NUG An Relfiang Aw

NUG An Relfiang Aw – NUG Cozah cun 2023 kum sung rori ah ralhrang do cimit thluh an tum thu mipi theihternak an rak nei zo ih, ziangruangah hivek thu an suah timi mipi simfiangnak an neisal.

NUG Prime Minister Mann Win Khaing Than cun “NUG in 2023 kum ih ralhrang do cimit thluh kan tummi cu thenkhat in a cangthei pei maw tin thusuhnak an nei phahphah. 2021 ihsin harsatnak phunphun kan rak tuar zo ih, tuini tiang kan tuarnak a reh hrih lo. Harsatnak phunphun tuar in kum 1 le thla 8 sung ralhrang kan do thei hrih timi cu thuanthu a kim zo.

“Hitluk caan pe in ralhrang kan dokhawm ih a harzia kan theifiang tuk ve. Curuangah, ziangasikhalle veikhat te cu mipi kan zaten kan tuartlang hrih pei tin 2023 ah rampi huap ralhrang do ciamco dingin le ralhrang uknak do cimit dingin thusuah phah kan si. Thu kan suah bangin a takih kan hlawhtlin theinak ding ahcun mipi kan zaten, dothlengnak ralthuamkai kan zaten le kan tuanpi tlangpar ralthuamkai zaten thawn lungrual zetin ke kan kartlang a tul a si,” tin a sim.

NUG cozah cun 2021, September 7 ah rampi huap raldo thu an rak suah zo. Tuitum ahcun 2023 ah ralhrang pawl kan neh rori ding tin thu an suahmi a si ih, ralhrang neh an tumdan an simmi ahcun raldonak ah siseh Politics khalin 2023 ah ralhrang kan doneh ding tin NUG cun thu an rak suah zo.

Curuangah, Myanmar ram a buai thok ihsin an rak rero bangin Myanmar ram buainak cun a malbik kum 3 lai cu a rawh hrih dingin a lang. 2021 le 2022 kum sungah ramsung hmun tinkim ah doawknak a um ih, 2023 ahcun NUG ih thu an suah dan vek asile doawknak a sosang deuhdeuh dingin a lang. Cumi hnuah ziang a thleng ding timi cu zianghman rel theih hrih lo a si.

Doawknak Ah PDF 6 An Thi – Sagaing ramthen Bamuah myone ih zarh khat tlun doawknak ah PDF 6 an thi ih, mipi ralkap cun thu an suah.

Intaw le Bamauh karlak ih doawknak ah Intaw pDF, Bamauh PDF le KIA pawl an tlang ih, October 4 in October 12 tiang mipi ralkap komkhawm cun ralhrang an do.

Intaw PDF thuphuangtu cun “Ni 9 sung ralhrang pawl thawn kan do thlang. October 11 ih kan doawknak ah miraltha PDF 6 cun ram le miphun hrang an nunnak an hlan. A thok ahcun ralhrang pawl mipum 300 hrawng an si ih, tu ahcun ralhrang pawl mipum 100 hrawng lawng an si thlang. Curuangah ralhrang thizat cekci kan fiah thei lo nan, ralhrang thi an tam ih ralthuam phunphun laksakmi khal kan nei a si,” tin a sim.

October 4 ah mipi ralkap komkhawm cun Bamuah ih ralhrang sakhan an kap ih, cawl loin ni 9 sung a do aw peh. Ralhrang lamin raldonak vanzam an hman tikah mipi ralkap lamin an tuar phah. Raltlan lakin khuami pahnih cun ralhrang kammi bomb an palpuak ngah ih, an thi. Ralhrang pawlin raldonak vanzam in bomb an thlak ruangah mipi inn 7 a kangih leihnuai ih ralhrang pawl cun mipi inn 26 an urkang sak tin PDF cun an thusuah ahcun an tarlang.

Ralthuam Thawn Ralhrang Pe Aw – Kayah ramkulh sungih mipi ralkap pawl do rerotu ralhrang pakhat Lwin Moe timi cu October 11 ah mipi lam a tangih, mipi ralkap kutah a ralthuam a hlan.

Kayah CDM pawlkom cun “Meithal zunkhat thawn kan hnenah a pe aw ih, kannih khalin laksawng ah ting 60 kan rak hlan ve. CDM tuah lakin ralhrang lamih kirsal an um ruangah kan fimkhur zetih thaten cekfelnak kan nei.

“Tuitum ih pe aw ralhrang cu Moebe ih doawknak ah a rak tel ve ih, tumtah nei loin mipi do rero a paih nawn lo ruangah mipi lamtang a si. Doawknak a sosan tikah ralhrang lamin pe aw duh an tam deuhdeuh ih, tubai ah kan hnenih pe aw ralhrang 7 an um thlang. An zaten fimkhur zetin kan retih kan kilkhawi hai a si,” tin a sim.

Khawsung Ah Kap Aw Lo Dingin Thu An Dil – Shan ramkulh Paluang hmunram sungah ralthuam hmangin doawknak thlen lo dingah Palaung Party TNP cun thu an suah.

Paluang hmunram Manttung khua sung ahcun KIA le PDF tangtlang in zarhkhat sung ralhrang ralkap pawl an kap ih, doawknak ruangah khua mipi pawl cu khua ah um ngam loin an tlan thluh phah. Cumi ruangah Palaung Party TNP cun khua sungah do awlo dingin ralthuamkai pawl dilnak an nei.

TNP party sungtuan Kyaw Aung cun “Khua sungih doawknak a um tikah mipi pawl khua sungah an um ngam lo ih, tlawnginn le harhdam zung pawl khal khar thluh a tul. Tlawngta nauhak zirhtu pawl khal khua dangah an tlan phah. Zarhkhat sung cawl loin an doawk tikah mipi in an tuar tuk.

“Doawknak ruangah khua sungin inn hrekkhat le pawlkom inn khal a siat phah. Curuangah ralthuamkai pawl cu zangfahten khua sungah doawknak suakter lo dingin kan dil duh. A tul tukih khua sungah doawk a tul tengteng asikhalle pawlkom innpi, mipi inn ,tlawnginn le sizung tivek cu siatsuah lo dingah kan sawm duh a si,” tin a sim.

Shan ramkulh ahcun tlangpar ralthuamkai pawlkom tamzet tlunah PDF khal an um ih, hmun tinkim ah doawknak a um ve. Khatlam ah ralhrang do siloin mah le mah doawknak caan an nei theu. Tuitum Palaung hmunram ih doaw cu KIA, PDF le ralhrang pawl an si.

EU In NUG Pom Dingin An Nor – Myanmar ram a buainak kum 1 le hrek a luan zo nan, tuini tiang cu UN, US, UK le ASEAN ram pawlin Myanmar ram buainak ah ziang cozah kan pom timi an relfiang thei hrih lo.

Curuangah Europe pawlkom EU cun ASEAN pawlkom hnenah Myanmar cozah hrang NUG cozah pom dingin sawmnak an nei. ASEAN pawlkom ahcun ram 10 an tel ih, ASEAN in Myanmar cozah ah NUG an pom asile ASEAN meeting ah NUG an kai thei ve ding. Asinan, tuini tiang cu ASEAN pawlkom in Myanmar cozah ah ziang kan pom timi thusuah felfai an nei hrih lo.

Eu pawlkom ih hotu sangtu Heidi cun “Myanmar ram buainak ah ASEAN cun remnak 5 a tuahpi nan,tuini tiang ralhrang lamin pakhat hman an pitlin duh lo. Curuangah Eu pawlkom cun Myanmar ram buainak ah lamzin dang dap dingin ASEAN pawlkom kan sawm duh. Cumi tlunah NUG cozah khal Myanmar cozah khal pom dingin kan sawm duh fawn.

“US siseh kan tuanpi ram pawl khal ralhrang pawl hremnak pe sinsin dingin kan sawm duh. Hmuar nei sawn ih kan cangvaih lo ahcun Myanmar mipi hrang kan buaipimi pawl hi zianghman lo ah an suak ding. Ralhrang pawl khal an cangvaih dan bansan hngal dingah kan sawm duh. Ralhrang pawl an lamzin pit sinsin dingin hremnak kan pek bet vivo a tul a si,” tin a sim.

NATO In Nuclear Zohsinnak An Nei Ding – NATO pawlkom cun a hlanih an rak relcia zo bangin Nuclear bomb zohsinnak an neih ding thu an sim ih, zarh khat sung caan an hmang ding.

Nuclear bom zohsinnak ti asinan, a bom taktak cu tham loin Nuclear hman a tul caan ih an hmanrua , mawtaw, lawng, vanzam le Nuclear lu phurtu lawngpi pawl zohfelnak an nei ding. NATO pawlom ih Nuclear thilri an zohfeknak ding hmun cu Russia ram thawn KM 1000 lawng a hla.

NATO sungtuan cun “Russia in Ukraine an do hlan ihsin kan rak relfel ciami a si ih,Russia in Ukraine an do ruangah kan rel ciami pawl kan thulhsalnak ding san a um lo. NATO pawlkom ah ram 30 kan um ih, cumi lakin tuitum Nuclear thilri zohfelnak ah ram 14 kan tel ding, Cukhal a hlanih kan rak relfel thluhmi an si,” tin a sim.

NATO pawlkom ah ram 30 an um nan, pawlkom hmin ralthuam tivek an nei lo ih, NATO hmin an cangvaih ding asile pawlkom ih tel pawlin ralthuam le ralkap an thawh theu. Tuitum ih Nuclear ralthuam an zohfel dingmi khal American, UK le France ram pawlih neihmi NUclear thilri a si.