Ralhrang In Daw Suh Kyi Hremnak An Pe Bet – Ralhrang ralkap cun 2020 rampi hrilawknak dan thawn pehparaw in thubuai an tuahsakmi Daw Aung San Suh Kyi ih thuhla cu September 2 ah relcatnak an nei ih, kum 3 dang thawngtla dingin hremnak an pe bet.
Ralhrang ralkap cun thubuai 10 hrang Daw Suh San Suh Kyi cu kum 17 sung thawngtla dingin hremnak an rak pe zo ih, tuitum ah hremnak kum 3 dang an pek betmi thawn ralhrang in Daw Suh Kyi an hremnak zaten kum 20 a kim. Tuitum ih kum 3 hremnak an pek betmi cu 2020 rampi hrilawknak ah diklonak a um ih,cumi mawhphurtu lakah Daw Suh Kyi khal a tel ve tin ralhrang cun thbuai an rak tuah. Cucu, tu ah um 3 sung thawngtla dingin hremnak an pe.
Ralhrang ralkap cun rampi thuneihnak an lak hnuah Daw Aung San Suh kyi cu thubuai 19 an tuahsak ih, tu ah thubuai 11 hrang kum 29 thawngtla dingin hremnak an pe zo. Thubuai 8 cu Court ah rel peh rero an si hrih.
Daw Aung San Suh Kyi cu Nyipidaw thawnginn sungah a hranten khum a si ih, ralhrang in rampi hruaitu pakhat a sinak vekin an ret tha lo, a umnak room khal a tha lo, sangka khar khal a um lo tin amah buaipitu pawl cun an sim.
Ralhrang In Youtube Aiawh An Buaipi – Ralhrang ralkap cun Youtube ih an thuthang an thlah thei lo ruangah Mtube Live Streaming Platform an buaipi rero lai thu mipi an theihter.
Ralhrang ralkap cun “Youtube ih thu kan thlahmi pawl cu in hlonsak ringring ih, curuangah a aiawh a dang kan buaipi. Kan tawlrelmi cu Mtube Live Streaming Platform a s ih, leitlun mifim pawl than kan buaipi rero lai. Hman a theih veten mipi kan lo simthei cih ding a si,” tin mipi an theihter.
Yangon ih mithiam pakhat cun “Tuih ralhrang tummi cu anmah lam diknak pholang a sibik. Dothlengnak cokbuai an tumih, ramleng in anmah an ngaihsak theinak dingah thudiknak thlahnak hrang thildang an buaipi. Ziangvek khal tuah haisehla mipi thapekmi an silo ih, mipi in an hman ve lo ding tikah an hlawhtling dah lo ding a si,” tin a sim.
Tu ah ralhrang ralkap cun Facebook le Youtube hmangin zianghman thu an than thei lo ih, cumi aiah thildang hmangin lamzin an dap rero. Kan dung khalah ralhrang thuphuangtu Zaw Min Tun cun Facebook an hman thei lo ruangah Myanmar ah Facebook hmang thei lo dingin phih lawlaw an tum thu khal a rak rel zo.
Ralhrang ralkap cun thuthang thlahnak social app an neih lo tikah May 4,2022 ah MRTV app an rak tuah nan, Apple App le Google Playstore cun ralhrang MRTV app an tuahmi cu May 5,2022 ah an rak hlonsak hngal ih, ralhrang in MRTV app an tuahmi khal an hmang thei nawn lo.
NUG In Nehnak Caan An Phuang – 2021, February 1 ah ralhrang ralkap cun Myanmar rampi thuneihnak an rak la ih, ralthuam rinsan in rampi thuneihnak la an si ruangah ralhrang uknak cu ramsung hmun tinkim ah nasaten do a si.
Tu ah dothlengnak caan ah kum 1 le hrek a rei zo ih, ramsung hmun tinkim ah doawknak a um peh ringring. Ramsung hmun tinkim doawknak ahcun ralhrang thi an tam bangin mipi ralkap thi, mipi thi, innkang , khua suahsan tivek tampi an um.
Dothlengnak thawn pehpar aw in September 1 ah NUG cun mipi thusuh caan an pe ih, cumi ahcun ziangtikah nehnak kan co ding timi thusuhnak cu NUG cozah in humhimnak vuanci U Yee Mon cun mipi thusuhmi a let.
U Yee Moon cun “Ralhrang kan do dan thawn pehpar aw in ,ziangtin kan cangvai ding tivek pawl tiang ramleng siseh mipi lo simtheih dingmi kan nei. Hmaikum 2023 cu kan hrang thupi tuk kum a si. 2023 ah kannih dothlengnak pawlkom zaten kom aw in ralhrang kan do dingih, dothlengnak ah nehnak co dingin kan beisei. Cumi hrang ziangkim kan tawlrel rero zo. Kum 1 sung dothlengnak kan tuahmi kan zohsal tikah PDF timi cu ralhrang lamin duhduh in an thiatbal thei lomi thazang cakzet ralkap bur an si zo,” tin mipi a simthei.
Ralhrang ralkap cun 2023 hi remdaihnak um kum a si ding tin thu an rak suah ve zo ih, 2023 ah rampi hrilawknak tuah an tum. Culawng siloin tlangpar ralthuamkai pawl biakrem an tum ih, tutiang ahcun tlangpar ralthuamkai zaten le ralhrang an be aw thei hrih lo. Tlangpar ralthuamkai lakin pawlkom 10 lawngin ralhrang an be thei hrih.
Thuneihnak an lakmi kum 1 le hrek kum kim caan ah Min Aung Hlaing cun “Hmaikum 2023 ah rampi hriawknak nei ding kan si. Rampi hrilawknak ahcun dik zetin ziangkim fehpi a si dingih, remnak kan tuah ding. Rampi hrilawknak tuah caan ah buainak um lo dingin ziangkim kan tawlrel dingih mipi kan himnak dingah kilhim lam khal hnget zetin kan tuah ding a si,” tin thu an rak sim zo.
Myanmar Plitics thiam Than Soe Naing cun “2023 ah ralhrang lamin rampi hrilawknak tuah an tum ih, NUG cun rampi hrilawknak thlengsuak lo dingin ziangkim an tawlrel ve ko ding timi cu keimai bulpak hmuhdan a si. NUG lam rel bangin PDF zaten an kom aw thei pei maw? tlangpar ralthuamkai pawl thawn tangtlang in 2023 ah ralpi an tho taktak thei pei maw timi cu mipi thinlung luahtu pakhat a si ve ding. 2023 ah PDF pawl an kom aw thluh ih, tlangpar ralthuamkai pawl thawn ralpi an tho taktak asile ralhrang an neh rori ding timi kan zum ve. Asinan, cumi thlengsuak dingin NUG kutah ziangkim a tthum aw ve a si.
“Tui dinhmun kan zoh dan asile ralthuamkai PDF ting 1 hrawng an um dingah kan ruat. Cumi ting 1 ahcun NUG hnuai ih cangvai lo mahte rak ding PDF le dothlengnak pawlkom tampi khal an um ding. Cutikah dothlengnak cu hmuar a nei nasa ko. Tu ahcun PDF pawl ralthuam pek phah rero an si ih, an pe vivo thei dingah ruah a si ,” tin Myanmar Politics thiam Than Soe Naing cun a hmuhdan a rel.
Leave a Reply