Tamu Ah Ralhrang 30 An Thi – Sagaing ramthen Tamu peng khawhmunnuam le Wit ttuk khua kiangah ralhrang ralkap mawtaw bomb puah a si ih, ralhrang 30 hrawng an thi tin Tamu PDF tatyin 3-nak hotu cun Mizzima a simthei.
Tamu PDF hotu cun “Bomb kan kam ciami kulhsungah ralhrang pawl an lut fuh ih, cumi laifang ah bomb kan puah. Bomb puak ruangah mawtaw ih thi ralhrang pawl cu mawtaw in an thla ih, hriam ngah pawl cu wit Tuk sakhan ah manhlap thu in an tuamhlawm rero lai a si,” tin a sim.
June 27, zinglam nazi 8:56 hawngah mipum 100 hrawng umnak ralhrang ralkap mawtaw tlar aw cu Tamu in Kalaymyo lam an tlun zinah bomb an rak puah. Ralhrang ralkap mawtaw pawl cu Khawhmunnuam le Wit ttuk khua karkal ah bomb puah a si ih, ralhrang 30 hrawng an thih tlunah hriamhma ngah tampi an um tin khuami pawl khalin an sim ve.
Ralhrang mawtaw bomb puah a si tlunah thi le hriamhma ngah an tam tuk cu ralhrang pawl an tuarna tukih,ralthuampi in mipi umnak Wit ttuk khua an kap ciamco tin an sim.
Ralrang ralkap pawl cu June 26 ah Tamu an suahsan zo ih, Khawhmunnuam khua ah zan an riak hmaisa. Curuangah Khawhmunnuam khuami pawl cu khua ah um ngam loin an tlan thluh ih, ralhrang pawl cu khawsung ah duhtawk in an cangvai. Mipi inn an bauh ih, mipi vulhmi ran khal an that , an ei ih, an rak cen ciamco tin khaumi pawl cun an sim.
Ralhrang In A Hngawng In An Sat Tan – A tufang ralhrang ralkap dinpitu pawlin video rapthlak tuk an thlah reromi cu felfai in zingzoi a si tikah ralhrang pawlin CDM bawmtu an that a rak sisawn.
Ralhrang dinpitu pawl cun PDF pawlin dalan tin nunau pakhat rapthlak tukin an that, anmah cu dalan thianfaitu pawlkom an si tin an thlah rero. Asinan, thudik theihsuak zo a si.
Makui ramthen Myaing myone Ciansik Kyi khua ih um lamzin hnatuan Mah Nanda cu CDM palik a humhim ruangah ralhrang ralkap pawlin an kai ih, Pyu Saw Htee pawl an thatter.
Myiang PDF hotu cun “Ciansik Kyi khua ih thleng CDM palik Zaw Lin Aung cu Mah Nanda in a rak thupih , CDm ralbawi a luat phah. Cucu, neta ah ralhrang pawlin an theih tikah Mah Nanda an kai ih, a hngawng sat tan in an that. Khukbil in an umter ih, a dunglam in Pyu Saw Htee pakhat cun nam in a hngawng a sat tan, A rapthlak tuk lawlaw ih, zoh ngam ding ci khal a silo.
“CDM palik Zaw Lin Aung cu Tayet khua palik hmunin CDM tuah a si ih, palik sakhan suahsan in a tlan hnuah a suahnak khua Ciansik Kyi khua a pan. Cucu, Yangon in Ciansik Kyi khua thleng ve Mah Nanda in a rak humhim ih , CDM palik Zaw Lin Aung a luat phah. Ralhrang pawl cun Mah Nanda cu thu felfai khal sut nawn loin Pyu Saw Htee pawl an thatter men.
“Thilthlennak hmun cu Myaing myone le Yesakyo karlak ramri a si. Mah Nanda lawng siloin midang khal ralhrang pawlih thahmi an um. Tuih video darhsuak cu anmah ralhrang ralkap pawl record mi a si ih, mipi pawl zoh dingah an darhter hrim. An duhmi cu midang pawlin hivekin CDM palik siseh CDM ralkap khal bawm ngam nawn hlah haiseh timi an duhsan siko.
“Mah Nanda thattu pawl cu Myaing palik sakhan ih um pawl le Kanni khua, Tayet khua le Watpuak khua in Pyu Saw Htee pawl an si. A thok ahcun PDF pawl puhsual duh ruangah an darhtermi a sinan, mipi in thudik a rak thei cia thluh zo sawn. Myaing myone sungah ralhrang in Pyu Saw Htee pawlkom 6 an din ih, ralthuam 120 hrawng an pe zo a si,” tin a sim.
Veng Uktu Nupa le Pyu Saw Htee 2 An That – Pago ramthen ကြို့ပင်ကောက် myone Kyauk Sayik kung khua ih venglal nupa le Pyu Saw Htee 2 cu June 27 zan ah kan that fel tin Cuhpinkauh PDF cun thu an suah.
Ralhrang ralkap cun Pago zumah thawn pehmi khua 20 ah mipi ralkap din an tum ih, Pyu Saw Htee 2 cun mipi an sawmkhawm rero. Cumi ruangah Pyu Saw Htee 2 le mipi meeting kotu veng uktu nupa cu an that.
Cuhpinkauh PDF hotu cun “Zan nazi 8 hrawng a si ih, veng uktu inn ah meeting an nei. Cucu, thuhla felfai zetin kan ngah ih, veng uktu inn cu kan luhcilh hngal. Veng uktu U Hla Kyi le a nupi Daw San Myint , Pyu Saw sungtel U Win Myint le U Khin Zaw pawl cu inn sungah kan that cih.
“Veng lal tei nupa cu ralhrang lamtang an si ih, mipi an hro ringring. Ralhrang pawl khua ih an rat caan khalah an rak tlon ,rawl an rak dar theu. Pyu Saw Htee sungtel pahnih cu hramlak thupten feh in PDF pawl umnak tiang zingzoitu an si ih,vei 3 rori ralrinnak kan pe zo nan, an thlun lo ruangah kan ret tha lawlaw a si,” tin a sim.
Chuang Oo Ah Ralhrang Mawtaw Bomb An Puah – Sagaing ramthen Chuang Oo myone Guipinttaw khua kiangah Mungzua lamin ra ralhrang ralkap mawtaw 2 cu June 28, zanlam nazi 5 hrawngah Chuang Oo PDF in bomb an rak puah ih, ralhrang 7 an thi tin thu an suah.
PDF pawl cun ralhrang ralkap mawtaw pahnih cu Paditar bomb in an rak puah ih, ralhrang mawtaw pakhat a siat tin an thusuah ahcun an tarlang tel.
MRA hotu cun “Kannih cu ralthuam nei tha lo sawn, mipum malsawn kan si timi kan thei aw tukih kan himnak kan ruat hmaisa ringring. Ralhrang pawl do dan thabik cu an ratnak ding lamzin ah bomb kam ih puah a si ih, cuvek ah ralhrang thi an tam thei ngaingai.
‘Cuti siloin hmaiton ih doawk ding cun kan ralthuam le mipum in a tlin lo. Curuangah,ralhrang pawl cu thupten kan do hrih. Bomb kan puah ngah fel tikah kan himnak hrang dungsip cih a tul theu. A caan ahcun bomb kan puahmi dinhmun ih zirin tawkfang nawn meithal in kan kap bet ciamco theu a si,” tin a sim.
NUG In CDM Ralkap 18 Laksawng An Pe – NUG cozah cun mipi lamtang ralkap pawl lakin ralthuam famkim thawn mipi lamtang ih pe aw CDM 18 pawl laksawng an pe hai ih, laksawng a pekmi zaten ting 344 a kim thu an tarlang.
NUG cozah in CDM tuah ralkap pawl laksawng a pekmi ah Bohmu pakhat, Bokyi pakhat le Bo pakhat pawl an telih, an zaten ralthuam famkim thawn mipi ralkap hnenih pe aw an si.
Mipi ralkap PDF pawl khalin an hnenih pe aw ralkap lakin ralthuam famkim tlanpi thei pawl cu mi pakhat ah ting 50 tiang pek an tiam ih, ralthuam famkim thawn PDF hnenih pe aw pawl cu a takin laksawng an pe ve. NUG cozah cun CDm tuah ralbawi pawl thawn ralkap le Palik pawl CDm tuah dingin an lem rero ih, lamzin an hawlsak.
Cuvek caan ah ralthuam famkim thawn tlan ih, CDM tuah pawl cu laksawng an pekmi a si ih, CDM ralkap 18 hrang ting 344 an pek thu an tarlang. Tufang ah meithal zunkhat ting 50 lai a man ih, ralthuam famkim thawn CDm tuah pawl cu laksawng pek an phu tuk ko tin mipi lam khalin an sim ve.
Mawtawpi Sungah Mithi Ruang 46 An Hmu – American, Texas ramthen San Antonio lamzin zir ih mawtawpi sia retmi ah mithi ruang 46 sar an si ih, thupten American ih lut an siko ding tin an sim.
Mawtawpi sung ahcun nauhak 4 telin mi 16 pawl cu Mawtaw sungah nungdam in an rak umlai ih, tuanvo neitu pawlin zamrang zetin sizung an fehpi. June 27, zanlam nazi 6 hrawngah kiangkap mipi cun mawtawpi sungin thawngvang auaw an thei ih, an zoh tikah mawtawpi sungih hrantang pawl an hmu ih, palik an theihter cih.
Sizung ih an kuatmi nungdam lai pawl an zohfel tikah thawsa tuk ruangah le thaw thawt ding nei lo ruangah buai an si ih, mithi pawl khal ei ding nei lo, thawsa tuk le thawhip ding harsat ruangah thi an siko ding tin an sim.
San Antonio khawpi cu American le Maxico ramri peng 150 hrawng hla ih um a si ih, Mexico lamin thupten American ram sungih lut an tamnak hmun pakhat a si.
Leave a Reply