NUG In PDF Pawl Siahkhong Lo Dingin Theihter

NUG In PDF Pawl Siahkhong Lo Dingin Theihter – A tufang ramsung hmun hrekkhat ah mipi ralkap lamin lamzin ah sumpai an khong tivek thuhla neuhneuh a suak ih, mipi khat le khat ruahdan le pomdan khal a bangaw lo.

Thenkhat cun mipi in duh vekin kan bawm silo,ralhrang lamin siah an khong ve ruangah PDF khalin siah cu khong ve ko haiseh ti ih rak theithiamtu khal an rak um. Asinan, thenkhat cun PDF le CDF tivek ih siahkhon cu rem an rak ti ve lo.

Cumi thuhla ah NUG humhimnak vuanvi zung cun “PDF le mipi ralkap pawl cu ralthuamkaitu an si ruangah mipi hnenah siah an khong thei lo. Siah khongtu ding cu kanmah NUG khalah siahkhongtu ding hrimhrim pawlkom a um. Rampi pakhat ah ralthuamkai in siah a khong ding a silo ih,siahkhong pawlkom ih khon ding sawn a si,” tin mipi an theihter.

CDF Hakha In Mipi Thuthenzung An Ong – Chin ramkulh Hakha peng sungah CDF Hakha cun mipi thuthenak zung an on thu mipi theihternak an nei ih, 2022, October 11 ihsin Hakha peng sungih thubuai pawl lai an rel thok zo thu an tarlang.

CDF Hakha cun “Dothlengnak caan sungah Hakha peng sungih mipi neihsiah, mipi covo le dik zetin lairel a si theinak dingah Kannih CDF Hakha cun October 11, 2022 ihsin Hakha peng mipi thuthennak zung kan on ih,thubuai pawl kan cohlang zo timi kan lo theihter duh. Mipi thuthennak zung kan hlon hlanih dothlengnak sung thubuai khalah kan rel peh vivo ding a si,” tin thu an suah.

A tufang Hakha peng sungah doawknak a sosang zetih, mipi cu CDF pawl hrang thlacamsak dingin an sawm. Ahleice in ralhrang pawlin timit lilawn an tuah theh zo tikah Hakha ih ralhrang pawl cu timit zinin Thantlang lamah feh vivo an tumih, Cucu, CDF in an rak kham tikah doawknak sosang a si.

Rakhine Ah Ralhrang 4 An Thi – Rakhine ramkulh Maungtaw myone Koedan kauh kiang lamzinpi ah ralhrang ralkap hrang thilri le eiin phur mawtaw pahnih cu AA pawlin an kap ih, ralhrang mipum 15 hrawng lakah ralhrang 4 an thi tin AA lam cun an sim.

AA thuphuangtu Khai Thukkah cun “Ralhrang pawl 15 hrawng an si ih, mawtaw pahnih an to. Cucu, lamlak ah kan rak kap. Cumi ahcun ralhrang 4 an thi ih, ralhrang dang 3 hriamhma an ngah. Ralhrang mawtaw pahnih khal a siat ih, an ralthuam laksakmi khal kan nei. Minute 30 sung hrawng kan kap aw ih, cumi hnuah ralhrang pawl cu dungsip in an tlan.

“A tufang doawknak a sosan tikah ralhrang pawl cun mipi rori an batih, mipi tuar ding zawng hlir in an um. Mipi umnak khua an kap ih,mipi duhtawkin an kai, an hrem. Hivekin ralhrang pawl an sual tikah an tuarsal ve rori ding a si,” tin a sim.

Ralhrang in rampi thuneihnak an lak pekah buainak nei lo AA le ralhrang cu 2022 kum cun nasaten an buai ih, Rakhine ramkulh sungah thuneihnak cotu si an cuh aw. Curuangah Rakhine ramkulh sungah doawknak a sosang ciamco sal ih, raltlan khal an tam deuhdeuh tin raltlan buaipitu pawl cun an sim.

Manipur In Ramri Ah Palik Hmun 30 An Tuah – Ralhrang in rampi thuneihnak an lak hnuah Myanmar mipi tamzet cu India lamah an tlan rero ih, thenkhat cu dik lo zetin sumdawnnak rak tuah khal an um.

Curuangah Manipur cun an state sungah Myanmar mi luhter an duh nawn lo ih, Myanmar thawn a ramri ih Check gate 30 rori an tuah tharsal tin an sim.

India lamih Myanmar ramri pawl cu Manipur, Arunachal, Nagaland le Mizoram pawl an si. An lakah Manipur le Mizoram cu Myanmar mi hrang luh olsam deuh bik a si ih, Myanmar mi um tamnak khal a si. Mizoram ahcun Myanmar raltlan pawl thaten an rak kilkhawi ih an umter nan, Manipur cun Myanmar raltlan khal an duh lo ih, an kai rero.

Tuitum ih palik Check Gate thar 30 an tuahmi ahcun Myanmar lamin dankalh sumdawnnak , rittheihsi le minung siatsuahnak thilri phunphun a lut tamtuk tin an sim ve.

Taiwan In China An El – October 16 ah Chinese president Xi Jinping cun Taiwan cu China ram sungih um hmun pakhat men an si ih, China ah thunluhsal dan ding kan tawlrel rero zo a timi cu Taiwan lam daiten an rak ummen thei lo ih,China President ih thusuak an let.

Taiwan cun “Kannih Taiwan cun China ih duhdan kan ttawmpi lo ih, mahte zalen ram kan si. Uknak le hmunram thu ah duhduh in kan ram thuhla an rel ding rem kan tilo ih, Democracy le zalennak kan zuam reromi ah dungtawlh kan tum lo lawlaw.

“Curuangah namnuaiawk lam siloin khat le khat zah aw ding, theithiam aw ton ding kan si ih, Taiwan tipi khalah remnak umseh. Khatlam a thalam zawngin thurel ih, remnak tuah ding kan si. Cuvek zawng cun China khal kan tuanpi thei tuk. Asinan, ralthuam rinsan in hmunram laksak tivek cu kan cohlang dah lo ding a si,” tin thu an rak suah ve.

China le Taiwan buainak hi a rei zet zo nan, tuini tiang cu a takin an kap aw hrih lo ih, khat le khat tongkam in hro aw, el aw rero an si hrih. China lam hrilawknak nei mai ding an si ih, hrilawknak an tuah theh hnuah zoin China president a tuan ding timi thawn pehpar aw in Taiwan le China buaiak khal tampi a thum aw tin an sim.

Be the first to comment

Leave a Reply

Your email address will not be published.


*