Tamu ih India rammi pahnih thah an si hnuah India ralkap commando pawl cu July 7, zanlam nazi 3 hrawngah Mohre ah an ttum. India commando pawl cu ramri ah an zamkual hmaisa ih, tawkfang nawn ramri ih an zam hnuin Mohre ah an ttum.
Mohre ih um pakhat cun “Kan zum dan ahcun Tamu ih India rammi pahnih thah an si thu ah kilhimnak hnatuan dingin ramri ah commando pawl an ret siko ding tin kan ruat. Tamu ih India rammi thah an si hnu cun India rammi pawl cu siannak ca nei loin Myanmar lam feh kham an si ih, Myanmar mipawl khal siannak ca an neih lo ahcun India lamah luh an siang nawn ve lo.
“Ramri ih buainak a suah hnu cun Mohre bazar ah mi an mal zetih hrekkhat lawngin dawr an ong. Tamu in Mohre bazar ih to pawl khal feh kham an si ih, Mohre ih Myanmar raltlan pawl khal zalen zetin kan um ngam nawn lo a si,” tin a sim.
Thinzar Wint Kyaw An Kaihnak An Sim – Ralhrang ralkap cun ziangruangah lemcangthiam Thinzar Wint Kyaw an kai timi cu July 7 ah mipi simtheihnak an nei ih, kan kai siloin thu kan sut duak men an ti.
Lemcangthiam Thinzar Wint Kyaw cu Shan ralkap pakhat sawn SSPP hrang lem a cangih, Shan ralkap SSPP fawm thawn mopuai a hmang cih. Mopuai a hmannak zuk cu online ah a darh ih, mipi hrekkhat cu an thinnuam lo cia.
Cu ngaingai lemcan an theh in an tlun lamah Thinzar Wint Kyaw cu Lashio ah ralhrang pawlin an rak kai ih, July 7 zan tiangah an thlah hrih lo.
Thinzar Wint Kyaw an kaih thuhla ah Zaw Min Tun cun “Kan kai ih kan khum a silo, hmunnuam ah kan retih, thuhla suh ding kan neih ruangah thuhla kan sut menmi a si,” tin a sim.
SSPP cun “Lemcangthiam Thinzar Wint Kyaw rualin ralhrang cun mi 6 an kai ih, tutiang an thlah hrih lo. Lashio ralkap hmunpi ah an zaten an khum hrih a si,” tin media an simthei.
Naypidaw Thawnginn Sungah Daw Suh A Umlai – Ralhrang ralkap in Naypidaw thawnginn sungih an khummi Daw Aung San Suh Kyi cu Yangon a inn pakhat ah an tthawn zo tin July 7 ni ah thulengvak a tam ih, mipi an buai phah zet.
Asinan, Daw Suh buaipitu sihni pawl cun Daw Suh cu Naypidaw thawnginn sungah a umlai ih Yangon ah tthawn a silo. Yangon ahcun a hnen-um le thawnginn sungih a kenluh thei lomi a thuamhnaw pawl lawng kuat a si,amah cu Naypidaw thawnginn sungah a umlai ko tin an sim.
Naypidaw thawnginn sungih Court sung hnatuan pakhat khalin “July 7 zingah Daw Suh ih thubuai pakhat cu thawnginn sung Court ah rel ding a si. Court ahcun Daw Suh a ra nan, thuthentu sawn a rat man lo ruangah Daw Suh ih thu an rel sal lo. Naypidaw thawnginn sungah Daw Suh a umlai timi cu kan zaten kan hmu thluh ih, sihni pawl khalin an hmu thluh ko.
“Hrekkhat in Yangon ah Daw Suh an kuat zo tin an sim nan, kannih cun kan mit rori in Naypidaw thawnginn sung Court ah Daw Suh kan hmu. Asinan, neta ahcun a takin Yangon ah Daw Suh an kuat khal a sithei ko. Ziangahtile, thuthentu a pelh tivek a um dah lo ih,thumak danglam zet cu a si,” tin a sim.
Ralhrang ralkap cun July 4 ah Daw Suh Kyi cu Naypidaw thawnginn sung hmun pakhat a rak khum ih, thawnginn sungih kenluh thei lomi Daw Suh ih hnen-um le thilri pawl khal Yangon ih Daw Suh inn ah a rak kuat cih hngal. Tu ah Daw Suh cu thawnginn sungah khum hrih a sinan, China le ASEAN palai ih dilnak vekin Daw Suh cu Yangon a inn ah kiltu nei in ret a si leh men thei tin sihni hrekkhat cun an rel ve.
Ralhrang In UEC Hlun Thawng An Thla – Ralhrang ralkap cun NLD cozah san ih rampi hrilawknak tuanvoneitu 3 pawl cu july 7 ah an thu an relcat sak ih, kum 3 sung thawngtla dingin hremnak an pe.
Ralhrang ralkap ih hremnak pekmi ah NLD cozah san ih hrilawknak tuanvo neitu UEC hotubik U Hla Thein khal a telih, 2020 rampi hrilawknak thawn pehpar in ralhrang cun mi tampi thubuai an tuahsak.
Ralhrang cun 2020 rampi hrilawknak ah vote dik lo a um ih, khami lai ih UEC pawl cun NLD an ttan, vote dik lo khal an zingzoi duh lo. NLD pawl thawn an tuantlang ih, vote an ru tin thubuai an rak tuahsak hai. Tu ahcun thubuai an tuahsakmi lakin 3 hremnak an pefel zo ih, midang khal hremnak pek bet vivo an tum.
Sihni pakhat cun “July 7 ah NLD cozah san ih UEC hotu le amah bawmtu mi pahnih cu ralhrang Court in kum 3 sung thawngtla dingin hremnak an pe zo. Daw Suh le president hlun U Win Myint khal ralhrang cun vote dik lo hmangin thubuai an tuahsak thotho. Midang tampi khal vote dik lo tin an puhmi, thubuai an tuahsak a si,” tin a sim.
Leave a Reply