Daw Suh Kyi In NLD Buainak Thu A Then – Ralhrang ralkap in rampi thuneihnak an lak hnuah NLD party khal sunglamah thupten an rak buai nasa ih an buainak cu 2023, March 3 in a sosang ciamco.
Ramdang ih tlan NLD pawl cun ram sungih um Central NLD sungtel pawl cu ralhrang tuanpi an si, ralhrang tuahtummi hrilawknak tel an tum tin an puh ih Central NLD sinak in an daisuak. Ramleng ih um NLD pawlih dawisuakmi ramsung ih um Central NLD sungtel pawl cu Pyu Min Thein, Toe Lwin, San Dar Min le Win Myint Aung pawl an si.
Ralhrang in NLD hotu Daw Aung Suh Kyi an kaih hnuah NLD sungtel tamzet cu kaih tihah ramleng ah an tlanih a tamsawn cu NUG ah an tel. Ramleng ih thleng NLD pawl cun anmahten Central NLD cangvaitu tin pawlkom thar an di ih NLD CWC tin hmin an pe aw. Tu ih Central NLD sungtel 4 pawl dawisuaktu hi NLD CWC pawl an si ih dawisuakmi pawlin ziangah an rak siar ve lo. Cutikah nasaten buai an si.
Dawisuakmi lakin Toe Lwin a tong suak rero ih NLD sinak tampi a rak rel zo. Tuitum khalah Toe Lwin cun ralhrang in Daw Suh an kaih hnuih Daw Suh Kyi tongkam, NLD CWC thawn pehparaw in Daw Suh Kyi ih thurelmi , voice le kut ngan rori khalin ka nei tin mipi a sim.
Toe Lwin cun NLD buainak thawn pehparaw in Daw Suh Kyi ih thuthennak le hmuhdan cu hitin a si, “Daw Suh Kyi in ramleng thleng pawlih dinmi NLD CWC pawl a pom lo lawlaw ih an thuten pawlkom an dinawktermi khal a duh lo lawlaw. An duhduh in NLD tuah theinak khal an nei lo,” tin amah buaipitu Sihni pawl a sim ih Sihni pawl cun voice record le cangan in an nei tiah Toe Lwin cun a sim.
Tow Lwin cun “Sihni Min Min Soe in Daw Suh Kyi ih tongmi pawl a record ih ca in a ngan thluh. Cukhal tutiang kan kol. Daw Suh in NLD pawlkom thar a duh lo thu a sim hnuah president Win Myint khal sihni pawlin NLD thuhla an relpi ih pawlkom thar an dinmi a pom ve lo. Curuangah Daw Suh Kyi tel loin ramleng ih tlan NLD pawlin zianghman tithei an nei lo,” tin Toe Lwin a tongsuak.
Dawisuakmi San Dar Min khal a rak sosang zetih BBC hnenah hitin a sim, “Kannih ramsung ah Central NLD sungtel 8 kan um lai. Ramleng ih tlan pawlin ramsung ih um Central NLD pawl theihter loin an duhduh in thusuah men thei an silo. NLD daan khalin a duh lo. NLD sungtel cu ramleng ih um an si thei lo. Ralhrang thawn tuantlangnak kan nei lo ih, ralhrang tuahtummi hrilawknak tel tumnak khal kan nei lo. Asinan, kannih cu NLD party hrang theitawk zuamtu le khuakhangtu kan si. Ramsung ih kan um a thatnak khal kaihmi NLD pawl sihni kan hawlsak ih, NLD thuhla thawn pehparaw in buaipi tulmi le tuah tulmi pawl kan tuah thluh. Cuvek caan ah ramleng ih tlan pawl cu an ummen. NLD hi Daw Suh Kyi ih dinmi a si tlunah amah Daw Suh Kyi hi hotu a si ih a tel loin duhduh thu rak suah a theih lo,” tin San Dar Min cun BBC a sim ve.
Ramleng ih thleng NLD pawl khalin “Court ah Daw Suh Kyi an dinpi lo ih, ralhrang tuahtummi hrilawknak ah tel an tum. Ralhrang hnenah party sinak dil an tum. Cuvek kan duh lo ruangah Central NLD sinak in dawi kan si,” tin an sim ve.
March 3 in tuini tiang NLD buainak a tawp hrih lo ih anmah NLD sungtel pawl khat le khat tongkam in an kap aw rero. A then cu media hmangin thu an sim ih a then cu bulpakin casuah rero khal an um.
Mipi tamsawn cun “Tui caan hi NLD buai caan a silo,Mipi in NLD a um le um lo khal kan thei nawn lo. Dothlengnak tuah caan a sih ih khatlam khatlam in NLD rak sal buai hlah uh. Kan lo ngaihsak cuang lo. Tuih mipi cozah cu NUG sawn an si. Nannih NLD pawl kha daiten ummen uh,mipi buai ding zawngin cangvai rero hlah uh,” tin mipi tamsawn cun an hmuhdan an rak sim ve.
Nunau Pawl Phunsang Tlawngkai An Kham Peh – Afghanistan ih cozah kaitu Taliban pawl cun an ram sung phunsang tlawng pawl ah nunau pawl phunsang tlawngkai an kham peh hrih. Afghanistan ahcun phunsang tlawngta pawl thlatang caan ah cawlh an pe ih, March 6 in phunsang tlawng an kaisal.
Kum thok khalih an rak sian lomi cu thlatang hnu tlawng an phuansal caan khalah nunau pawl cu phunsang tlawngkai peh an siang cuang lo. Nunau pawl cu suakthuan tlawng tiang lawng kai an siang. Taliban pawl cun 2021 August thla ah Afghanistan rampi thuneihnak an rak co ih cumi ihsin thokin nunau hrang daan phunphun an tuah.
Taliban cun Afghanistan ram an uk hnuah nunau pawl cu anmahten Gym feh, park feh le vantlang mipi umkhawmnak hmunih feh khal an kham ih, cuvek pawl an feh duh asile an unau mipa pakhat pakhat tal an hruai ding tin thu an suahnak a rei zo. 2021 ,August thla ihsin Taliban cun Afghanistan ram an uk thok nan, tuini tiang ziangram khalin Taliban an pom lo ih ,tuanpi paihtu an um lo tikah Afghanistan mipi le nunau pawl an harsa deuhdeuh.
Leave a Reply