Myanmar Mino 19 Zuar An Si

Myanmar Mino 19 An Zuar – Wah hmunram Maipauh khua ih China mibumnak dawr ah Myanmar mino 19 zuar an si tin an sungte pawl cun an sim.

An sungte pakhat cun “Puaisa fehtlang in ramdang feh ding an si ih,puaisa cun China mibumnak hmunpi ah a rak zuar. Anmah rak leitu pawl khalin mi pakhat ah Yuan thawng 17 kan pekmi a si tin an tang ve. A feh pawl cun cuvek an thei ve lo a si,” tin a sim.

An rualpi pakhat cun “Computer le English thiam cu Wah hmunram ah ramdang pawl be dingin hnatuan a um ih,thla khat ah Yuan thawng 5 nan hlawh ding tin an sawm. Myanmar cun ting 15 kyat leng a is ih, 2022, October thla ah China mibumnak hmunpi cu an rak pan. An hnatuannak hmun an thlen hnuah online in mi an bumter ciamco ih, an tuan paih lo thu, tlun an duh thu an sim tikah zuar nan si, kan lo lei zo tin an sim. Cumi lawngah zuar an si timi an thei aw fang,” tin a sim.

Zuar a tongtu mino pakhat cun “Hmaisa ahcun ni 7 sung zirnak room ah in ret. Thil umdan kan theihfeng veten puaisa kan phone ih kan tuan paih lo tin kan sim. Cutikah puaisa cun sumpai ih zuar kan si thu in sim ih, amah lawng sumpai a don ruangah laksuah nan theih nawn lo in ti men. Puaisa le Company in tangka an rak pekawk lai khal kan thei lo. Suah kan duh thu kan sim lawngah zuar kan si timi kan theifiang. Ramdang pawl kan bum rero ih, a dik lomi hnatuannak a si,” tin a sim.

Zuar tong mino 19 pawl cu Shan ramkulh in 6 an si ih, a dang pawl cu Yangon, Makui , Pago le Tayawaddy , Mandalay le Ayeyarwaddy ramthen pawlin an si. An lakah nunau 6 an telih kum 20 kiangkap an si.

Innsangpa pakhat cun “Ka fapa khal a tel ve. Tu ahcun tlun an duh zet khalle an tlung thei nawn lo. Hna an tuan paih lo asile thawng kan lo thla ding tin an hro bet. Runtu khal an nei hrih lo. An umnak hmun cu theihtheih lo dingin an tuah ve. An hrang ahcun hnatuan lole thawngtlak lawng hril ding an nei thlang.

“Nulepa le sungkhat in phone in kan biak thei ruangah tu ahcun an phone pawl an laksak thluh zo. Asinan, anmah in midang phone tivekin biak caan in nei. Hivek dinhmun an thlen hnu ahcun kan seherh deuhdeuh. Wah ralkap pawl hnenah zangfah kan dil duh ih,kan fale pawl in runsuah sak dingin kan sawm. ,” tin a sim.

Sihni pakhat cun “Daan vek rori cun kum tampi sung thawngtla thei an si. Asinan, kaih an silo tikah hremnak pek a theih lo. Tih a nung tuk nan, hivek cu kan ram ah a tam deuhdeuh thlang. Ralhrang ralkap cun hivek khal an ngaihsak man nawn lo tikah a tuahtu pawlin langpang zetin an tuah ngam deuhdeuh a si,” tin a sim.

Ralhrang Rinsantu Khawlal An Kap That – Pago ramthen Htan Tapin myone Cidaw khawlal cu December 20,zinglam nazi 5 hrawngah PDF pawlin an kap that.

Khawlal an kah thatmi cu Hty Aung timi a si ih, ralhrang in rampi thuneihnak an lak hnuah khawlal sinak an pe. Khawlal an si hnuah ralhrang pawl rinsan zetin mipi dekcok rerotu a si.

Pago PDF cun “Ralhrang in khawlal sinak an pekmi a si ih,ralhrang le ralthuam a rinsan. Amah ruangah mipi tuartu an tam tuk zo ih, misual tin a hminthang lawlaw. Mipi parih a puarthau tuk ruangah kan thianfai lawlaw a si,” tin a sim.

Mandalay ramthen Mattaya myone Mui Talai khawlal khal December 20, zinglam nazi 7:45 ah Mandalay UG pawlin an kap that ve.

Mandalay UG thuphuangtu cun “Zinglam nazi 7 hrawngah ralhrang hmanrua khawlal Thant Zin kan thianfai. Zinglam nazi 9 hrawngah khawlal ruang la dingin ralhrang mawtaw a thleng ih, bomb kan rak puah bet. Ralhrang mawtaw a feh thei lo tikah ralhrang dang an ra betih, cupawl khal bomb kan rak puah. Ralhrang pawl bomb kan puahmi ah ralhrang 4 an thi a si,” tin a sim.

Ralhrang In PDF Pakhat An Urkang – Sagaing ramthen Myoung myone Sezua khua ah ralhrang ralkap in PDF pakhat an kai ngah ih, an urkang that tin mipi ralkap komkhawm CDSOM tuanvo neitu cun a sim.

CDSOM tuanvo neitu pakhat cun “Zingpit ah ralhrang pawl an ra lutih PDF sungtel Ko Myat Aung an kai ngah. An kaih hnuah ralhrnag meithal a longih a kap hai nan, a dunglam in an rak kap. Cumi hnuah mei in an urkang that cih men. A ruang cu a rak kengse thluh zo. Ralhrang cun khuami dang khal an kai ih, mipi ralkap pawl in hro bet. In kap asile khua kan urkang sak ding tin hro an suang. Mipi cu ralphaw ah an hmangih kan hrang a buaithlak ngaingai a si,” tin a sim.

Sagaing ramthen sung hmun tinkim ah doawknak a sosang peh ringring ih, ralhrang ralkap cun mipi kai vivo phah in PDF pawl an hawl ih, mipi cu ralphaw ah an hmang. Mipi an um ahcun PDF pawl khal mipi tuar ding an phan ruangah vei tampi an cangvai ngah lo phah tin an sim.

NUG In Ralhrang Pawl An Leem – Ralhrang ralkap in rampi thuneihnak an lak hnuah ralhrang tamzet mipi lamtang in CDM tuah an um. Neta ahcun ralhrang lakah CDM tuah thei lo nan, thupten ralhrang sunglam thu relsuak ringringtu an um vivo. Cuvek pawl ruangah ralhrang sunglam thu tampi a darh phah ih, NUG cun ralhrang pawl an lamtang dingin an lembet rero.

NUG cozah cun an hnenih ralhrang thuthup simtheitu hnenah laksawng an pek ding thu an tiam ih, CDM tuah thei lo ralhrang pawl theitawkin ralhrang sunglam thu ausuahpi dingin an leem.

NUG cun “Mipi lamtang duh zet nan, remcanlonak ruangah tlansuak thei lo ralkap tampi an um. An lakah mi tampi cu mipi hrang tangkai ralhrang thuthup phuangtu an si. Tu ahcun ralhrang thuthup phuangtu siseh CDM tuah hrihlo ralhrang pawl hnenah sawmnak kan nei duh.

“Remcanlonak ruangah CDM tuahthiam hrih lo ralhrang thuthup phuangtu pawl khal CDm tuah thei dingin zuam hram uh. Ralhrang thuthup phuang dingin pe aw cu kan hnenah felfai zetin in simthei hram uh. Nan himnak hrang tuanvo kan la dingih thuthup in simdan ih zir in nan hrang laksawng tuah a si ding.

“Ralhrang thuthup in simtu pawl cu kannih NUG cozah in dothlengnak sungah siseh dothlengnak theh tik khalah kan lo hum vivo ding. Curuangah , CDm tuah remcang lo ralhrang nan zate mipi hrang nan tangkainak dingah ralhrang thuthup i sim cio dingin kan lo sawm a si,” tin NUG cun thu an suah.

NUG In Ralhrang Hrilawknak Do Dingin An Sawm – NUG lailak president Duwa Lashila cun ralhrang tuah tummi hrilawknak cu anmah ralhrang pawl an umnak feh tluang vivo dingin an duhnak men a si ruangah do cio dingin mipi sawmnak a nei.

NUG lailak president Duwa Lashila cun “Ralhrang ralkap cun 2023 ah hrilawknak lem tuah an tum. Ralhrang in an umnak fehtluang vivo an duh ruangah le ramleng tlon an duh ruangah hrilawknak tuah an tuahmi a si. Curuangah, mipi in ralhrang hrilawknak tuah tummi hrilawknak cu kan do tengteng a tul.

“Ralhrang in daan le dun khal an nei lo. mipi inn duhtawkin an nawkkang ih, mipi nunnak an la rero men. Hivek dinhmun ah ralhrang in hrilawknak tuah an tummi cu tuah theinak daan khal an nei lo. Hrilawknak tuah an tumnak san khal Politics dinhmun in suahnak lamzin an hawlmi a si ih, hrilawknak tongkam hrimhrim khal an phu lo.

“Mipi in dothlengnak kan tuahmi hi cawlhsan men loin kan titheinak zawnzawn ah dothlengnak tuah peh rero ding kan si. Dothlengnak tuahtu zaten tuanpi ding kan si ih, mipi kan zaten ralhrang uknak do cio ding kan si. Curuagah zokhal ralhrang uknak do hrih vivo dingin sawm cio uhsi. Ralhrang in hrilawknak tuah an tummi cu do tengteng ding kan si,” tin mipi sawmnak a nei.

Missile Tuah Bansan Tum Lo N.Korea – Korea cun ziangtlukin hronak le khamnak tong khal sehla Missile tuah an bansan men lo ding thu leitlun an simthei.

Tuikum sungah bomb zamthei Missile tampi kapsuak zo N.Korea cun Missile menmen si nawn loin thlingthlatu tuah thei Missile zohsinnak an nei ih, an kapsuak lala. Thlingthlatu Missile an zohsinmi khal a tha tin thu an suah.

Hivekin N.Korea in Missile zohsinnak an nei rero cu an ramri S.Korea siseh leitlun ramdang khalin bansan dingin an sim ih, an bansan lo asile hremnak an pek sinsin ding thu an simthei.

Cutikah N.Korea cun “Kannih hrangah hremnak timi cu tih ding a um nawn lo. Ziangahtile, tuitum hi avei khatnak a silo ih, vei tampi hremnak in pe rero zo. Kan nunnak hrang le kan thansohnak hrang kanmahten kan zuam. Curuangah hremnak tivek men ruangah kan tuah tummi kan bansan cuang lo ding a si,” tin thu an suah men.