NUG In Daw Suh Kyi Ih Inn An Ham – Ralhrang ralkap in Daw Suh Kyi an kaih sungah a tapa pakhat US ih um cun Daw Suh ih inn a rak cuhbuai ih, inn zuar ih a man then aw dingin Court ah a thehlut.
Court ih thubuai thehluhmi cu ralhrang danthiam pawlin an rel fel zo ih, innpi cu zuar si sehla a tapa duhdan vekin a man then aw ding an si tin thu an rak suah zo. Hivekin ralhrang Court in Daw Suh Kyi inn parih thu an then tikah NUG lam an tongsuak ve ih, Daw Suh Kyi ih inn cu Cozah ro ah an ret.
NUG cun “Yangon Bahan myone ih Daw Suh kyi innpi cu rampi ro ah NUG in kan ret. Curuangah zokhalin rampi ro ih kan ret zomi innpi ah thu an nei thei lo ih, an zuar thei lo tlunah an siat thei lo. Zuar tumtu an um asile zuar thei lo dingin kan kham ding.
“Thu kan suah zo bangin thu kan suahmi thlun lo ih, innpi zuar tumtu, innpi siatsuah tumtu, innpi thleng tumtu tivek an um asile daan vekin kan cangvaih ding tlunah Black list ah ret an si ding,” tin thu an suah.
1947 kum ih Bochuk Aung San an thah hnuah a nupi Daw Khin Kyi cun a fate hmeihpi in innpi a luah peh ih, 1999 kum ah Daw Khin Kyi a thi ve. Cumi hnuah Daw Aung San Suh Kyi cun innpi a luah peh ih, NLD party ah himi innpi ah a rak din. Ralhrang in kum 15 sung inn ih an rak khum khalah tuitum a inn hman a si.
Yangon Ah Arti Man Ol Lei An Cuh Aw Ciamco – Myanmar ram buainak ah thilri man zaten a let a letthum tlukin a kai thluh ih, nitin eihawl hrang nikhat rawl ei ding hman an buai thlang. Hivek a si ruangah Arti le fangfai man ol ih an zuarmi khal lei an cuh aw ciamco.
Yangon Tharketa myone Ahmat 4 vengah milian pakhat cun arti pum 10 ,kyat 100 , fangfai pikhat kyat 100 in a zuar ih mi tampi arti le fangfai man ol lei dingin an tlar aw.
A leitu pakhat cun “Arti le fangfai man ol in an zuar ding timi thuhla kan rak thei ve ih, kan feh tikah mi an rak tlar aw thluh zo. Arti pumkhat 250, fangfai pikhat 1600 a si tikah arti pum 10 kyat 100 , fangfai pikhat kyat 100 ih an zuarmi cu lei ngah rori kan duh ve. Hivek bomnak cu kannih mirethei pawl hrang a tangkai tuk rori a si,” tin a sim.
Covid 19 natnak in nasaten leitlun a rak nuai ih , leitlun ram tampi an buai phah. Asinan, tu ahcun covid 19 natnak cu leitlun an do neh rero thlangih, ram tamsawn tla cu zalen zetin an um thei zo.
Myanmar cu covid 19 natnak a reh hnu khalah rampi buainak a suak betih, mipi an harsa deuhdeuh. Rampi a buai tikah thilri man a kai thluh ih, lo hnatuan thei lo khal an tam. Nica ih hlawh aw pawl an buai ih, Yangon ahcun nikhat rawl veikhat lawng ei man an um rero zo.
Tu ah kan ram boruak a tha thei hrih lo ih, thilri man khal a kai peh rero. Ramsung in ramleng ah thilri a suak thei lo ih, Myanmar tangka in manmual a nei lo deuhdeuh. Cutikah mipi khal an buai phah thluh ih , ei ding harsa tampi an um zo.
KNU Hotu In Ralhrang Remdaihnak Pawlkom A Basan – Ralhrang ralkap cun tlangpar ralthuamkai 10 pawl cu rampi buai hlanah remdaihnak hrang NCA hmihkhen a rak nganpi ih, NCA hminkhen sungih tel pawl cun remdaihnak hrang PPST pawlkom an din bet.
PPST cu tlangpar ralthuamkai le ralhrang karlak ah remdaihnak um dingin tanlatu an si ih, anmah hoha dingin KNU hotu bik Saw Mutu Seiphaw an rak biak. A thok ahcun KNU hotu Saw Mutu Sephaw in a rak pomsak lawk nan, tu ah remdaihnak pawlkom hotu sinak a laksal lo ding thu an suah.
KNU hotu bik Saw Mutu Seiphaw cun “August 4 ah remdaihnak pawlkom PPST ah hotu si dingin sawmnak ka dongih ka rak cohlang. KNU theipinak tel loin keimai bulpak thu ih rak cohlang ka rak si. Asinan, August 30 ah KNU pawl meeting kan neih ih, PSST hotu si dingin kan rak pom zomi cu tuanvo ka lasal lo ding tin thu felfai ka tuah zo.
“KNU ih hotu bik kei cun Democracy cohlangtu ka si ih, KNU in daan an neih thlun ding khal ka tuanvo a si. Curuangah PPST in anmah hoha dingih in rak dil caan ah ka rak pomsak nan tu ahcun khami lai ih ,ka rak pomsakmi ka a hnuk kirsal timi ka lo theihter duh a si,” tin ca a suah.
Leave a Reply