AA Le Ralhrang In Remnak An Tuah – Ralhrang in rampi thuneihnak an lak hnuah nasaten do aw ve AA le ralhrang cu mipi zawnruat ruangah kap aw hrih lo dingin lungkimnak an nei ih, lungkimnak felfai sawn nei bet vivo dingin kan be aw rero hrih tin AA lam cun an sim.
AA thuphuangtu Khai Thukkah cun “Doawknak ruangah Rakhine mipi in an tuar tukih, harsatnak phunphun an tong. Curuangah Rakhine mipi pawlih harsat tuarnak zawn ruatin ralhrang thawn kap aw hrih lo dingah remnak kan tuah hrih. Ziangruangah ralhrang thawn kap aw hrih lo dingin remnak kan tuah ti asile a tufang Rakhine mipi pawl eiin le sivai thu ah nasaten harsatnak an tongih, mipi pawl eiin ih an tlaksam tlunah lo hnatuan pawl rawlkhawm caan a si. Lo hnatuan pawlin himten rawl an khawm theinak ding ruatin kahawk kan hrial hrih.
“Remnak felfai ka tuahmi cu nazi 24 sungah kan doawknak kan cawlhsan fel thluh dingih zokhal meithal kan hmet puak nawn lo ding, kan kap aw nawn lo ding timi a si. Kap aw lo dingin remawknak kan tuah caan cu kan lungkimmi kan thlun sung a siko. Culo remnak dang cu kan be aw rero hrih. Kap aw lo dingin remnak kan tuah ruangah kan pomda le kan dinnak a dang thluh tinak a si cuang lo. Kan dinnak kelah kan dingih, kan tumtahmi khal a kel a si hrih. Mipi zawnruat ruangah hahdamten rawl an khawm theinak ding kan duhsak.
“Tu ah kap aw lo dingin remnak kan nei ih, cumi hnuah mipi kai lo dingin kaihmi pawl thlah zalen dingin kan be aw hrih ding. Ralhrang in duhtawkin ralthuamapi an kap ih,mipi an thih phah rero ruangah mipi zawnruat in mipi bomnak pawl a luh thei ding khal kan beisei. Kap aw lo dingin remawknak kan tuahmi cu ziangtik tiang ti a umlo nan, kan thlun dung, kap aw lo ih kan umthei sung a si ding. Culo dang cu kan rel vivo ding a si,” tin a sim.
Kalay Le Tamu Karlak Ah Ralhrang Bomb An Puah – Sagaing ramthen Tamu in Kalay myo lamih feh ralhrang ralkap pawl cu Kalay PDF in lamlak ah bomb an rak puah ih, ralhrang thi an tam ti’n mipi theihternak an nei.
Ralhrang ralkap cun Russia ralthuam an leimi cu India in Sagaing ramthen Tamu myone sungin Kalay myo lamah an phur ih, lamlak ah theitawk in Kalay PDF le Tamu PDF cun theitawk in an rak kham ih, bomb an puah phah rero. November 26, zinglam nazi 10 in zanlam nazi 3 tiang khalah ralhrang mawtaw pawl cu Kalay PDF in bomb in an rak kham rero tin’ thu an suah.
Kalay PDF cun “November 14 ah Tamu in Kalay myo lamih feh ralhrang ralkap pawl cu November 25 ah Kalay le Tamu karlak ah an riak. Ralhrang pawl cu November 26 ah Kalay myo lam an pan ih, zinglam nazi 10 in zanlam nazi 3 tiang kannih Kalay PDF cun bomb kan rak puah rero. Bomb kan puah dan cu drone hmangin le lamzin ih bomb kan kam ciami hmangin a si. Neta bik bomb kan puahmi ah lamzin a siat phah ih, ralhrang pawl hmailam pan thei hrih loin lamzin ah an riak phah.
“Ralhrang pawl bomb kan puahmi ah an mawtaw siat a um ih, anmah ralhrang khal thi an tam nan, a zat kan fiah thei lo. Kalay le Tamu karlak lamzin hi boruak a sosang tuk lai ih,mipi zokhal zawh hrih lo dingin kan lo theihter non duhsal a si,” ti’n thu an suah.
Ralhrang pawl cu mipum tamzet le mawtaw tamzetin Kalaymyo lam pan an si ih, PDF pawlin an rak bawh timi an theih ruangah ralhrang pawl anmahten an feh duh lo, thawngtla le mipi hruaitelmi an nei ti’n Tamu PDF sungtel pawl cun an sim.
Tamu pDF sungtel pakhat cun “Ralhrang pawl hi ralthuam phur an si ih, an ralthuampi phurhmi pawl cu Kalaymyo ralhrang hmunpi ah ret ding an si. Tuitum cu ralhrang in Russia ralthuam an leimi a si ih, India thawn remnak an tuah hnuah ralthuam pawl cu India ramah an tthum hmaisa ih, cumi hnuah Tamu in Kalaymyo lam an fehpi.
“Lamzin tluanah kannih Tamu PDF le Kalay PDF pawlin ralhrang pawl kan rak bawh timi khal ralhrang pawlin an thei ih, cumi ruangah anmahten an feh duh lo. Thawngtla nunau an hruaitelmi a um ih, mipi an kaihmi thenkhat khal an hruai vivo. A caan ahcun mipi an kaihmi le thawngtla an hruaitelmi pawl cu ke in an fehter ih hmai an hruaiter. Cucu, PDF lamin in kap asile mipi pawl thih hmaisa haiseh timi an tumtah siko,” tin a sim.
Ralhrang pawl cu mipum tamzet le mawtaw tamzetin Kalaymyo lam pan an si ih, PDF pawlin an rak bawh timi an theih ruangah ralhrang pawl anmahten an feh duh lo, thawngtla le mipi hruaitelmi an nei ti’n Tamu PDF sungtel pawl cun an sim.
Tahan ih um pakhat cun “A tufang Tamu le Kalay karlak ih boruak sosang ruangah Kalay ih ralhrang hmunpi pawl cun duhduh in ralthuampi an kapsuak ciamco ih kannih mipi hrang khalah a him lo zet. Ralhrang in duhduh in ralthuampi an kah ruangah hriamhma ngah khal an um. Boruak sosan lai ahcun kan fimkhur thiam a tha ding,” tin a sim.
Ralhrang In Bike Mawng 3 An Kap That – Makui ramthen Pakukko ah ralhrang ralkap pawl cun bike pakhat ah mi pahnih nan phur aw thei lo tin thu an suah hnuah mi 3 an kap that zo ih, mi 50 tlun an kai zo.
Pakukko Nunau PDF pawl November 22 ah Dalan pakhat an rak thianfai ih,cumi ruangah ralhrang pawl cun nunau mipa ti um loin Pakkuko ah zokhal Bike in mi pahnih nan phur aw thei lo ding tin November 25 ah thu an rak suah.
Pakukko ih um pakhat cun “Ralhrang in yeke zuar pakhat cu a caan lo ah bike na mawng tin an kap that ih, nunau phur aw pahnih khal an kap that. Tutiang ahcun ralhrang in bike ih mi pahnih phurawk an sian nawn lo hnuah mi 3 an kap that zo. Tuhrih tiang ahcun kaihmi 50 tlun an um zo.
“Pakukko ahcun bike ih mi pahnih phurhawk an sian lo tlunah zinglam nazi 8 hlan le zan nazi 6 hnu khal bike mawn an siang nawn lo. Hivek a si tikah mipi kan buar phah zetih harsatnak tampi kan tong. Ralhrang in ziangtik tiang hivek an fehpi ding ti cu kan thei lo a si,” tin a sim.
Pakukko ih palik bawi cun “Mipi theih dingah daan le dun felfaiten kan suah zo ih mipi khal theihter thluh an si zo. Daan kan tuahmi ih mil lo cu tuanvo neitu pawlin cawl dingin an rak kham ih, cek an si. Cumi ah cawl duh lo pawl cu an kap. Daan kan tuahmi an thlun ahcun buai ding a um lo,” tin media thusuhnak a let.
PDF Komkhawm In Ralhrang 15 An That – Karen ramkulh Tandaungkyi myone Liktu hmunram Tanmoe Tuang khua kiangih ralhrang sakhan cu PDF komkhawm in an do ih, sakhan an siatsak thluh tlunah ralhrang 15 an thi ti’n mipi theihternak an nei.
PDF Special Force cun “Zinglam nazi 6 hrawngah kannih PDF komkhawm cun ralhrang sakhan kan kap. Nazi 2 sung tluk nasaten kan kap aw. Sakhan sungih um ralhrang tampi an thi ih, ralhrang sakhan kan urkang thok hnuah tlunzuang awn kan thei. Ralhrang raldonak Helicopter pahnih cu kanlam ah a ra ih, tlunsang’n in kap, bomb in thlak. Asinan, kannih PDF komkhawm pawl cu hmunhim ah dung kan rak sip man zo.
“Sakhan ih doawknak ah ralhrang tlun an thi ih, ralhrang thi 15 le 20 karlak an. Rlahrang raldonak Helicopter cun vei 7 tluk bomb in thlak. November thla sungah ralhrang sakhan vei 3 kan kap thlang. Tuitum ih doawknak ah ralhrang cun duhduh in ralthuampi an kapsuak ciamco ih, mipi inn siat phah a um tlunah mipi pakhat a thi. Doawknak ruangah ralhrang cun lamzin an khar ih, kiangkap khua pawl cu hmunhim pan in an tlan ve. Ralhrang in duhduh in bomb an thlak ih ralthuampi an kah ruangah mipi an him lo a si,” tin thu an suah.
Russia Ralkap 16 Myanmar An Thleng – Ralhrang cun anmah sumpai cem in Russia ralkap tamzet Myanmar ah tlawng dingin an cah ih, Russia ralkap 16 khal Myanmar an thleng zo tin an sim.
November 28 ah Russia ralkap dang pawl Myanmar thleng bet ding an um ih, Myanmar cun Russia ralkap 30 lenglo Myanmar tlawng dingin an sawm. Russia ralkap pawl Myanmar ah ziang an tuah ding timi cu felfai in theih a silo ih , anmah Russia vanzam cangkang in Myanmar feh an si.
Ralhrang thuthup phuangtu cun “Tu ah felfai zetin Myanmar ah Russia ralkap 16 an thleng zo. Ralhrang cun Russia ralkap 30 lenglo Myanmar ah tlawng dingin an sawm. Russia ralkap pawl hi Myanmar ah an feh sukso ringring ih, thilthar cu a si lemlo. A then cu vanzam mawn zirhtu an si ih, a then cu ralthuam dang hmandan zirhtu an si. Culo tlunlam deuh pawl cu ralhrang thawn be aw ding khal an si ding,” tin a sim.
Bangladesh Ralkap Naypidaw An Thleng – Ramri thuhla thawn pehparaw in Bangladesh ramri ralkap hotu le a kuthnuai pawl cu Myanmar khawpi Naypidaw an thlengih, ralhrang pawl thawn thureltlangnak an nei tin Bangladesh lam cun thu an suah.
Ralhrang ralkap cun “Bangladesh palai pawl thawn kan biakawknak san cu ramri thuhla ruangah a si ih, ramri ah dankalh pawlkom um lo dingin, minung zuarnak um lo dingin le dik zetin ramri kil ding tivek pawl kan rel. Kan ramri kil ralkap pawl thawn tuantlang in ramri thu ah siseh suamhmang ralthuamkai thu ah siseh thaten kan tuantlang ding a si,” tin thu an suah.
Kan dunglai AA le ralhrangt doawk ruangah ralhrang lamih kahsuakmi ralthuampi pawl cu Bangladesh ramri sungah a tla theu ih, cumi thuhla khal an rel tin Bangladesh thuthang lam cun an tarlang ve.
Argentina In Nehnak An Co – World Cup group puai pawl lek peh rero a si ih, Argentina cun 2-0 in Mexico an nei thei ih, hmat 3 an neih ve thlang ruangah sungsuak lut dingin beisei an nei lai. Argentina hrang Captain Messi le Fernandez in an sit goal. Hitin group c pawl cu vei 2 ciar an lek thlangih veikhat ciar lek ding an nei lai. Tui dinhmun ah Poland hmat 4, Argentina hmat 3, Saudi Arabi hmat 3 le Maxico hmat 1 tin an um ih, puai netabik ih zir in an zaten sungsuak lut dingah beisei an nei thluh lai. Group an lek theh tikah an lakin hmat hmutam team 2 cu sungsuak lut ding an si.
Champion lai France in 2-1 in Denmark an neh ih, puai khat lek ding umlai ah France cu sungsuak an lut fel zo. Group E ah Germany nehtu Japan in Coasta Rica an neh lo ih, sungsuak lut dingin puai netabik ah Spain an neh lole draw tal a tul dingih, cukhal result dangih zir a si vivo ding.
NOvember 28, tuizan ih lek ding pawl cu Myanmar caan nazi 4:30 ah Cameroon le Serbia, nazi 7:30 ah S.Korea le Ghana, Nazi 10:30 ah Brazil le Switzerland, nazi 1:309 ah Portugal le Uruguay pawl an si.
Leave a Reply