NLD Ih Thuthup A Phuangsuak

NLD Ih Thuthup A Phuangsuak – NLD cun Central NLD sungtel 4 pawl an hna ihsin an dawisuak lanta thu March 3 ah mipi theihternak an nei ih, an dawisuakmi pawl cu Phyu Min Thein, San Dar Min, Toe Lwin le Win Myint Aung pawl an si.

NLD cun dawisuakmi pawl cu Daw Suh Kyi an dinpi lo tlunah ralhrang hrilawknak tuahtummi ah tel an rak tum, cumi ruangah NLD sungtel an sinak in kan dawisuak felfai ih NLD thawn pehparawknak zianghman an nei nawn lo ti’n thu an rak suak.

NLD in Central sungtel sinak in an dawisuakmi lakih tel Toe Lwin cu a lungawi lo zetih NLD sinak thuthup mipi theih ah a pholang.

Toe Lwin cun “A thok ahcun mah le mah buai ka paih lo ruangah daiten ka rak um ringring. Asinan, ramleng ih tlansuak pawl an luarkai tuk tikah thuthup pawl khal ka rel thluh thlang ding. NLD dintu le hotu Daw Suh Kyi siseh Central sungtel dang pawl kaih an si tikah NLD party in thutluknak zianghman an rak tuah thei lo. Daw Suh Kyi in a tel loin NLD hminih thusuah le NLD hmin hman tivek a sian lo thu cu 2021, November 8 ah a sihni pawl a rak sim zo.

“Curuangah, tu ih NLD pages hmangin thusuahtu pawl hi thupten NLD pages hmang an si ih, anmahten thusuah theinak zianghman an nei lo. Thusuahtu bik Aung Kyi Nyuat in a thuten zianghman ti theinak a nei lo. Daw Suh tel loin dinmi NLD sungtel dang khal pom a silo ti’n Daw Suh cun kaih a si hnuah sihni pawl a rak cah zo. Tu ah Daw Suh thu tel loin NLD pages an hmangih thu an suahmi hi dankalhl a si ih, diknak a um lo.

“Tu ah NLD sungtel a dangten an dinsal ih an zaten Thailand ram le US ih um hlir an si. NLD in daan kan neih dan vek asile zokhal ramleng ih suak pohpoh cu NLD sungtel an si thei lo timi a um. Cuurangah, tuih thusuahtu pawl hi anmah sawn NLD sungtel an si thei lo. Kum 30 sung NLD kan fehnak lamtlunah ramleng ih tlan zokhalin NLD tuanvo lak theinak an nei lo ih, tuanvo an la awter asikhalle Offial an silo.

“NLD pages le Dhlaing pahnih hi a hlan NLD thuphuangtu sungtel tu ih NUG sungtel Nibunglatt le tu ih NUG sungtel Lwan Ko Latt tei pahnih kutah a um. 2021 March thla ah NLD central sungtel Ko Kyi Toe kaih a si tikah Nibung latt le Lwan Ko Latt tei pahnih cu NLD pages password an thlengih an kutah an ret. Cumi hnu NLD ih thusuak cu offial a si nawn lo.

“Kei hi Central NLD sungtel kan si tlunah NLD party mi thupi zet ka si. Curuangah NLD din thok ihsin a hnuih daan thar tuahmi siseh a sunglam thu ziangkhal theifiang zettu ka si. Curuangah, neta ih an dinawktermi NLD central ti aw pawl cu offial pakhat hman an silo. An duhduh in NLD hmin an hmangih NLD sinak vekin thu an suah awter ciamco. Anmah pawl sawn cu NLD sungtel an si nawn lo sawn tikhal ka sim duh. Kum 35 sung rori NLD hrang theitawk suahtu ka si ih, duhduh in NLD sinak thleng danglam a theih lo.

“Tu ah Central NLD meeting kan nei thei lo ih, cuvek cingin a lem pawlkom men sawnin meeting an nei awter ih kanmah pawl in dawi theinak zianghman an nei lo. Ramleng ih tlansuak mi tihhrut pawlin kannih Central NLD sungtel taktak pawl an duhduh’n in dawi thei lo. NLD daan khalin a duh lo. NLD pages ah mi 8 an um ih an ruahnak a aa thluh zoin a lang. Ram buainak thaten an theifiang lo ih, neta ah mawh an phur ding.

“Tui dinhmun Central NLD sungtel taktak lakin mi 6 pawl cu ramsung ah hahdamten an um. Cupawl cu Hanthar Myint, Thein Oo, Dr.Myo Ngyuat, Dr.Tin Myo Win, Aung Soe le Daw Khin Hty Cuai pawl an si. Anmah pawl sawn khal felfal zetin thu nan sut thei sawn. Curuangah, rinsanmi Media pawl khalin Central NLD sungtel si taktak pawl sawn kha thusut ngam uh.

“NLD lem pawlih meeting tuahmi khalah tu hi ka simmi Central NLD sungtel 6 pawl sawm an silo ih meeting ahcun Thailand le American ih tlan pawl lawng an tel. Ramsung ah kan hotu tampi kaih an si ih thawngtlakmi tam tuk an um. Curuangah an meeting ahcun hotu silo mi menmen pawl lawng meeting an nei awter. Cucu thupi hlapi ah an ruat aw ih NLD pages an hman thei ruangah ca an suah awter.

Tuitum ka ca ngan hi a hramthok fang a si hrih. Neta ah ram buai hnuih NLD sinak , buainak pawl khal kan pholang thluh lai ding. Keimai hram thokmi a silo. Daan le dun nei lo ramleng ih tlan NLD sungtel ti aw pawlih hramthokmi a si ih zo kan dik sawn timi cu thuanthu in a fiangter vivo mai ding a si,” tin ca a suah.