NLD In Central Sungtel 4 An Dawisuak – Central NLD cun an party sungtel 4 pawl cu NLD Central sungtel an sinak in dawifel an si thu March 3 ah thu an suah.
NLD in Central sungtel sinak in an dawisuakmi pawl cu Yangon CM hlun Phyu Min Thein, San Dar Min, Toe Lwin le Win Myint Aung pawl an si. Central NLD cun an dawisuakmi pawl cu thubuai Daw Suh an dinpi lo ih mipi duhdan vekin an feh lo ruangah dawisuak an si thu an tarlang.
Central NLD in an dawisuakmi Phyu Min Thein hi Daw Suh Kyi eiruk thubuai ah Daw Suh thufel ttawmpi loin Daw Suh Hnenah sui tlawn le dollar ka pe rak titu a si ih a tongkam ruangah ralhrang in Daw Suh Kyi khal eiruk thubai hmangin hremnak an rak pe. Midang dawisuakmi pahnih San Dar Min le Toe Lwin khal thupten thawnginn sungih um Daw Suh an tongih NLD zung ongsal dingin le hrilawknak ah tel dingin an va dil,asinan Daw Suh in rem a rak tilo tiah an sim.
Central NLD ih thusuak cu hitin a si,”Kannih NLD party cu mipi duhdan vekin kekar kan si. Kum 35 sung ke kan karnak khalah mipi duhzawng ih kekar kan sizia a fiang tuk. NLD Party hotu Daw Suh le Central sungtel thenkhat pawl ralhrang in an kaih ruangah kannih Central sungtel lenglam ih um pawl cun NLD kan rawn kaihruai hrih.
“Ralhrang cun thuneihnak an lakmi kaih hnget vivo tumin a lemmen hrilawknak tuah an tum ih leitlun le mipi bum an tum. Cumi ah NLD sinak le mipi zah loin thupten NLD hmin rak hmangkaitu le ralhrang duhdan zawngih feh tum an rak um. An cangvaih dan cu felefai zetin fiahnak kan nei.
“Party sungtel meeting kan neihnak ah Central sungtel ,ramkulh le ramthen tin ih NLD palai pawl lungkim khawm in Daw Suh Dinpi lotu le ralhrang tuahtummi hrilawknak ih tel tum pawl cu hremnak pe dingin lungkimnak kan nei. Hremnak pawl cu NLD sungtel an sinak dawisuak lanta an si. Annih pawl cu kan dawisuak zo bangin kannih NLD thawn pehparawknak zianghman an nei nawn lo timi khal mipi kan lo theihter duh. Central NLD sungtel sinak in kan dawisuakmi pawl cu Phyu Min Thein, San Dar Min, Toe Lwin le Win Myint Aung pawl an si,” ti’n NLD cun thu an suah.
Ralhrang Le China In Remnak An Tuah – Ralhrang ralkap le China cun Rakhine ramkulh sung myone 3 ah thlitha meisa cet tuah dingin lungkimnak hminkhen an ngan ti’n ralhrang cun thu an suah.
Ram pahnnih hnatuan tlang dingin hminkhen an neihnak ahcun China palai khal a tel ih hmaiton in hminkhen ngannak an nei. China le ralhrang cun Rakhine ramkulh Ann myone ah 150 magawat thlitha cet tuah an tum ih, Tandwe myone ah 110 magawatt thlitha meicet tuah an tum. Gwa myone ahcun 100 magawatt thlitha meicet tuah an tum.
Ralhrang le China in remnak an tuah vek asile Rakhine ramkulh sung myone 3 ih thlitha meicet tuah an tummi cu 2025 ah thehfel dingin ruang hmannak an nei.
Rakhine ih um pakhat cun “China hin Myanmar ram sungih hlawknak hmuahhmuah cu lak luh thluh an tumih Rakhine ramkulh ahhin China ih tuah dingmi thil tampi a um zo. Kannih mipi cun China tuah tummi thil ah zianghman beiseinak kan nei lo. Hivek cu kannih Rakhine mipi hrang siseh Rakhine ramkulh hrang tlunah Myanmar ram hrang khalah thiltha lo zet a si ih, hmailam ah siatnak thlen theitu an si,” tin a sim.
Palai hlun Phi Than cun “Thuhla felfai zetin kan thei hrih lo. Ziangtlukin hngong a nei ding tikhal kan thei lo. Ram thenkhat cun thlitha meicet an sor zet tin kan thei. AN hlawhtling a si ahcun a tha men ding. Asinan, hlawhtling laklawh loin an tawp asile hmunram ui a um tuk ding. Mipi hmunram ah duhduh in an tuah men ding maw?zangnadomnak an pe ding tikhal kan thei hrih lo. Tu cu Tower vekin an tuah ding ti’n thu a um ih, Tower an tuah laiah hmunram neitu hnenah zingnadomanak sumpai an rak pe. Tuahsuak loin leiram sun ding cu phan a um zet,” tin a sim.
US In PDF Hrang Ralthuam Pek Tum Hrih Lo – Ralhrang in rampi thuneihnak an lak hnuah mipi cun ralhrang uknak duh loin lamzawh duhphorhnak neih a si ih ralhrang in lamzawh duhphorhnak tuahtu mipi pawl ralthuam hmangih an thekdarh ruangah mipi khalin ralthuam an kai ve.
Myanmar mipi in Democracy hrang ralthuam an kaih hlanah siseh ralthuam an kaih hnu khalah US cun Myanmar mipi an dinpi peh ringring thu an sim. Asinan, US cun Demoracy hrang zuam rerotu Myanmar mipi pawl hrang ralthuam lam bomnak pek an tum hrih lo thu an sim.
Cumi thuhla US ramdang palai zung ih thuron petu Derek Chollet cun hitin a sim, “Tuhrih ahcun Myanmar ram ih dothlengnak tuahtu pawl hrang ralthuam lam bomnak pek tumnak kan nei hrih lo. Kannih US cun buainak a luar sinsin ding kan duh lo ruangah Democracy hrang zuamtu pawl cu lamzin dang zawngin theitawk kan dinpi sawn ding. Cumi tlunah ram buainak ruangih a tuartu mipi pawl theitawk ih bomnak pek an si theinak dingah theitawk kan zuam ding.
“Democracy lamzin bangih an ukawk theinak dingah le mipi lam fimthiamnak an neih theinak dingah theitawk kan bawm ding. Tu ahcun US khawpi Washington khalah NUG zung on a si zo. Myanmar ram Democracy si dingin zuamtu pawlkom siseh NUG cozah khal pehtlaihnak kan nei ringring ih kan be aw ringring. Kanmah US lawng siloin ramdang pawl khal Myanmar mipi lamtang dingin theitawk kan sawm ringring a si,” ti’n a sim.
US cun Burma act timi daan an neihmi khalah Democracy hrang zuamtu Myanmar mipi hrang bomnak phunphun an pek ding thu an rak sim zo ih,cumi khalah PDF pawl cu ralthuam silo santhar thiamnak le santhar thilri thawn bomnak an pek ding thu an rak sim. Tuhrih tiang ahcun Burma Act hmangih bomnak an timi khal a takin theih ding a um hrih lo ih, thupten pekawk ding thil khal a si thei thung.
Franklin Graham Vietnam A Feh – Pathian thuthang simtu hminthang Franklin Graham cu Vietnam ram ah Pathian thuthangtha simnak a nei rero ti’n mipi theithernak a nei.
franklin Graham cu Vietnam ih kawhhran 300 tlunin an rak cohlang ih Spring Love Festival timi hmangin Pathian thuthangtha phuannak an nei. March 4 in caan hmang thokih March 5 khalah,caan an hmang peh ding.
Franklin Graham cun 2017 kum December thla khalah Vietnam a rak tlawng zo ih Pathian thuthangtha simnak a rak nei. Communist uknak ram ah Pathian thuthangtha simnak a nei thei cu Franklin Graham a lungawi tukih siannak petu Vietnam cozah par khalah lungawithu a sim.
Franklin Graham cun “Vietnam mipi siseh ram hruaitu pawl khal biaknak thuhla sim ka tum lo. Leitlun ah biaknak tampi a um ih zumdan a phunphun a um thei. Cumi lakin kei ka simmi cu Jesuh thawn ziangtin Pathian pehtlaihnak kan nei thei ding timi sawn ka sim. Kan sual sir in Pathian kan pan tikah Pathian cun in cohlang ringring a si,” tin a sim.
Leave a Reply