NUG In Meithal 50 An Pe – Karan ramkulh Kawh Kareih myone sungih nasaten ralhrang ralkap do rerotu Cobra miraltha pawl hnenah NUG Prime Minister cun meithal zun 50 le tangka ting 10 kyats a hlan.
KNU hmunram 6nak sungah Cobra cun raldo zirnak thehsuak pawl December 25 ni ah sunloihnak an pe ih, cumi ahcun NUG cozah in prime Minister Man Win Khai Thann in a telpi tlunah, raldo dan zir theh pawl cu ralhrang donak ah tin meithal zun 50 a hlan ih, Cobra pawlkom hnen khalah tangka ting 10 kyat a hlan.
NUG Prime Minister Man Win Khai Thann cun raldo zir theh Cobra pawl hnenah NUG ih cangvaihnak, ralhrang an do dan, UN lamih an zuamnak pawl simfiangnak a nei cih ih lungrualten ralhrang dotlang dingin sawmnak a nei. Cumi hnuah raldo zirnak nei theh pawl hnenah meithal zunkhat hnu zunkhat a hlan vivo ih, meithal zun 50 a hlan fel tin NUG cun mipi theihternak an nei.
Cobra miraltha pawl hi ralhrang in rampi thuneihnak an lak hnuah dingsuak pawlkom an si ih, Karen ramkulh Kaw Kareih myone sungah theitawk in ralhrang ralkap do rerotu an si.
Ralhrang In Mipi Bomb An Thlak Ih 4 An Thi – Makui ramthen Saw myone Ngiokan khua cu ralhrang ralkap in December 26, sun nazi 2 hrawngah raldonak vanzam in bomb a thlak ih, mipi 4 an thih phah tin khuami pawl cun an sim.
KHuami pakhat cun “Doawknak a um lo. Cuti cingin ralhrang ralkap cun raldonak vanzam thawn vei 2 bomb an ra thlak. Hmaisa bomb a thlak hnuah a ra kirsal ih avei hnihnak bomb in thlaksal. Kan khua kiangkap khalah ralhrang an um lo ih, PDF khal an um lo. Cucu, ralhrang in tlunlam in bomb in thlak ih in kap. Tutiang ahcun ralhrang ih bomb thlakmi ruangah mipi 4 an thi zo ih hriamhma ngah 7 tlun an um a si,” tin a sim.
Saw PDF cun “Saw myone Ngio kan khua cu ralhrang ralkap in raldonak vanzam thawn bomb an thlak ih mipi inn 4 a siat tlunah mipi lakin mi 4 an thi zo. Mithi cu mipa pathum le nunau pakhat an si. Ralhrang pawl cangvaih dan rapthlak ruangah mipi nan zaten hmunhim lam pan dingin kan lo theihter a si,” tin thu an suah.
Ralhrang 23 An Thianfai – Sagaing ramthen, Minkin myone, Depeyin myone, Kani myone , Mandalay ramthen Mattaya myone, Makui ramthen Maing myone pawlih doawknak ah ralhrang 23 an thi tin PDF pawl cun thu an suah.
Sagaing ramthen Minkin myone Kyaw khua ih umhmun khuar ralhrang ralkap pawl cu December 26, sun nazi 1:20 hrawngah PDF pawlin ankap ih,ralhrang 14 an thi tin Minkin pDF cun mipi theihternak an nei.
Minkin PDF thuphuangtu cun “Minute 40 sung hrawng ralhrang thawn kan kap aw. Ralhrang umnak hmun kan kap ih, ralhrang 14 an thi. Ralhrang hnenin ralthuam laksakmi khal kan nei. Tuitum ah ralhrang lawng umkhawm an silo ih, PYu Saw Htee pawl thawn an um tlang. Curuangah mithi lakah Pyu Saw Htee pawl khal an tel ve. Ralhrang thi pawl cu kan mithmuh an si. Doawknak ah Kanmah PDF lamin mi pakhat hriamhma ngah a um ve a si,” tin mipi theihternak an nei.
Sagaing ramthen Depayin myone Depayin khua in suak ralhrang ralkap pawl cu Depayin PDF pawlin bomb an rak puah ih, ralhrang 3 an thi tin Depayin PDF cun thu an suah.
Depayin PDF cun “khawpi suak ralhrang pawl cu bomb 5 in kan rak puah. Cumi ahcun ralhrang tampi hriamhma ngah an um. Ralhrang hriamhma pawl cu ralhrnag dangin an thiar rero laiah kan kap bet. Bomb kan puahmi ahcun ralhrang hriamhma ngah an tam ih, a hnu an umkhawm laiah ralhrang pathum kan kap that a si,” tin mipi theihter.
Sagaing ramthen Kani myone khalah lawng parih um ralhrang pawl an kap ih ,ralhrang thi an um thei nan, a zat an fiah thei lo thu Kani pDF lam cun an sim.
Sagaing ramthen Maing myone Phuangkhuai khua khalah ralhrang mawtaw bomb an puah ih, ralhrang 6 an thi tin Pakukko PDF cun an sim.
Pakukko PDF cun “December 26, sun nazi 12 hrawngah Maing myone Phaungkhuai khuai ih umhmun khuar ralhrang ralkap thawn kan kap aw ih, ralhrang hriamhma ngah an tam. Ralhrang hriamhma ngah pawl cu mawtaw in an phur ih, bomb kan rak puah bet. Cumi ahcun ralhrang 6 an thi. Kannih PDF lam cu kan him a si,” tin thu an suah.
Mandalay ramthen Mattaya myone Mayabin khua kiang khalah ralhrang mawtaw 2 bomb an puah ih, ralhrang thi an um thei nan,a zat an fiah thei lo thu Mataya PDF lam cun an sim.
Ralhrang In Daw Suh Thu An Relfel Ding – Ralhrang in rampi thuneihnak an lak hnuah Daw Suh Kyi cu thubuai 19 an tuahsak ih thubuai 14 hrang kum 26 sung thawngtla dingin hremnak an pe zo. Tu ah Daw Suh Kyi ih thubuai dang 5 pawl cu Court ah rel peh rero lai a si ih , tuikum sungah ralhrang lamin Daw Suh KYi ih thubuai tanglai pawl khal an relfel thluh thlang ding tin sihni pawl cun an sim.
Daw Suh Kyi ih thubuai relfel hrih lomi pawl cu December 26 Court ni ah an relfel thluh ding ih, Court cun December 30 ah thunetnak an tuah ding thu a rak sim. Tu ih thubuai an rel rero laimi cu eiruk thubuai 5 a si ih, Daw Suh Kyi in cozah sumpai hmangin Helicopter a rak lei, a rak sang, dik lo ah tangka a hmang tin ralhrang pawl cun an puh. Daw Suh KYi cun dik zetih sumpai a hman thu le eiruknak a neih lo thu Court ah a sim rero ve zo. Court in ziangtin thu a then ding timi cu buainak dang aum lo asile December 30 ah a fiang thlang ding.
Ralhrang ralkap cun rampi thuneihnak an lak hnuah president U Win Myint ah thubuai 8 an tuahsak ih , thubuai 3 hrang kum 5 sung thawngtla dingin hremnak an pe zo. Tu ah U Win Myint ih thubuai 5 khal Daw Suh ih thubuai tanglai thawn a bangaw ih December 30 ah relfel ve ding a si.
Rohingya 57 An Runsuak – Indonesia tipi kap ah Rohingya rilrawng hrantang mipum 57 runsuak an si tin Indonesia cun thu an suah.
Rohingya pawl cu thla 1 zik lawng parah um zo an si ih, rawl ei loin caan tamzet an um zo. An lak ahcun mipa, nunau le nauhak tiang an tel. An lawng tomi a siat ruangah Indonesia tipi kap an pan. A tamsawn cu caurau thluh zo an si ih, sizung panpi hngal an si.
Rohingya pawl cu Bangladesh Rohingya hmunpi in hmundang beisei ih tlansuak pawl an si. Bangladesh ah Rohingya tamzet raltlan an um ih, an lakin Rohingya tamzet cun Malaysia le Indonesia an pan thup rero ih,tipar ah cangsual in Rohingya tampi thih phah khal an um zo. Rohingya miphun pawl hi ziang ram khalin an pom lo ih ram nei loin vak tawi rero miphun pakhat an si.
Vur Thli Ruangah Mi 38 Thi Thlang – American le Canada ah Vur thli a hrang peh ih, tutiang ah Vur thli ruangah mi 38 an thi zo tin tuanvo neitu pawl cun an sim.
American ahcun Vur thli ruangah mi 34 an thi zo ih, New York ah vui thli a hrang nasa bik. Canada ahcun vur thli hrang ruangah mawtaw zin hmu thei lo a letih a sungih to mi 4 an thi.
American le Canada ih vur thli hrang ruangah mi tampi hmunhim ih tthawn phah an um vekin hmun him deuh ih um pawl khal lengsuak ngam loin innsung ih khum aw khal an tam.
Mibawmtu palik pakhat cun “Mithi kan relmi pawl hi ka rel hnakin tam khal a si thei. Zin tampi feh theih loin vur a khat thluh ih inn tampi vur thla ruangah siat phah khal an um. Mipi tamzet harsa in buai an um ih, theitawkin runsuah hna kan tuan peh rero lai a si,” tin a sim.
Japan ram khalah Vur thli an rak tuar nasa tuk ve ih, tutiang ah mi 14 an thi zo ih, mi 87 hrawng hriamhma ngah an um tin Japan thuthang NHK cun a tarlang.
Japan ahcun tipi kap ih um pawlin December 17 lamin vur thli an rak tuar zo ih, December 24 ihsin meisa ngah lo an um. Curuangah ,Japan cozah cun vur thli a hrannak hmun pawl ahcun tul lo tukah lengsuak lo dingin mipi theihternak an nei.
Leave a Reply