NUG In Ramdang Bomnak An Dil

Pidawta Ah Ralhrang Pawl Bu An Khuar – Sagaing ramthen kalaymyo saklam Pidawtar khua ah ralhrang ralkap pawl hmun an khuar ih, ziangtik tiang an um ding timi theih a silo.

Pidawta ih um pakhat cun “Ralhrang pawl cu July 28, zanlam nazi 4 hrawngah Pidawta an thlengih, Baptist Biakinn sungah an riak. Bel le eiin hrekkhat an ken ruangah ziangtik tiang Pidawta khua ah an um ding timi cu kan thei lo ih, Pidawta khua ih an umsan khal kan thei hrih lo a si,” tin a sim.

2022, April 13 ah ralhrang ralkap le mipi ralkap komkhawm pawl cu Pidawta khawsung le a kiangkap pawl ah nasaten an rak do aw ih, doawknak ruangah Pidawta khawsung in mi pakhat a rak thi ih, PDF 4 khal an thi. Doawknak ah ralhrang 8 an thi tin mipi ralkap lam cun thu an rak suah ve.

Pidawta khawsung ih doawknak a um hnuah Pitawda khawsung ih biaknak komkhawm pawlkom cun Pitawda khawsung ah doawknak kan duh nawn lo ih, zokhal Pidawta lamzinpi nan khar lo ding, Pidawta cu raldonak hmunah nan can lo pei tin thu an rak suah.

KTV Ih Nuamcen Ralhrang An kai – Sagaing ramthen In’daw myone KTV hmun pakhat ih nuamcem ralhrang ralkap pahnih cu In’daw PDF in an kap ih, pakhat a thih tlunah pakhat nungdam in an kai ngah tin mipi an theihter.

Indaw PDF cun “July 28 zanlam ah Indaw myone Mawlu le Naba’ kiangih KTV ah ralhrang pahnih nuamcen in an um. Cucu kan kap ih, pakhat kan kap that tlunah pakhat nungdam in kan kai ngah. A remcang tikah kan kaihmi khal kan pholang leh ding a si,” tin mipi theihternak an nei.

Kan dungah In’daw PDF cun ralhrang 5 nungdam ih an kaih thu mipi theihternak an rak nei zo ih, a hnu reilo ah an kaihmi ralhrang pawl khal a zuk in an pholang thluhsal. An dinhmun tlunah poipeng a um nawn lo ding timi an fiang hnu lawngah ralhrang an kaihmi an pholang theu in a lang.

PDF Lem An Kai – Pago PDF cun tlangpar ralthuamkai pawlkom pakhat bomnak thawngin PDF lem pakhat an kaih thu mipi theihternak an nei ih, an kaihmi PDF lem cu ralhrang lamtang dalan picang a si tin an tarlang.

Pago PDF cun “Pago myone ah Civil People Defence Force cu 2021 ah an rak din. CPDF cun dothlengnak pawlkom kan si tin pawlkom hrekkhat an rak pehtlaih. Culeveten Pago ramthen sungih dothlengnak mipi ralkap pawl cu kaih an tuar rero. Neta ahcun CPDF ih hotu pakhat Hein Pih Sung cu ralhrang lamtang a si ih, PDF thuhla pawl ralhrang hnenah a rak simthei ringring timi kan theisuak.

“Hein Pih Sung cun ralhrang ralkap hnenah PDF thuhla, CDM tuahtu pawl ih thuhla ,dothlengnak hrangih sumpai thawhtu pawl thuhla pawl ralhrang hnenah a rak simthei ringring timi khal felfai zetin kan theisuak. Tu ahcun CPDF hotu Hein Pih Sung cu tlangpar ralthuamkai pawlkom pakhat ih bomnak thawngin kan kai ngah zo.

“Tu ihsin thokin zokhal CPDF pawlkom thawn pehtlaihawknak nei lo dingin dothlengnak ralkap pawl kan sawm duh ih, kaihmi Hein Pih Sung khal a tul vekin hremnak kan pe ding a si,” tin thu an suah.

NUG In Ramdang Bomnak An Dil – NUG cozah in lailak president Dula lasila cun ram mipi sawmnak a neih hnuah ramleng khal Myanmar mipi ralkap bawm dingin a theihter hai.

NUG lailak president Duwa Lasila cun “Duhdawtmi Myanmar mipi nan zaten thuneihnak atcilhtu Min Aung Hlaing le a kuthnuai pawlin dothlengnak ruangih an kaihmi mi 4 pawl an thlaithatmi ruangah mipi thinlung a dam thei hrih lo ih, mipi in kan tuar tuk. Ralhrang ralkap cun mipi zianghman ah in ruat lo ih, anmai tuahmi daan khal an thlun lo.

“Rampi hrang rinsantlak mino pawl cu sahuat in an hua ih an kaih hnuah thihdan tiang an pe men. Thihdan pekmi pawl a takin thlaithat lo dingah ramleng cun nasaten an dil rero nan, cukhal ralhrang ralkap pawlin an thlun duh cuang lo. Kiangkap venghnen ram le ramleng khal hmaisong riai loin mipi in that rero men hrih.

“Diknak hrang kekar rerotu mipi pawl in hro. Curuangah, Min Aung Hlaing le a kuthnuai pawl an damsung ahcun Myanmar ah daihnak a um dah lo dnigih, Democracy rampi kan din thei dah lo ding. Khatlam zawngin kan rel asile thuneihnak atcilhtu ralhrang pawl cun rampi an kilhim thei dah lo ding timi khal a langter.

“Mipi cun ralhrang tihnak kan nei lo ih,ziangtik hmanah kan tih dah lo ding. Dankalh pawlkom cu ziangtik hmanah kan tih dah lo dingih, hmuar nei sawnin kan do vivo ding. Kan miraltha 4 an thlaithat ruangah dothlengnak cu a sosang sinsin dingih, a tawp tiang do dingin kan zuam.

“CUruangah minungpi duhdawt zangfah lainatnak neitu UN le ramleng pawl bomnak kan lo dil. mipi duhtawkin that rerotu ralhrang ralkap pawl be lo dingin le tuanpi lo dingin kan lo simthei duh. Ralhrang ih ramleng sumlut in phihsak uhla yinan le Gas hmangih siah an neihmi khal in tawpter sak hram uh.

“NUG cu Myanmar mipi cozah tin in cohlan sak hram uh. NUG le tlangpar ralthuamkai pawlkom tangtlang in uknak kan fehpimi, raltlan kan tuamhlawmmi, fimzirnak le harhdamnak hrang khal bomnak in pe hram uh. Ralkap uknak dotu mipi ralkap hrang thiamnak, ralthuam le sumpai khal in pe hram uh tin kan lo dil.

“Dik lo zetin uknak fehpi rerotu ralhrang pawl hremnak an ton theinak dingah theitawk kan zuammi khal ramleng pawl in bawm hram uh. ASEAN khalin meeting ah ralhrang sawm hlah uhla remnak nan tuahmi 5 khal hman a tlak lo timi thei in mipi lam in bawm hram uh.

“Mipi kan zaten dothlengnak ah thadai ih ummen hlah uhsi, sosang ih tankhawh sawn ding kan si. Ramsung ramleng ih ummi Myamar mipi nan zaten dothlengnak a tawp kan thlen theinak dingah le kan tumram kan hlensuak theinak dingah theitawk suah hrih uh, bawm hrih uh.

“Dothlengnak ralkap ,mipi ralkap nan zaten lungrual zetin kekar hram uh. Fedral uknak ding mithlam in hruaitu thupek thlun thiam uhsi. Lungrualten Min Aung Hlaing thungrul thei dan dingah zuamtlang cio uhsi. Dothlengnak ih nunnak rak hlan zotu pawl ruatin theitawk suahsal uhsi.

“Tlangpar ralthuamkai unau lakin ralhrang in mi 4 an thlaithatmi duhlonak , mawhthluknak casuahtu nan zaten kan lungawi tuk timi kan lo theihter duh.A tu caan hi khat le khat elawk caan a silo ih,tlangpar miphun le kawl miphun kan zaten lungrual zetih ralhrang uknak kan do ding caan a si. Hmunkhat teih ralhrang kan do ding caan a si.

“Ralhrang ralkap le an lamtang pawl nan pulbak thlirnak le hlawk duhnak pawl tlansak thlang ding nan si. Mipi lamtang dingin kan lo sawm. Kannih cun mipi lam nan ttan ding caan kan hngak ringring ih, ralthuam famkim thawn tlansuak uh. kan tefa pawl ralhrang uknak in an luat theinak dingah caantha hmang thiam dingin kan lo sawm.

“Netabik ahcun ramsung party zaten ralhrang ralkap in tuah an tummi 2023 hrilawknak ah tel lo hram dingin kan lo theihter duh. Dothlengnak ah nenak co thei dingin ralhrang tuahmi ziangkim do uhsi, khulfungter uhsi. Ralhrang ruangah harsat a tuartu mipi nan zaten, raltlan nan zaten, dothlengnak ih nunnak hlantu pawl ih sungkhat nan zaten inn le lo suahsantu nan zaten upatnak kan lo pe. Kannih NUG cozah cun a rangthei bikin dothlengnak thehfel dingah theitawk kan zuam vivo ding tin mipi kan lo simthei duh a si,” tin mipi sawmnak a nei.

G7 In Ralhrang An mawthluk – Leitlun ram picang 7 komkhawm Canada, France, Germany, Italy , Japan , UK le US pawl cun thihdan an pekmi a takih thlaithattu ralhrang ralkap an mawhthluk ih, neta ah tuah nawn lo dingin an theihter.

G7 cun “Thuneihnak duh men ah ralhrang ralkap in dik lo zetih an kaihmi lakin thihdan an pekmi mi 4 pawl cu a takin an thlaithat men ih, kannih G7 cun kan mawhthluk tuk tlunah neta ah tuah nawn lo dingin kan theihter duh. Kannih G7 cun ralhrang uknak kan duh lo, kan do bangin hmailam khalah ralhrang uknak cu kan do vivo ding.

“Dothlengnak ruangah ralhrang in an thatmi sungte zaten hnenah kan lo tuarpi thu khal kan tarlang duh. Hivek in ralhrang pawl an cangvaih vivo asile Myanmar ramsung ukawk dan, sipuazi, tlanlen dan, minung dan le mipi covo dan pawlah Myanmar cu seherh um tuk nan si.

“Ralhrang ralkap in an thuneihnak fehsan dingin, thihdan an pekmi pawl thlaithat nawn lo dingin, ram buainak ruangih an kaihmi zaten thlahsal thluh dingin le Democracy uknak vekin rampi fehpi dingin kannih G7 cun kan dil duh. Kannih G7 cun UN le ASEAn in ralhrang an nornak cu kan ttawmpi ringring ih, a takih thlengsuak dingin a tulnak ah theitawk kan bawm ding a si,” tin thu an suah.

Doawknak ah Ralhrang 4 An Thi – Pago ramthen Paungtte myone Titpuk khua ih doawknak ah ralhrang bawi telin ralhrang 4 an thi ih, ralthuam hrekkhat kan laksak thei tin Paungtte PDF cun mipi theihternak an nei.

July 28, sun nazi 1 hrawngah ralhrang ralkap le Paungtte PDf pawl cu Titpuk khua kiangah do aw an si ih, doawknak ah ralhrang ralkap 4 an thi ih, MA3 zunkhat, Pistol zunkhat, biakawknak cet pakhat ,phone 4 le hmatpungtin 1 pawl kan sar tin Paungtte PDF cun thu an suah.

Paungtte PDF cun “Doawknak ah ralhrang bawi pakhat, senkhat pakhat le a dang ralhrang pahnih pawl an thi. Meithal zunhnih kan laksak thei ih,MA3 zunkhat le Pistol zunkhat an si. Doawknak ahcun kannih PDF lam cu thupten va dotu kan si tlunah ralhrang 4 an thih hnuin kan himnak hrang dung kan sipsal, zokhal hriamhma ngah le thi kan um lo a si,” tin a sim.