Sagaing ramthen sungih dothlengnak tuahtu PDF lakah mah le mah thahawknak a rak thleng pangih, NUG lam cun mai PDF pi thattu pawl cu an ralthuam hlihsak hmangin hremnak an pek thu mipi an theihter ih, a takin an ralthuam hlihsak dingah an zuam rero lai.
NUG cozah cun “2021, November 26 ah Sagaing ramthen Yinmarpin myone sungih cangvai UVF pawl cun damlo phurtu mitat 4 pawl an kai ih, CDM tuah tumnak an neih lo ruangah le lamzin an fehnak zuk pawl an neih ruangah tin an kai ih an hotu cun a khumter hai.
“Kaihmi 4 pawl cu misual an silo timi simfiang dingin Hero Tiger hotu le a kuthnuai 5 pawl cu Yinmarpin UVF hnenah an feh ih, mitat an kaihmi 4 pawl thlah zalen sak dingin an va dil. Asinan, mitat 4 siseh Hero Tiger pawlkom 6 pawl khal pehtlaih theih an si nawn lo ih an hlo thluh. Curuangah an sungte pawl cun 2021, Demcember 11 ah NUG hnenah an hek.
“Yinmarpin ahcun 2021 April 2 in ralhrang an do thok zo. Ralhrang pawlin Daiziarten lamzawh duhphorhnak nei mipi pawl ralthuam hmangih an thekdarh hnuah khua 80 sungin United Villages Force timi UVF an rak din. Cumi ahcun Tan-mah-nih timi cu an hotu lar a rak si. UVF ahcun Hero Tiger le Bo hnaga dungthlun pawl khal an tel.
“Neta ah an thu a rual aw thei nawn lo ih, Hero Tiger pawl cu UVF in an suak ih, pale myone ah Bo hnaga ralkap pawl thawn an tuantlang sawn. UVF hotu Bo Tan-mah-nih le NUG cozah cu 2021 june thla in kan rak be aw zo. Kan biakawk dan ih zir in Yinmarpin PDF le pah-khah phah din dngin hram kan thok.
“Yinmarpin PDF cu 2021, September thla ah din a si ih, Pah-khah-phah cu October thla ah din a si. An dinmi PDF le pah-khah Phah pawl a fel maw tin kan cek rero laiah mah le mah thahawknak thubuai hekmi kan dong. Curuangah thubuai zingzoitu ding pawlkom kan rak din.
“Zingzoitu pawlkom cun UVF hotu Bo tanmanih, Bonaga le dohthlengnak ih hotu pawl thu an sut vivo. Heknak ca vekin rinhlelhmi pawl cu hmaiton ih thusut dingin ko dingah zingzoitu pawlkom cun an lungkim. Zingzoitu pawlkom cun mithi 11 pawl ih sungte pawl, khua upa pakhat, rinhlelh 3,a dang mi 7 tin mi 23 pawl thu an sut.
“Rinhlelh 4 Bo tanmanih, Taih Kaung, Maung OO le Yelay lakin Taih Kaung cu an ko rero nan, a suak duh lo. Thu kan suhmi pawl hnenin mawhphurhtu bikih an relmi Saya San le Aung Zaw an si ih, an umnak hmunram ih doawknak a sosang ruangah thusuh an harsa ih, daan vekin thusuh an si theinak dingah thuron pek an si.
“Thu kan suhmi hmangin kan theih dan vek asile UVF le Hero Tiger pawl hi anmahten buainak an neih zo ruangah cumi lungawi loin UVF pawl cun Hero Tiger sungtel 6 an rak that lawlaw timi kan theisuak. Hero Tiger pawl cu mipi humhim ih ralhrang do taktaktu an si. Mitat 4 pawl khal dik lo zetin an puh hnuah UVF pawlin an that timi a lang.
“Nasaten zingzoi a si hnuah mi 11 thattu pawl cu Yinmarpin humhimtu lakin tatyin 4-nak ih hotu pawl an si hmel. Cumi ahcun Saya San le a rualpi pawl cu mawhphurtu bik an si in a lang. Curuangah an duh lo khalle rinhlelh pawl cu a takin thusuh rori an tulih,cumi hrang kan zuam hrih.
“PDF lakah hmunram cuhawknak , NUG hnenin ralthuam ngah dingih cuhawknak ,ralthuam then-awk ding ruangih buainak tivek a tam ih, cuvek pawl cun buainak rapthlak a thlen theu timi khal tuitum ah kan hmu thei. Curuangah PDF pawl hremnak pe theitu pawlkom dinfel a tul. Mipi lak khalah mipi ralkap zum nawn lo vekih thei aw an um rero thlang.
“Curuangah, tuitum ih sualnak tuahtu, mai PDF pi thattu pawl cu PDF ah ret an si nawn lo ding. Sual tuahtu pawl ih kenmi ralthuam zaten zamrang thei bikin laksak dingah kan cangvaih hngal a tul. Sual tuahtu ih tel lo PDF pawl cu an hna keel peksal ding an si. Sual tuahtu pawl an thuhla relfel a si theinak dingah thawnginn thuthentu kan din lohli a tul. An thahmi Hero Tiger pawl cu PDF ah kan phuangih, an sungte pawl khal zangnadomnak tangka kan pe ding a si,” tin NUG cozah cun thu an suah.
Leave a Reply