Ralhrang hotu Min Aung Hlaing cun a tufang Myanmar ram buainak ah ramdang tel lo dingin a simthei hai ih, kan ram sung buainak cu kanmah ram sungih um mipi pawlih tifel dingmi a si tin May 12 sun ralhrang meeting ah a relsuak.
Min Aung Hlaing cun “Myanmar ram buainak cu kanmah ram sungih um Myanmar mipawl ih relfel dingmi a si. Kan ram buainak ah ramdang pawl an telnak ding san a um lo. Myanmar ram ih hmailam thu cu kanmah a sungih um Myanmar mipawl in kan relfel ding a si,” tin a sim.
Myanmar ram buainak thuhla thawn pehpar aw in US cozah hruaitu pawl le ASEAN pawlkom sungtel pawl cu tu ah Washington khawpi ah tongaw in thurelnak an nei rero ih, US cun ASEAN sungtel pawl cu Myanmar ram buainak ah nasa ten ralhrang pawl nor dingin a sawm hai.
Hivek cu Min Aung Hlaing in a rak theih ve in a langih, US le ASEAN sungtel pawl tihrimnak ah siko ding, Myanmar ram buainak ah ramdang pawl nan telnak ding san a um lo tin a tongsuak phah.
Ralhrang ralkap cun ram buainak ah remnak um dingin tlangpar ralthuamkai pawl hmaiton ih biakawk an duhthu an simthei ih, be aw dingin an sawm. Pawlkom 10 pawl cu Min Aung Hlaing tong dingin hmin a pe zo. Asinan, tlangpar ralthuamkai lakah thazang cak ti ih relmi KIA, KNU ,KNPP le CNA pawl cun Min Aung Hlaing an ton lo ding thu mipi an theihter zo ve.
Min Aung Hlaing cun “Remdainak hrang thurelkhawmnak ka neih dingmi cun rahtha a rah rori ding tin zumnak ka nei ih, kan hlawhtlinlonak ding san a um lo a si,” tin a sim bet.
Leave a Reply