NMSP le Min Aung Hlaing An Tongaw Ding

Ralhrang ralkap hotu Min Aung Hlaing in tlangpar ralthuamkai hotu pawl hmaiton in ka be duh a timi ah tlangpar ralthuamkai pawlkom 10 khal Min Aung Hlaing be dingin hmin an theh lut zo ih, Min Aung Hlaing cun pakhat tetein ton vivo a tum.

Ralhrang ralkap hotu Min Aung Hlaing cun amah tong duhtu tlangpar ralthuamkai pawlkom 10 lakin may 20 ni ah hmaisabiknak hrang Shan ralkap RCSS hotu a rak tong zo. Tu ah Min Aung Hlaing cun amah tong duhtu tlangpar ralthuamkai pawlkom 10 lakin vei hnihnak ah New Mon State party hotusang a tong thlang ding. Tuini May 23 ah tongaw ding an si ih, NMSP hotusang khal Naypidaw a thleng zo.

Ralhrang ralkap hotu Min Aung Hlaing cun amah tong duhtu tlangpar ralthuamkai pawlkom 10 pawl cu a burin thu a relpi tum lo ih, pawlkom pakhat tetein thu a rel ding. Ni 3 dan ah thurelpi vivo ding a si ih, pawlkom 10 be dingin ni 30 caan hman a tum.

Ralhrang hotu Min Aung Hlaing thawn tongaw zo RCSS lam cun tonawk cu a tha, tonawk lo cun remnak a um thei lo, Federal Democracy khal kan rel rero dingih, a takin a langsuak mai ding, midang khalin thurelpi cio uh tin thu an rak suah zo.

Ralhrang ralkap hotu Min Aung Hlaing tong dingin hminpe tlangpar ralthuamkai pawlkom 10 an um ih, cumi lakin pawlkom 7 pawl cu ralhrang thawn kapaw lo dingin NCA hminkhen ngan an si. Pawlkom 3 cu NCA hminkhen nganlo an si ve. Min Aung Hlaing tong dingin hminpe NCA hminkhen ngan tlangpar ralthuamkai pawlkom 7 pawl cu KNLA PC, PNLO, ALP, RCSS, DKBA, NMSP le LDU pawl an si. NCA hminkhen ngan lo tlangpar ralthuamkai le pawlkom lakin Min Aung Hlaing tong dingih hminpe pawlkom 3 pawl cu UWSA ,NDAA le SSPP pawl an si.

Tu ah Min Aung Hlaing cun amah tong dingin hminpe pawlkom pahnih thu a relpi fel thlang dingih , neta ah pawlkom 8 pawl pakhat tetein thu a relpi vivo hrih ding.

Tlangpar ralthuamkai pawlkom lakin thazang cak ti ih an relmi Kachin ralkap KIA, Karen ralkap KNU, Chin ralkap CNA, Kaya ralkap KNPP ,Burmese Army ABSDF pawl cun ralhrang hotu Min Aung Hlaing an ton lo ding thu mipi an theihter zo ih, AA, TNLA le MNDAA pawl cun ralhrang hotu Min Aung Hlaing ih sawmnak an let lo hrimhrim.