu anmah ralhrang pawlih kahsuakmi maw, mipi ralkap pawl an kap aw timi cu felfai in kan thei hrih lo. Sipin zung le penguk zung a kangnak san khal kan thei hrih lo. Sipin zung le penguk zung cu a kang hlio tukih a siat phah zet ding. Zung kang le meithal puak ah mithi an um le um lo khal kan theifiang hrih lo a si,” tin a sim.
Ralhrang In Timit Lilawn An Tuah Theh – Chin ramkulh Hakha le Thantlang karlak ih Timit lilawn cu ralhrang pawlin reipi an buaipi hnuah an tuah thasal zo tin thu an suah.
Ralhrang ralkap cun “2021 , October 22 ah CDF pawlin Hakha le Thantlang karlak ih timit lilawn cu bomb in an rak puak siat. Cucu, kannih in 2022, September 24 ah timit lilawn ka tuah theh zo ih, mawtaw sukso khal feh a theih zo,” tin ralhrang pawl cun October 11 zan ah thu an suah.
Ralhrang in rampi thuneihnak an lak hnuah Chin ramkulh sungin Mindat khawpi thluh ah Thantlang khawpi sungah ralhrang ralkap le mipi ralkap pawl an rak do aw. Thantlang khawpi sungih doawknak a sosan tikah ralhrang pawl ralthuam le eiin phur thei hlah haiseh tin timit lilawn cu mipi ralkap lamin bomb in an rak puahsiat.
Cumi hnuin Thantlang ih ralhrang pawl cu Helicopter in eiin le ralthuam pek an si ih, timit lilawn sia ruangah hnuailam in ralthuam le eiin an phur thei lo tin an sim.
Ralhrang pawl cun July thlacem ah Kalaymyo in Chin ramkulh Hakha khawpi an rak pan ih, lamlak ah mipi ralkap pawlin theitawk in an rak kham rero nan, ralhrang pawl cu Hakha ah an thleng thei. Hakha le timit karlak khalah ralhrang pawl cu mipi ralkap pawlin thlakhat sung lenglo an rak kham nan, ralthuam le mipum an thlauawk tikah mipi ralkap pawl dung an sip ih, September thla cun ralhrang pawlin timit an rem thok thei ih, September 24 ah timit lilawn an rem tha zo thu an tarlang.
Ralhrang in timit lilawn an rem theh hnuin Thantlang khawpi remsal an tum tikhal in thu a rak suah dah zo. Tu ah ralhrang in ziang duhdan in timit lilawn an rem timi cu an cangvaih dan in reilo ah a fiang dingah ruah a si.
Lentlang Gate Ah Sumpai An Dil Nawn lo Ding – Chin ramkulh Tedim peng Rih fehnak lamzin Lentlang gate ah mipi ralkap pawlin lamzin sukso feh pawl sumpai an dil theu ih,mipi lam vuihramnak a um tikah Lentlang gate ah sumpai dil nawn lo dingin PDF Zoland cun thu an suah.
PDF Zoland cun “Chin ramkulh Tedim peng Rih le Tedim fehnak lamzin Lentlang gate ih mipi harsatnak thu ah kannih PDF Zoland hruaitu 6 le CNF hruaitu 6 pawl cu hmaiton in thureltlangnak kan nei.
Thu kan reltlangnak ahcun dothlengnak kan tuah reromi ah mipi khal an harsa tukih, tonawknak kan neihsal hlansung cu lentlang gate ah mipi sukso vak sumpai dil nawn lo dingin kanni PDF zoalnd le CNF cun remnak kan tuah. Chin ramkulh sungih chinmi tamzet lakah lungrualnak a malzet vek nan, hivek thiltha cu kannih PDF Zoland in pawlkom dang tuanpi in kan Zoland mipi hrang ka zuam vivo ding a si,” tin thu an suah.
Mipi ralkap in lamzin gate ah khualtlawng sukso mipi siah an khonmi hi mipi lakah pom dan le ruah dan a bangaw lo zetih, mipi tamsawn cu siah tivek cu mipi ralkap lamin khong hrih lo sehla an duh. Cutilai in mipi thenkhat cun mipi ralkap pawl sumpai kan bawm ringring thei lo ih, ralhrang khalin siah an khon ruangah mipi ralkap khalin siah khong ve ko haiseh titu khal an um ve.
Ralhrang Phit Tum NUG – NUG cozah in lailak president Duwa Lashila cun October 11 ih NUG meeting ah doawk in siseh Politics khalah ralhrang lamzin an phih taktak a tul thu a sim.
NUG lailak president Duwa Lashila cun “2023 ah dothlengnak a tawp kan thleng ding ti ih thu kan suahmi thawn pehparaw in mipi thenkhat cun an zum lo, Asinan dothlengnak tawpter taktak dingin lamzin tampi a um ko. A tawpnak doawknak picang ah kan zaten timtuahnak kan neih a tul.
“Khawpi sung doawknak tiang thleng thei a si ruangah ralringten um uh. Kan tuanpi pawl thawn ralhrang kan do dan ding siseh Politics lamin ralhrang lamzin kan phih tummi pawl hi ralring zetin rak hngak thiam hram uh tikhal kan lo simthei duh. Dothlengnak kum 2 sung kan luh thlang ding ruangah zum banlomi thil a thleng thei. Cuvek hrang khalah raltha zetih kan um a tul a si,” tin NUG lailak president Duwa Lashila cun a sim.
Ralhrang ralkap cun 2023 ah rampi hrilawknak tuah an tumih, hrilawknak hmangin thuneihnak lak vivo an tum. Ziangahtile,leitlun in hrilawknak ih nehnak cotu cu an theihpi ih, in theihpi thlang ve ko ding tin an ruat. NUG cun 2023 rori ah ralhrang doneh thluh an tum ve ih, 2023 cu nasa sinsin in Myanmar ram a buai hrih dingin a lang.
China In US Thuron An Pe – A tufang N.Korea in bomb zamthei an kahsuak reromi ah China cun N.Korea be dingin US thuron an pe.
N.Korea cun tui zarh sung lawngah bomb zamthei vei 7 an kapsuak ih,S.Korea le Japan mipi thinphang in an um phah. N.Korea in bomb zamthei Missile an kahsuak ruangah Japan cun ralrinnak an pe ih,US le S.Korea khal a rualin timtuahnak an neih phah. Asinan, N.Korea cun Japan, US le S.Korea pawl tihrim in bomb zamthei a kapsuak thotho.
Curuangah China lam an tongsuak ih,US cangvaih dan ding an simthei. China cun “N.Korea lawnglawng mawhthluk ding an silo, US, Japan le S.Korea pawlih cangvaih dan tla zoh a tha. N.Korea an hringhro ih, raldo zirtlangnak tivek an nei. US hi an tongkam vekin remnak an duh asile a takin cangvai ding an si. N.Korea an hmuhdan khal an thleng danglam a tulih, N.Korea thawn hmaiton in be aw ding an si,” tin China cun US thuron an pe.
Trump in US president a tuan nawn lo hnuah N.Korea cu US tihrim in vei tampi an cangsuak zo ih, US tiang kap thei ralthuam kan nei titiang in thu an suah. US ,Japan le S.Korea pawlin ralrinnak an pek khalah N.Korea cun an ralthuam neihmi an rinsan zetih an duhduh in an cangvai peh thotho cu a si.
Leave a Reply