Ralrang ralkap cun 2021 October thla tiangah Myanmar ram sungah mipum 55 Million kan um tin thu an suah ih, 2024 ah rampi huapin mipum siarnak an neih thu khal an tarlang cih.
2014 kum ah Myanmar rampi huap mipum siarnak an rak nei zo ih, cumi tum ahcun Myanmar ram sungah mipum 51 million an um tin an siarsuak. 2014 kum hnuah cozah cun 2019 kum ah Myanmar mipum siarnak an rak neisal ih , mipum 54 Million kan um tin thu an rak suah.
2021 ahcun inn tin cazin siar loin inthuangsuh cazin le khua tin hmin cazin vekin mipi siarsak a si ih, Myanmar ram sungah mipum 55 Million an um tin thu an suah. 2024 ahcun inn tin lutin mipum siarnak runpi neih a si ding tin ralhrang cun thu an suah.
Rampi huap cazin an suah dan vek asile Chin ramkulh sungah mipum 530540 kan um ih, cumi sungah mipa 252808 le nunau 277732 an um tin an tarlang. Myanmar rampi huapin Kaya ah mipum an malbik ih, mipum ting 3 hrawng an um.
China Ruahcen Ah Mi 6 An Thi Zo – China ram Guangxi, Guangdong le Fujian lamah ruah a cen nasa ih, mi 6 an thih phah zo tin China cun thu an suah.
Fujian ih inn cim ruangah mi 3 an thi ih, leimin ruangah mi 2 an thi. Hmundang ih mawtaw pil ruangah mi pakhat a thi ih,midang pathum khal an hlo. Tutiang cu mithi 6 an um zo ih, mi tampi hmunhim ah thawn an si.
Central China le nisuahnak lam China cun fur caan tinten ruah cen ruangah tilian, tilik, leimin le inncim an tuar ringring. Nikum tuvek caan khalah Central China cun nasa ten tilian le tilik an rak tuar zo ih, mi tampi an thih phah. Tu khalah hmun hrekkhat ah ruah a cen, ti a lian hrih ih, mithi an um bet thei tlunah dinhmun se vivo thei khal a si.
Russia In Man Olten China Hnenah Yinan An Zawrh – Russia in Ukraine an do tikah leitlun cun a phunphun in Russia cu hremnak an pe rero ih, Russia thilri hrimhrim lei nawn loin an um.
Hivek a si tikah Russia cun an ramsung suak Yinan pawl zuarnak ding an harsa thokih ,an rualpi tha China hnenah man olsawn in an zuar ih, China cun leitlun hmun dangdang ah hlawksawn in Yinan an rak zuarsawng rero ve.
Hitin China cu leitlun ah Yinan lei le zuar suak tam dinhmun pahnihnak an luah ban thlangih, an tlunah Saudi Arabia lawng an um thlang. Russia le China ziangtik tiang an tuantlang thei ding timi cu theih ban a silo.
Russia President Putin cun Europe ram le US in an duhdan vekin in hrem hman sehla sipuazi ah kan buai lo tin a rak rel nan, tu ahcun anmah Russia ramsuak Yinan rori khal an duh vekin an zuar thei nawn lo ih, an duh hnakin man ol in China hnenah an zuar phah.
Russia le Ukraine buainak ah China cu lailak palak dinhmun ah um an si ih, Ukraine raltlan hrang bomnak an kuat rualin Russia khal thaten an biak ih, an tuanpi. Russia le Ukraine buainak cu Ukraine nisuahnak lamah an do aw peh rero lai ih, thuhla thar ciamco a um thei hrih lo.
Russia president Putin cun Ukraine la tum kan silo, thianfainak kan nei men tin a sim zo ih, kan thianfai duhmi kan theh hlansung cu kan peh vivo hrih ding tin a sim. Russia ih tumtahmi taktak theih a har ih, mi tamsawn cun Ukraine nisuahnak lam lak an tum siko tin an sim ve.
Leave a Reply