Mizoram University Ah Myanmar Ca An Zir Ding – India ram Mizoram State Mizoram University ah Myanmar ca le tong an zir thlang ding tin tuanvo neitu pawl cun an sim.
Mizoram University ah Myanmar ca le tong zir thei dingin Institute Of Chin Affiars le Mizoram University komkhawm cun theitawk an suah ih, 2022 October thla in zir thei an tum. Myanmar ca le tong tlunah Communication Skil khal an zir thok ding.
Mizoram University ah Myanmar ca le tong zirhtu ding cu Myanmar Subject in degree ndahtu Dr.Elis Thangi a si ih, Mizo tong le kawl tong duhtawk ih tong thiam le ngan thei veve a si.
Zir ding caan cu thla 10 sung a si ih, nazi 120 sung an zir ding. Nazi 30 cu mahte zingzoi ding caan an pe dingin an relcat. Tlawng luh man cu Rs1000 a si ih, thla 10 sungah zirnak thilri hrang Rs.1200 hrawng a cem ding tin tuanvo neitu lam cun an sim.
Mizoram University ih zirhtu pakhat cun “Kan tumbikmi cu phunsang tlawngta tlunah midang zirh duh hrang khal sangka kan on. A zir duh hrang hminpek a theih zo ih, a zirhtu ding khal a um zo. Myanmar ca le tong kan zirhnak ding san cu Myanmar ram a that tikah ramri sumdawnnak le Myanmar thawn hnatuan tlang duh tikah NGo dinhmun in hnatuan duh tikah bawmtu thatuk a si ding,” tin a sim.
India le Ralhrang An Berem Aw – Ralhrang ralkap le India palai cu September 16 lamah Naypidaw ah a rak tongaw ih, Sagaing ramthen Tamu ramri sungah India lamin Check Point tha tuk sak an tummi cu ralhrang lamin an rak lungpi tin India Embassy Yangon cun September 20 ah thu an suah.
India Embassy Yangon cun “Tamu khawpi ah cangkang le rintlak Check point tuah dingin lungkimnak hminkhen kan ngan fel zo. September 16 lamah remnak felfai kan rak tuah zomi a si ih, India cozah bomnak in Tamu khawpi ah Check Point cangkang tuah ding a si. India ram lam Mohre khalah Check Point picang kan rak sak zo.
“Myanmar lam, Tamu ih Check poit picang kan sak dingmi cu ziangkim mipi hrang a hahdam ih a osal theinak dingah a si. Mohre le Tamu hi India le Myanmar ramri thupi tuk pakhat a si. Ramri hmun ah Check Point picang kan sak mihi ramri ih um pawl thansohnak ah bawmtu thatuk a si rori ding,” tin India Embassy Yangon cun thu an suah.
Min Aung Hlaing ih Rualpa An Kai – Ralhrang ralkap hotu Min Aung Hlaing ih hnatuanpi le rualpi pakhat sumdawng milian Htun Min Latt cu Thailand ram Bangkok khawpi ah Thailand palik pawlin an kai ih, a neihmi sumpai Dollar ting 5 tlun khal hmang thei hrih lo dingin Thailand palik cun an kolsak hrih.
Thailand palik in Htun Min Latt an kaih hnuah an cek rero lai ih, sumpai dik lo le rittheihsi thubuai ruangah kaih an si thu Thailand palik lam cun thu an suah. Tu ah Htun Min Latt cu suah a si hrih lo ih, Thailand palik kutah a um hrih.
Thailand palik pawlih kaihmi Htun Min Latt cu ralhrang hotu Min Aung Hlaing thawn lungmankung , Hotel le thildang ah hnatuan tlang an si. 2019 kum, Bangkok khawpi ih an rak tuahmi ralthuam pholangnak khalah Htun Min Latt cun Min Aung HLaing a rak tawi’awm. Tu ahcun Htun Min Latt cu ritheihsi thubuai le sumpai dik lo thubuai ruangah kaih a si.
Htun Min Latt hi ralhrang thawn an tuantlang tin UK in ralhrang tuanpi pawl an hremmi khalah a tel. Ralbawi ih fapa Tun Min Latt cun 2017 kum ah $ thawng 71 in Myanmar ralkap a rak bawm zo. Ralhrang in rampi thuneihnak an lak hnu khalah ralhrang bawm peh rerotu pakhat a si tin ramleng thuthang pawl cun an tarlang.
Leave a Reply