Chin Pastor ih Bike An Long – Mandalay ramthen Pin Oo Lwin khawpi ahmat 5 veng, Famous Hotel kiang lamzinpi ih feh Chin Pastor Aron Lian Nun cu mibur 8 pawlin an rak kham hnuah a bike an long ih an tlan.
Pastor Aron Lian Nun cun “Pastor pakhat hnenah thlacam dingin feh ka si ih, ka hmaiah mibur an um cu kan hmu. Thil an tuahkhawm ah ka ruat. An kiangah ka thlen tikah an lakin pakhat cun i kham ih ka hmaiah a ding. Cutikah sumpai i dil ah ka ruat men. Asinan, i tultlu ih ka bike mawn a tum. Keikhal ka bike ka dir ve nan, midang pawlin an bawm ih nam thawn in sah tikah mithah khal an poi loin a lang ih ka bike cu ka thlahliam muarmo.
“Ka kor hruhmi a rak sah ih in sat ngah nan, a bese tuk lo. Kiangkap ah inn a um nan,mi an reh tuk. Kan thawmvang ruangah mipi suak khal an um lo. Kan bike neihsun a si ih, sumpai kan khawlmi in kan lei. Ka nupi khal a hrisel lo tukih ka khawruah a har ngaingai a si,” ti’n a sim.
Company Hminthang In Myanmar Suahsan Ding – Ralhrang ralkap in rampi thuneihnak an lak hnuah leitlun company hminthang le hlawhtling pawl cun Myanmar ram an suahsan rero ih , tu khalah Switzerland Company hminthang Nestle cun Myanmar an suahsan ding thu an sim.
Nestle Companay cun Nescafe, Maggi le chocalate pawl an tuahsuak ih leitlun ram tinkim ah hlawhtling zetin umhmun an nei. Yangon ah an company a um ih Myanmar ramsung hmun tinkim ah an thilri a thleng. Tu ahcun Nestle in Myanmar ih an companay an khar thlang dingih, an thiltuahmi pawl Myanmar ih zuar peh duh asile Thailand, Malaysia le Philippines ihsin lakluh a tul thlang ding tikah a hlan hnakin aman a tam phah ding.
Nestle Companay hi leitlun huapih company hminthang le hlawhtling an si ih,2022 kum sungah leitlun huapin an thiltuah zuarmi zaten billion 96 an ngah. Nestle company hlanah Total, Chevron ,Telenor le ramdang company tamzet khalin Myanmar an rak suahsan zo.
Leitlun companay hminthang pawlin Myanmar an suahsan dan ah ram a buai ih, Myanmar ah kan him lo, a hlawk nawn lo, ralhrang hnenah siah kan pe thei lo tivekin suahsan culci an si.
Online Passport Dilnak An Ongsal – Ralhrang cun Onine ih passport dilnak an tuahmi cu February 27 ah an khar lawk nan, a zan ah an ongsal ih nikhat ah mipum 2500 an cohlan ding thu an sim.
A tufang ramsung buainak ruangah mino tamzet cu ramdang rori feh an tumih ralhrang in online passport tuahnak an tuahmi Website khalah a diltu an tam tuk. Diltu an tam tuk tikah a diltu pawl sumpai pe fel dingin an rak kharsungmi a rak si.
Ramkulh le ramthen ahcun a hlanih an fehpi dan vekin Passport tuahnak zung pawl an ong zo. Online ih passport diltu pawl cu ramthen le ramkulh ah passport an tuah thei lo dingih Online hi diltu pohpoh Yangon lawngah Passport an tuahsak ding. Ralhrang in Online ih passport tuahnak an on hnuah diltu an tam tukih tui dinhmun ah March 17 tiang nikhiah a pek zomi an um.
Ralhrang 48 An Thi ih PDF 4 An Thi – February 27 Myanmar rampi huapih doawknak thu an suahmi ah ralhrang 48 an thi ih, PDF 4 an thi ti’n PDF pawl cun thu an suah.
Sagaing ramthen Minmoe myone ih doawknak ah ralhrang 17 an thi ih PDF pahnih an thi. Sagaing ramthen Mungzua ih doawknak ah ralhrang 4 an thi ih, Shwebo ih doawknak ah ralhrang 2 an thi. Sagaing ramthen Khin Oo ih doawknak ah PDF pahnih an thi ih, Makui ramthen Sikphyu ih doawknak ah ralhrang 10 an thi.
Makui ramthen Yesagyo ih doawknak ah ralhrang 5 an thi ih, Puakukko ramri ah ralhrang 2 an thianfai. Bago ramthen Waw myone ih doawknak ah ralhrang 3 an thi ih, Kaya ramkulh Siataw myone ih doawknak ah ralhrang 5 an thi ti’n hmuntin ih PDF pawl cun thu an suah.
Khin Oo ih pahnih an thih thu ah Khin Oo PDF cun “Ralhrang pawl khawitawk an thleng timi thlir in an fehsuak. Lamlak ah ralhrang pawl thupten an rak relh ih an kap aw. Annih hrang ahcun tlansuah a theih nawn lo silo, ralhrang do in an nunnak an hlan. An ruang cu ralhrang pawl an um nawn lo hnuah kan va la ih ,kan vui fel zo a si,” tin mipi an sim.
Ralhrang In Tlunzuang In PDF An Kap – Sagaing ramthen Kathar myone Ngiochi Htoh ညောင်ခြေထောက် khua kiangih doawknak ah ralhrang 11 an thi ih, ralhrang cun tlunzuang raldonak an hmang ciamco phah ti’n Kathar PDF cun an sim.
Kathar PDF tuanvo neitu cun “Doawknak sosang ah ralhrang 11 an thi ih, ralhrang 20 hrawng hriamhma ngah an um. Cutikah ralhrang cun tlunzuang raldonak an hmang. Sun nazi 2 hrawngin ralhrang thawn kan kap aw. Kannih lamah PDF le Kachin ralkap KIA kan tangtlang. KIA thawn kan tantlan tikah ralhrang thi an tam.
“Zan nazi 7:40 hrawng ahcun ralhrang in raldonak Helicopter an hmangih bomb in thlak. Doawknak a um tikah khuami pawl cu hmunhim ah an rak tlan thluh zo ih,ralhrang in tlunzuang raldonak an hman ruangah mipi thi le hriamhma ngah an um lo. Kannih mipi ralkap lam khal kan him hrih a si,” tin a sim.
Party Sinak Diltu 13 An Kim – Ralhrang in rampi huap hrilawknak tuah an tummi hrang ramsung party zaten party sinak dilsal uh ti’n thu an rak than ih, March 28 tiang party sinak dil theih caan an on.
Ralhrang in February 1 ah ramsung party zaten party sinak thar dilsal dingin a theihtermi a si ih, tutiang ah party sinak diltu party 13 an um zo ti’n ralhrang hnuaiih hrilawknak tuanvo neitu UEC cun thu an suah.
Ralhrang ruatmi UEC cun party sinak diltu pawl thaten zohfelnak kan nei rero lai. Tui dinhmun ah party sinak diltu 13 an um zo ih, an lakin party 5 cu rampi huapin cangvai ding an si. A dang party 8 pawl cu ramkulh le ramthen sung lawngah cangvai ding an si,” tin thu an suah.
Ralhrang hnenih party sinak dil party 13 lakin party 9 pawl cu party hlun an si ih, party 4 pawl cu party an si. Party hlun lakin ralhrang hnenih party sinak dilsal party 9 pawl cu
1.ပြည်ထောင်စုကြံ့ခိုင်ရေးနှင့်ဖွံဖြိုးရေးပါတီ
၂။ မြန်မာပြည်သူ့ဒီမိုကရက်တစ်ပါတီ
၃။ ပအိုဝ်းအမျိုးသားအဖွဲ့ချုပ် (PNO)
၄။ ဒီမိုကရေစီပါတီသစ်(ကချင်)
၅။ ပြည်သူ့အကျိုးပြုကျောင်းသားများပါတီ
၆။ အမျိုးသားဒီမိုကရေစီပါတီသစ်
၇။ ဖလုံ စဝေါ် ဒီမိုကရက်တစ်ပါတီ
၈။ တိုင်းရင်းသားစည်းလုံးညီညွတ်ရေးပါတီ
၉။ ရခိုင့်ဦးဆောင်ပါတီ pawl an si ih,party thar 4 pawl cu
၁။ ဖက်ဒရယ်ဒီမိုကရက်တစ်ပါတီ
၂။ ပြည်ထောင်စုဒီမိုကရေစီပါတီ
၃။ ဒီမိုကရက်တစ်အင်အားစုလေဘာပါတီ
၄။ ရှမ်းနှင့်တိုင်းရင်းသားများ ဒီမိုကရက်တစ်ပါတီ pawl an si.
Ralhrang cun thu an suah hnu ni 60 sungah party sinak dil lo cu an party an hlonhlo sak lanta ding thu an sim. Ralhrang in party daan thar thu an suahmi ahcun rampi huapih zuamtu ding party cun Party sungtel ting khat tlun an nei ding a si ih, party hotu in ting 1000 tal a kol ding. Ramkulh le ramthen lawngih zuamtu ding party cun party sungtel 1000 tal a nei ding a si ih, party hotu in ting 100 a kol ding a si ti’n ralhrang cun thu an rak suah.
NLD cun ralhrang tuahtummi hrilawknak an pom lo thu an sim ih, ralhrang tuahtummi hrilawknak ah tel an tum lo. NUG le PDF khalin ralhrang tuahtummi hrilawknak an pom ve lo ih ralhrang pawl hrilawknak tuah thei lo dingin theitawk kham an tum thu an rak than rero zo.
AA In Ralhrang Tumtah An Phuang – Ralhrang in Bangladesh ram ih tlan Rohigya thenkhat pawl kan ko tlungsal ding ti’n thu an suahmi cu Rakhine ralkap AA in an rak lunglo zetih ramleng tlon an tumnak men a si ti’n AA cun ralhrang tumtah an phuang.
Ralhrang cun Bangledesh ih tlan Rohingya lakin Myanmar ramih rak um zo pawl cu Myanmar ah an tlung thei ding ti’n thu an rak suah. Rohingya tampi lakah Myanmar ,India le Bangladesh ih um an si ih, ralhrang cun Myanmar ih rak um zo pawl lawng an cohlang tum. Hivek cu ralhrang in AA an tlonnak men a si ti’n an phuang.
AA thuphuangtu Khai Thukkah cun “Rampi dinhmun kan zoh asile remdaihnak zianghman a um lo. Ram dinhmun khal a him hrih lo ih,tuvek ah Rohingya pawl cohlan ding cu ralhrang in ramleng an tlonnak le an bum tumnak men a si. Tu ah ralhrang cun rampi thuneihnak an lakmi hi ramleng theihpinak an duh tukih cumi hrang a phunphun in an cangvai ve a si,” ti’n a sim.
AA in hivek in an tongsuak tikah ralhrang lam an lungawi lo zet dingin a langih AA le ralhrang buainak hram thoksalnak a si thei ti’n ramsung boruak thlirtu pawl cun an sim.
Kan dungih AA le ralhrang an doawk ciamco khal a hlanah tongkam in nasaten an rak el aw ciamco hmaisa ih, a tawp a tawp ahcun ralthuam phorhsuak in an kap aw cioamco. Tu khal AA in ralhrang cangvaih duhsan an sim tikah ralhrang thawn an karlak remawknak a buai thei in a lang.
Ralhrang hin rampi thuneihnak an lakmi hi leitlun theihpi an duh tukih Rohingya raltlan an cohlan tummi khal ramleng tlonnak taktak a siko ding ti’n Myanmar ram buainak thlir pawlin an sim ve.
FIFA In Thiambik Ah Leo Messi An Hril – Leitlun bawhlung thuneitu sangbik FIFA cun FEbruary 28 zingah bawhlung thawn pehparaw in thiambik hrilnak an nei.
FIFA cun mipa bawhlung sit thiambik ah Argentina le PSG hmaitlan Leonal Messi an hril ih, pahnihnak ah France le PSG hmaitlan Mbappe, pathumnak ah Real Madrid le France hmaitlan Benzema ti’n an um. Tuitum ih thiambik an hril dan cu 2022 sungih an cangvaih dan le an hlawhtlin dan zoh in a si ih ramti coach, ramtin Captain, mipi online vote le journalist vote ti’n hrilnak an nei.
Vote an hmuhdan pawl cu ONLINE mipi VOTES: Leo Messi 1,345,851, Mbappe 391,676, Benzema 200,009. Votes by Captains of the national teams: Leo Messi – 717, Kylian Mbappe – 395, Karim Benzema – 301. Votes by National team coaches: Leo Messi – 728, Kylian Mbappe – 478, Karim Benzema – 230. Journalists vote for The Best Award: Messi 836, Mbappe 433, Benzema 304.
FIFA Coach thiambik khalah 2022, FIFA World Cup ih Argentina Champion pitu Argentina Scaloni hril a si ih, Kawlkil thiambik khalah 2022 FIFA World Cup champion team Argentina kawlkil Martinez hril a si.
FIFA cun bulpak thiambik an hril tlunah Best XI minung 11 hrilnak khal an nei. FIFA in minung 11 an hrilmi pawl cu kawlkil ah Courtois , dungkham ah Cancelo, Vandijk , Hakimi , laitlan ah Casemiro, Modric, Debruyne , hmaitlan ah Messi, Mbappe, Haaland, Benzema pawl an si.
Leitlun bawhlung thiam pawl hrang bulpak laksawng lakih sunglawi hleice an timi pahnih cu FIFA Best Player le Ballon dO’r a si ih, Messi cun FIFA bulpak thiambik laksawng vei 7 a ngah zo tlunah Ballon dO’r khal vei 7 a ngah zo.
Cumi ah theih tul zetmi pakhat cu FIFA hin thiambik laksawng an pekmi hi hmin pathum an hmang zo. Pakhatnak ah FIFA World Player Of The Year, pahnihnak ah FIFA Ballon d’Or le pathumnak ah FIFA The Best Men’s Player timi pawl an si.
FIFA in bulpak thiambik laksawng a pekmi cu Messi in a ngah tambik ih vei 7 a ngah zo. Pahnihnak ah Portugal Captain C.Ronaldo a um ih C.Ronaldo in FIFA ih pekmi bulpak thiambik laksawng vei 5 a ngah ve zo. Ballon dO’r( Sui bawhlung) khal Messi in a ngah tambik ih vei 7 a ngah zo. C.Ronaldo khalin Ballon dO’r vei 5 a ngah ve zo ih, dawng tambik sangtu a si.
Leave a Reply