USDP cozah san ah siseh NLD san khalah Myanmar president zungih thuphuangtu U Zaw Hty cu may 23 ah lungnatnak in Naypidaw ihkhun 1000 umnak sizung ah a thi tin a sungte pawl cun an sim.
Kum 49 mi U Zaw Hty cu USDP san le NLD cozah san ah Myanmar ram president zungih thuphuangtu a sinan,ralhrang ralkap in 2021 ,February thla ih rampi thuneihnak an lak caan ahcun a hna in a suak ih, naypidaw a umnak ah a rak cawl.
A hna in a cawlh hnuah ralhrang pawl cun a hna pehsal dingin thu an pe ih, a duh lo ruangah ralhrang cun an kaihmi pawl retnak hmun pakhat ah an ret lawk ih, 2021 June thla ah an thlah zalen. Cumi hnuah lung natnak in a buai ringring ih, may 23 ah a nunnak a cem fel.
U Zaw Hty cu ralkap phunsang tlawngin ralhrang thuphuangtu Zaw Min Tun thawn tlawng theh tlang an rak si ih Than Shwe a lal laiah Than Shwe in Prime Minister ih a retmi Soe Win zungah cozah hna a rak tuan hmaisabik. 2010 ahcun Thein Sein president zungah thuphuangtu dinhmun in hna tuan ih, NLD cozah san khalah president zung thuphuangtu sinak a tuan peh.
NLD cozah ah media hmai ih thureltu a si ih, NLD in Rakhine ramkulh sung remnak hrang pawlkom an dinmi khalah palai ah an rak hmang. A mak ve zetnak pakhat ih an relmi cu ziangvek party in cozah an tuan khalle khawilam khawilam in remten be thei pakhat le president zung ih hnatuan peh thei pakhat a si.
2020 Myanmar rampi hrilawk hlanah ralhrang hotu Min Aung Hlaing cun NLD ruatmi hrilawknak tuanvo neitu pawl an tisual asile cozah in tuanvo a la ding a si tin media a rak simthei ih, cucu U Zaw Hty in hriawknak buaiter tum tin Min Aung Hlaing a rak puh ih, cumi ihsi thokin ralhrang le U Zaw Hty karlak boruak a se thok.
U Zaw Hty cun Myanmar president zung aiawh in thuphuangtu dinhmun in media ton netabik caan 2021, January 8 khalah “Hrilawknak ah kan sung timi cohlang loin soisel rerotu, do rerotu pawl cu Politics ah mah le mah that aw rerotu men an si,” tin a rak simthei hai.
Tilian Ruangah Raltlan Pawl An Harsa – Myanmar nikhua zohthiam pawlin Myanmar ram sung hmun hrekkhat ah ruah a sur ding, thli a hrang dingih ti a lian ding an rak ti bangin Mon ramkulh le Karen ramkulh ah ruah a sur , thli a hrangih , ti a lian. Karen ramkulh sungih raltlan pawl cu tilian ruangah an buai thluh.
Thailand le Myanmar ramri ih relh raltlan pawl cu ruahsur ringring le tilian ruangah an buai thluh ih,hrekkhat pawl umnak cu tilian ruangah um a theih nawn lo. Raltlan pawl cu karen ramkulh Myawaddy myone sungih doawknak ruangah tlan an si ih, khua 6 in mipum 100 tlun tilian ruangah umnak ding nei loin an buai.
Raltlan pawl bawmtu pakhat cun ‘Tuini May 23 cun ruah a han thlang. Ni 3 sung ruah a sur tikah tidai a thang cak tukih, lihong ti thawn a komawk tikah raltlan umnak hmun tampi a lik thluh. Curuangah, tucu a langten tlangsang ah kan umter ih, eiin an tlasam lawlaw a si,” tin a sim.
Hivekin raltlan pawl an harsa ih, mipi tamzet an buai nan, ralhrang ralkap le KNU karlak buainak a dai thei hrih lo, an doaw deuh ringring. Ralhrang pawl an hmunram lanin KNU hmunram sungah lut an si ih, KNU pawlin suak dingin an simthei nan, ralhrang pawl suak duh loin an do aw deuh ringring.
US Le Korea in Myanmar Hrang Dilnak An Nei – US president Biden le S.Korea president Yoon Seok-youl tei pahnih cun ralthuam rinsan in Myanmar ram thuneihnak latu ralhrang cu ralthuam zawrh nawn lo dingin leitlun dilnak an nei ih, Myanmar ram buainak ruangah tlan Myanmar mipi khal cohlang dingin an sawm.
US president Biden cu ASIA lamah khualtlawng in a vak ih, may 20 in 22 tiang S.Korea ah a caam. S.Korea a um sungah US le S.Korea tuantlang dan ding an rel ih, S.Korea le N.Korea karlak dinhmun khal an rel. Ram pahnih tuantlang dan ding felfai zetih an rel hnuah US president Biden le S.Korea president Yoon Seok-youl cun Myanmar ram buainak thuhla khal reltlannak an nei.
Ram pahnih president cun “Kannih US le S.Korea cun Myanmar ralkap ih cangvaih dan , rampi thuneihnak an lakmi cu kan dokalh lawlaw. Sualnak nei lo mipi parih ralthuam an hmang khal dankalh a si ih, cawlhsan hngal ding an si. Dik lo zetih an kaihmi pawl thlah zalen thlang ding an si ih, mipi harsa bomnak pawl kham rero ding an silo. Ram buainak cu a rangthei bikin relfel ding an si ih, Myanmar cu democracy lamzin ah hruai ding an si.
“Ralkap in dankalh le ralthuam rinsan in rampi thuneihnak an lak ruangah zokhal in Myanmar ralkap cu ralthuam leiter ding kan silo. Myanmar ralkap hnenah ralthuam zuar hlah uh. Myanmar mipi zawn ruat uhla, Myanmar raltlan pawl cohlang hram uh. Cucu, minungpi duhdawt zangfah lainatnak a si,” tin thu an suah.
Leave a Reply