NUG In Rampi Huapin Ralhrang An Do Ding – NUG cun ralhrang ralkap cu ziangkim in kan do thlang dingih, kum 1 sungah doawknak kan cemter ding a si tin October 7 zan media thawn an komkhawmawknak thu an suah.
NUG cun “Kum 1 sung kan cangvaih dan ding ziangkim tawlrel fel thluh zo a si ih, kan tuanpi pawl thawn a tawp thleng dingin kan tawlrel thluh zo. Politics le doawknak ah suahnak ding lamzin hawl rerotu ralhrang pawl sangka kan on ding a silo, caan kan pe thei lo. Kan tuanpi pawl thawn cangvaihnak ding phun 6 kan rel zo ih, rampi huapin ralhrang kan do thlang ding.
“NUG in kan tummi pawl a takin kan tuah theinak dingah mipi nan thupi tuk ih, mipi cu kan cahnak nan si. Doawknak a sosan tikah mipi khalin caan harsa kan tong ding nan, lungrual zetin kan pahtlang a ttul. Hmuh theih rori in kan tummi kan thleng thlang ding.
“Mipi kan lo tiammi a um, cucu kan tuahmi ah a sannak kan hmu rori ding timi a si. Tuitum cu a tawp kharnak kum a si rori ding. A kharnak kum si dingin kan hril fel zo. Tulsammi neuhneuh pawl cu kum 1 sungah kan pitlin thluh tum ding. Mipi duhmi ralhrang uknak cemral ding cu lungrualten kan do a tul. Zoin nehnak a co ding timi khal a lang mai ding.
“Tui dinhmun ah NUG cun rampi huapin hmunram 50% tluk kan luah zo ih, tlangpar ralthuamkai pawlkom 8 thawn kan tuantlang. Kan hmunram sung ahcun uknak, daan le dun tivek khal felfai zetin kan fehpi zo. Sagaing le Makui kan thuhnuai ih um lamzinpi a tam ih, ralhrang raldonak vanzam kapsiat thei ralthuam khal hmun hrekkhat ah kan pe rero zo. 2023 ah nehnak cofel kan tum a si,” tin NUG thuphuangtu cun Media pawl a simthei.
Raltlan Thu Ah Australia Tlangsuak Upa In Mizoram Cozah A Bia – Mizoram ih Chin raltlan thuhla thawn pehparaw in Australia tlangsuak upa Dean Smit cun October 6 ah Mizoram cozah pawl a tong ih, raltlan thuhla a relpi.
Mizoram cozah cun “Australia tlangsuak upa in Mizoram cozah in tonnak san cu Mizoram sungih Myanmar raltlan pawl thuhla thawn pehparaw in a si. Mizoram ih Myanmar raltlan pawl thuhla in sut ih, raltlan pawl ziangtin kan kilkhawi tivek khalin sut. Cumi hnuah Chin le Mizo cu unau vek kan si thu khal a rak thei ih, Australia khalah chinmi an tam tuk timi a rel. Australia cozah in ralhrang pawl cangvaih dan an mawhthluk thu le Myanmar mipi an dinpi thu khal a rel. Netabik ih Mizoram cozah in sim cu Myanmar raltlan pawl thaten kilkhawi hram uh in ti. Australia tlangsuak upa cun Mizoram Chief Minister Pu Zoramthanga le YMA hruaitu pawl khal a kawm hai,” tin Mizoram cozah cun thu an suah.
Australia tlangsuak upa Dean Smith cun New Delhi ih Chinmi hruaitu pawl khal a kawm dingih, tui dinhmun New Delhi ih Myanmar raltlan dinhmun a sut fel ding tin Delhi ih Chinmi hruaitu pawl cun an sim. Australia tlangsuak upa cun India cozah ih tuanvo neitu pawl khal Myanmar raltlan thu ah a kawm dingih, thu a relpi ding.
Myanmar ram a buai hnuin Delhi ih Chin raltlan pawl cu ramdang an feh thei nawn lo ih, ramdang feh theinak visa an ngah khalle India cozah cun Myanmar raltlan pawl cu India ram suahsan theinak Exit permit a pe duh lo. Hivek ruangah Delhi ih Chin raltlan pawl an hrantang thluh ih , thuthar an nei thei lo.
Ram buai hnuih Delhi thleng Chinmi pawl khal UN card taktak pek an silo ih, temporary card lawng pek an si. Temporary card cun ramdang a feh thei lo.
Duhphorhnak Nei Hmaisabik Mino 4 An Thlah – Ralhrang ralkap in 2021, February 1 ih Myanmar rampi thuneihnak an lak tikah mipi cu tih le khur in an um ih, a thokten zohman lamzawh duhphorhnak nei an um zo.
Asinan, Mandalay ih tlawngta hruaitu pawl cun 2021, February 4 in ralhrang uknak an rak dokalh ih duhphorhnak an nei. Duhphorhnak an neih ruangah Ralhrang pawl cun an rak kai ih , thawng an rak thla. Ralhrang uknak dokalh in duhphorhnak neitu Mino tamsawn lakin thenkhat ralhrang pawlin an kai ih, thawng an thla nan, Mino pawl hmai rak hruainak cun hmuar a nei tukih Myanmar rampi huapin mipi tampi cun Lamzawh duhphorhnak an nei thluh phah.
Mipi tih le khur ih an umlai ah Dr. Ti Zar San’ cun phunsang tlawngta pawl a rak sawm ih ralhrang uknak an dokalh. Phunsang tlawngta pawl cun catar an kengih lamzin sir ah an dingtlar. An hmaiah Dr.Ti Zar San’ cun ralhrag uknak kan duh lo tin aw-ring thawn a au ciamco. A hnu reilo ah ralhrang pawl an thleng cih ih, Dr.Ti Zar San le midang pawl an tlan man nan, Min Ngyi Ngyi Kun, Saw Ukka, , Ye Win Htun le Pih Sung Aung pawl cu ralhrang ralkap pawlin an rak kai ngah ih, thawnginn ah an khum.
Kaihmi pawl cu ralhrang in kiangkap hnaihnok tin thubuai an tuahsak ih, kum 1 le thla 9 thawngtla dingin hremnak an pe. Tu ahcun an 4 in thlah zalen thluh zo an si ih, an sungte pawl thawn khalin an tong zo tin buaipitu sihni cun a sim.
Russia In Nuclear Hmang Tum Hrih Lo – A tufang Ukraine le Russia buainak tlunah S.Korea le N.Korea buainak ah Nuclear hmin a lang tam nas ih, Russia le N.Korea cun ram humhimnak ah a tul asile Nuclear khal kan hmang mai ding tin thu an rak suah.
Hivek ruangah US le NATO pawlkom cun Russia ruangah leitlun Nuclear ralpi a suak men thei,cuvek a thlen tik ahcun zohman nehtu kan um cuang lo dingih a tuartu kan sisawn ding,” tin thu an ruah rero zo.
Nuclear ralthuam rel leuhleuhtu hi Russia president Putin le N.Korea president Kim Jong Un tei pahnih an si. Asinan, Russia ramdang vuanci sungih thuphuangtu Maria cun “Russia in Nuclear kan hmang lo dingih, Nuclear ralpi kan suakter lo ding,” tin a sim ve.
Ukraine president Zelenskyi cun “Russia lam tongkam hrimhrim zum ding a um lo ih, ziangkim ah thathei bikin timtuahnak nei ding le ralring ringring ding kan si,” tin a sim ve.
Leave a Reply