Rihkhawdar Ah An Kap Aw – Dothlengnak ralthuamkai pakhat Hualngoram CDF cun Chin ramkulh Rihkhawdar khawpi ah ralhrang ralkap an kap tin mipi theihternak an nei ih, ralhrang thi an um tin an tarlang.
CDF Hualngoram cun “Rihkhawdar ralhrang hmunih um ralhrang pawl le kannih CDF Hualngamram pawl cu July 25 le July 26 ah kan kap aw. Doawknak cu kanmah CDF Hualngamram lamih hramthokmi a si. Ralhrang ralkap in dik lo zetin ram hruaitu pawl thihdan an pekmi a takin an thlaithat ruangah cumi thungrulnak hrang ralhrang kan kap.
“Ni hmaisa sawn July 25 ah minute 40 tluk kan kap aw ih, ni neta sawn July 26 ah minute 20 tluk kan kap aw. Kannih cun ralthuampi le ralthuam dang phunphun thawn ralhrang kan kap ih, ralhrang thi an um rori ding nan, a zat kan fiah thei lo. Kannih lamin thi le hriamhma ngah kan um lo ih, himdamten dung kan sip thei a si,” tin thu an suah.
Kanpetlet Ah Ralhrang 4 An Thi – Chin ramkulh Kanpetlet khalah CDF Kanpetlet cun ralhrang in mi 4 an thlaithatmi thungrulnak hrang ralhrang ralkap kan kap ih, ralhrang 4 an thi tin thu an suah.
CDF kanpetlet cun “July 27 ah ralhrang in mi 4 an thlaithatmi thungrulnak hrang ralhrang kan kap. Kannih CDF Kanpetlet pawl cu hmun 3 ah kan then aw ih, Kanpetlet khawpi sungih penguk zung, fimzir zung le suakthuan tlawngih umhmun khuar ralhrang ralkap pawl kan kap. Hmun 3 ih ralhrang kan domi ah ralhrang palik 2 le ralhrang ralkap 2 an thi ih, ralhrang ralkap pakhat hriamhma a ngah.
“Kan doawk caan cu sun nazi 12:25 in nazi 1:20 tiang a si ih, kannih CDF Kanpetlet lam cu thi le hriamhma ngah um loin kan him. Ralhrang ralkap in dik lo zetin lai an rel ruangah kannih CDF kanpetlet cun MOD le CJDC daan vekin khawpi sungah ralhrang kan do peh vivo ding a si,” tin thu an suah.
lamzawhnak Neitu Pawl Mawtaw In An Pah – Yangon ramthen S.Dagon vengih ralhrang uknak dokalh in lamzawh duhphorhnak nei mino pawl cu mawtaw in an pah ih, an thekdarh.
July 27, sun nazi 2 hrawngah mino pawl cu ralhrang uknak dokalh in lamzawh duhphorhnak nei an si ih, Toyota Mark II mawtaw rang pakhat cun lamzawh duhphorhnak nei mino pawl cu an dunglam in a pah hrim.
Mino hotu Zaw Htet cun “Mawtaw thawn in pah tikah zamrang zetin kan tlan thluh hngal. Mawtaw ih in pah hnuah mawtaw sungin mi pakhat a ttum. Amah cu kum 40 hrawng a bangih,pasang zet, samtawi midum lampang a si,” tin a sim.
Ralhrang ralkap cun a hlan khalah lamzawh duhphorhnak nei mino pawl cu mawtaw in an rak pah rero zo ih, an pah hnuah an kai theu. Tuitum ahcun kaihmi an um lo ih, an zaten an tlan thluh man.
Leitlun Democracy ram ahcun zalen zetin duhphorhnak neih sian a sinan, Democracy uknak vekin kan feh titu ralhrang ralkap pawl cun lamzawh duhphorhnak nei mino pawl an hua tukih, ralthuam hmangin an thekdarh theu tlunah mataw ih pah khal an uar tuk thlang.
Ralhrang In NLD Party Sungtel An Hrem That – Yangon ramthen Mingala Taungyut myone ih NLD party sungtel U Hla Htoo cu ralhrang ralkap in an kaih hnuah an hrem that tin an sungte pawl cun an sim.
Ralhrang ralkap cun July 23 ah kum 45 mi U Hla Htoo an kai ih, July 25 ah a thi zo tin a sungte pawl an theihter.
An sungte pakhat cun “Ralhrang pawl an rat caan ahcun mipi ralkap pawl a somdawl tin thu kan dongih, mallai thusuh duh kan nei tin an hruai. A thuamhaw tivek kan tuahsak pei maw tin kan suh tikah a tul le kan lo sim leh ding in ti men. Nikhat a liam hnuah a thi zo tin in simthei. Ralhrang in an kaih hnuah an hrem ciamco ih a thi timi thudik kan thei ko. A ruang kan dil nan, in pe duh lo ih, khawitawk ah an phum tikhal in sim duh lo a si,” tin a sim.
Ralhrang ralkap cun U Hla Htoo cu lungphucawl in a thi tin an sim ih, zarhpi ni ah kan vuiliam zo tin a sungte pawl an theihter. Asinan, a sungte pawl cun lungphucawl natnak a nei lo ih, an hrem that tin an sim ve.
Ralhrang ralkap in rampi thuneihnak an lak hnuah NLD palai le NLD sungtel 960 an kai zo ih, cumi sungin mi 48 an that zo tin NLD lam cun thu an suah ve.
Tlangpar Ralthuamkai Unau 3 In Ralhrang An Mawhthluk – Ralhrang ralkap in dothlengnak ruangih an kaihmi mi 4 pawl an thlaithat thu ah tlangpar ralthuamkai Unau 3 AA, MNDAA le TNLA pawl cun lungrual in thu an suah ih, ralhrang cangvaih dan an mawhthluk thu an tarlang.
Tlangpar Ralthuamkai Unau 3 Cun “Ralhrang ralkap cun thidan an pekmi mi 4 pawl an thlaithat tin mipi theihternak an nei zo. Ralhrang ih an thahmi Phyu Ziya Taw le Jimmy tla cu ram thuhla ah theihnak tampi nei an si. Ralhrang in hivekin mi an that men cu leitlun daan, UN daan le ASEAN daan khal an pahbal thluh.
“Culawng siloin ralhrang lamin a relten rel ih remdaihnak hawl ding an timi khal an cangvaih dan cun a kalh thotho. Hmuhdan bangawk lo ruangah thu felfai lo cingin ralhrang in mi an thah ruangah mipi thinheng a sosang tukih, buainak thleng ding ziangkim cu anmah ralhrang lamin tuanvo an lak a ttul. Kannih unau 3 cun siattong pawl kan tuarpi tukih, ralhrang cangvaih dan kan mawhthluk tuk a si,” tin thu an suah.
Bike In Ralhrang Pawl Bomb An Puah – Makui ramthen Yesakyo myone Kyauk Hlika khua kiang GTC tlawngih umhmun khuar ralhrang ralkap pawl cu July 27, sun nazi 2 hrawngah Yesakyo PDF in bike in bomb an puah ih, ralhrang 3 an thi tin thu an suah.
Yesakyo PDF cun “July 27, sun nazi 2 hrawngah Yesakyo myone GTC tlawnginn ih umhmun khuar ralhrang ralkap pawl cu bike in bomb kan puah. Bomb kan puah dan cu ralhrang pawl umhmun khuarnak in hla tuk lo ah bomb kammi bike pakhat kan ret. A hnu nazi 2:35 reiah ralhrang pakhat cun bike cu an umnak hmunpi sungah a nor lut.
“Bike sung ahcun bike tonak on veten puak cih dingin bomb kan ret. Bike tonak ongtu ralhrang cu a hmunah a thi cih ih, ralhrang dang 5 hriamhma naa tuk an tuar. Hriamhma tuar ralhrang 5 lakin ralhrang 2 sizung ah an thi bet ih, midang ralhrang 3 pawl khal an mit a caw tin sizung lam thusuak kan thei.
“Bomb puak ahcun Express khualtlawng phur mawtaw mallai a siat tin thuhla kan thei ih, kannih mipi ralkap cun mipi hnenah ngaithiam kan lo dil. Hmailam ih ralhrang kan do vivonak dingah mipi lamih bomnak tul ringring kan si,” tin thu an suah.
Naypidaw Ah Russia Vanzam A Ttum – Russia vanzam pakhat cu July 25 in July 31 tiang Myanmar khawpi Naypidaw ah a ttum dingih,ralthuam hrekkhat an phur tin thlingthlatu pawl cun an sim.
July 25 ah Russia vanzam cu Naypidaw ah a ttumih, July 26 ah Myanmar suahsan in Russia ah a kirsal. July 27 ah Russia vanzam IL76TD cu naypidaw ah a ttumsal ih, July 28 ah Myanmar ram suahsan in Russia ah a kirsal ding. Russia vanzam IL76TD cu July 29 ah Naypidaw ah a ttumsal tumih, July 31 ah Myanmar suahsan in Russia ah a kirsal ding.
Russia vanzam IL76TD cu ni 3 peh in Myanmar khawpi Naypidaw ah ttum ding a si ih, ralhrang pawl hrang ralthuam phunphun a phur tin an sim. A tufangah ralhrang pawl cun ramsung dollar an la ciamco ih, cucu ralthuam leinak ah an hmang tin an sim bet.
Thlingthlatu pawlkom cun “A tufang ramsung buainak ah ralhrang in Vanzam le Helicopter an hman ciamconak san ih lang pakhat cu datsi an daihawk lo tlunah ralthuam an tlasam in a lang. Tu cu Russi lam Naypidaw tiang an rat tikah ralhrang lamin ralthuam hrang sumpai an rak pe cih in a lang.
“Russia in Ukraine an do hnuah ramdang tampi cun Russia an hrem ih, sumpai an tul tuk ve. Ralhrang pawl cun rampi siat ko seh, ralthuam kan tul tin dollar an la ciamco. Cucu, Russia hnenih ralthuam an leinak ding hrang a rak si,” tin an sim.
Leave a Reply