NUG In Mipi Ngaithiam An Dil

Ralhrang in rampi thuneihnak an lak hnuah mipi cozah tin dingsuak NUG cun Federal thuhla thawn pehpar aw in mipi ngaithiam an dilsal.

Kan dungah NUG cozah cun Chin ramkulh Paletwa myone cu Rakhine ramkulh Paletwa myone tin thu an rak suah zo ih, mipi lam ihsin mawhthluknak tongkam nasa tuk a um ruangah, NUG cun mipi ngaithiam an rak dil ih, kan ngansual pang rori a si tin ca an suah.

Asinan, chin mipi tamzet an riahseter man ih, hrekkhat tla cun an tisual siloin AA tlonnak ah NUG lamin an ngan hrim siko ding tin NUG mawhthluk pehtu khal an um.

Tu ah NUG cozah cun Federal Democracy uknak thawn pehparmi May 11 zingah ca an suah ih, mipi ngaih dan a silo lala. NUG cun Federal uknak khalah ramsung hmunpi 14 thotho a um ding tin an tarlang ih, ramthen le ramkulh aiah a zaten Pidaw timi hmunpi an hmang.

Umdan cu Chin ramkulh ti nawn loin Chin pidaw, Yangon Pidaw, Sagaing pidaw, Kachin pidaw tivek in an thleng men. Hivek a si tikah mipi an lungawi lo zetih, NUG le ralhrang khal mibang aw, hnakphek hring le hnakphek sen vek rori an si timi tongkam a tam.

Mipi tongkam a tam tuk hnuah NUG cun Federal uknak thawn pehpar aw in thu kan suahmi cu nemhngetmi a si hrih lo ih, ruah dan , tum dan le mipi ruahnak lakkhawmnak hrang kan tarlangmi a si. Federal Democracy ukawknak dan cu neta ah felfai zetin ruat fel le relcat a si leh ding tin mipi ngaithiam an dil ih, Official thusuah asilo thu an tarlang.

NUG Ramdang Vuanci Washington A Thleng – NUG cozah in ramdang vuanci Daw Zin Mar Aung cu May 11 zingah, washington khawpi a thlengih, American cozah hruaitu pawl le ASEAN pawlkom sungtel pawl a kawm ding tin NUG ASEAN palai u Bo Hla Tin cun RFA a simthei.

NUG ASEAN palai U Bo Hla Tin cun “Ziang thuhla an rel ding timi cu mipi theihter a thiang hrih lo ih, ka relsuak thei hrih lo. Neta ah mipi theihternak kan nei leh ding a si,” tin a sim.

May 12 le 13 ah US president Biden hohanak in Washington ah ASEAN pawlkom le US cozah an kom aw ding. Cumi hrang US cun ralhrang hotu Min Aung Hlaing siseh ralhrang palai khal an sawm lo.

NUG cozah in ramdang vuanci Daw Zin Mar Aung teh US le ASEAN pawlkom meeting hrang sawmmi a si maw timi cu US cozah lamin an rel duh hrih lo ih, neta ah thu felfai nan thei leh ding tin Media pawl an sim men. Daw Zin Mar Aung cun Washington ah US cozah hruaitu pawl le ASEAN palai pawl a kawm ding tin NUG lam cun an sim.