NUG cozah cun ramleng pawl cu Ukraine an bom bangin Myanmar mipi ralkap pawl khal ralthuam bawm ve dingin an dil nonsal. NUG cun kan dungah ramleng pawl cu Ukraine vekin Myanmar mipi ralkap khal ralthuam bawm dingin an rak dil zo nan, an hlawhsam ih, tuitum ah an dilsal.
NUG cozah in humhimnak vuanci U Yee Mon cun “Ramdang in democracy lamzin kan zawhnak ah thazang in pe tukih in dinpinak an langter rero zo. Cuvek dinhmun ah kannih in ramleng in ramthuam le sumpai dong sehla ziangtlukin kan lungawi sinsin ding. Ramdang ihsin bomnak kan ngah thei lawngah duhtawk in dothlengnak kan fehpi thei dingih, mipi neihsiah khal thatukin kan humhim sak thei ding a si,” tin a sim.
NUG cozah cun ramkulh le ramthen pawl ah mipi ralkap (PDF) din a si zo ih Federal Democracy rampi dinnak ding hrangah SAC ralhrang uknak a zunghram ihsin karsiat dingah kan zuam rero tin an sim.
A tufang NUG cozah in ramdang vuanci Daw Zin Mar Aung cu US a feh hnuah Malaysia ramdang palai thawn khalin an kom aw ih, ramleng ah an dinhmun an kauh bet rero. Hivek a thlen hnuah NUg cozah in humhimnak vuanci U Yee Mon cun ramdang hnenah ralthuam a dilmi a si.
MP Pi Siami In Mizoram Ngapih A Zuar – Sagaing ramthen, Kalay peng ih MP pakhat Pi Siami cu ram buainak ruangah Myanmar ah a him lo ih, Mizoram ah a rak tlan ve.
Mizoram ih tlan a si tikah eiin hawlnak ngaihtuah a tul ve ih, a raltlannak Mizoram, Aizawl khawpi ah ‘Ngapih’ a zuar tin Aizawl Post cun an tarlang.
Pi Siami cu amah ten ngapih zuar siloin a tuanpi pawl thawn zuar an si ih, anmah in inn in an pek thei tlunah hmeltheih inn ih an zawrhmi khal a um. Aizawl bazar ih to ih thilzuar lawng thilzuar a silo ih, bazar thleng lo khalin inn ah tuah ih,midang zuar sawngter tivek khalin sumdawng tampi an um.
Pi Siami bangin midang raltlan pawl khal theitawk in kuli hlawh aw, thilzuar tampi an um ve ih, raltlan pawl zalen zetin hnatuan siangtu, thilzuar siangtu Mizoram cozah siseh mipi pawl khal uar um ngaingai an si.
Kum 4 Mi Kai Dingih Lamhmutu Venglal An Kap That – Ahlone myone ih tualleng tlawngkai lai nauhakte kai dingah lamhmuhtu le hohatu venglal cu May 17, zanlam nazi 4 hrawngah an kap that.
Yangon ramthen, Ahlone myone ah kum 4 mi nauhak tualleng tlawngkai lai kai dingin lamhmuhtu le hohatu venglal cu May 17 ah an kah that tin mit hmutu pawl cun an sim. May 17, zanlam nazi 4 hrawngah Shin Min bazar dunglam Tikpan lamzin ah Shin Min venglal U Hla Moe cu meithal in vei 6 rori an kap ih a thi.
A kiangih um pakhat cun “Anih hi thahtlak rori a si ih, SAC ralhrang ih uite rori a si. Kan dunglai ah a hminthannak zet cu tualleng tlawngta nauhak kum 4 mi kai dingin phur biktu le hohatu bik a si,” tiah an sim.
April 5 laiah khan Ahlone myone, Shin Min veng, Seitdwin lamzin ih phuanmi ‘BC’ timi tualleng tlawng ah DC motor 1, innsang tomi motor 1, palik motor 1 le mipi hnipuan hruh ralhrang pawl cun nauhak kum 4 mi an kai.
An kaihmi nauhak nute ih nu le pa hin PDF an bawm theu tiah SAC ralhrang cun thusual an puh ih, cutin a nu le pa aiah nauhak nute an rak kai. Nauhak nute an kaih ttumah a phur biktu le hohatu cu tui’ an kah thatmi U Hla Moe a si.
Fala In Mipi Ralkap Tangka Ting 185 A Ru – Sagaing ramthen, Salingyi myone ih cangvai One Star Task Force pawl sumpai ting 185 cu Yangon ih um fala Mazin Mar Tun in a laksak thluh hai. Sumpai tam sawn cu click 2 donate ihsin an ngahmi a si ih, Mazin Mar Tun in alakin sumpai ka lo suahsak ding a ti hnuah sumpai cu suahsak hai ih, an hnenah kuat duh nawn loin a co lanta.
Cuven, fala mazin Mar ih umnak an zingzoi hngal ih, A hnaṭuannak khalah an va feh nan arak theicia ruangah hmun dangah a tlanhlo. A thok ahcun midangin in bum tin falanu cun a rel nan, a puhmi thuphan a si tikah amah a si tin an theifiang.
Hivek thu a thlen hnuah falanui nu in an thilri neihmi pawl an zuar dingih sumpai an pe kirsal ding thu mipi ralkap hnenah a sim thei nan,tutiang an pe thei hrih lo. A nu cun ‘kan lo pe thei lo asile a ṭha nan tuahmi cu tuah ko uh’ tin mipi ralkap pawl a simthei hai. Mazin Mar Tun ih bumnak ruangah PDF pawlin harsatnak phunphun an tong ih, meithal le siivai khal an lei thei lo.
PDF pawl cu bum an tuar ruagnah Ei le in ding an neih lo ih, kiangkap ih um khuami pawlin ei le in ding an pe. PDF cun falanu cu thah an tum lawk nan, mibumtu le dalan cu an bangaw lo tin an ruatsal. Khatlam ah PDF in falanu an that asile mipi an that tin an hminsia ding tla an duh lo. Sumpai ruangah thihnak thleng cu an duh lo ih, sumpai ngahsal ding khal an beisei tuk nawn lo.
Ralhrang Bomb An Puah Ih 5 An Thi – Sagaing ramthen Chuang Oo myone ah umhmun khuar dingih feh ralhrang pawl cu lamlak ah PDF in bomb an rak puah ih, ralhrang 5 an thi tin thu an suah.
Myinmu PDF cun “May 17, zinglam nazi 10:45 hrawngah Chaung Oo ih umhmun khuar dingin feh ralhrang ralkap pawl cu kannih mipi ralkap pawlin lamlak ah bomb kan rak puah. Ralhrang pawl zamrang zetin mawtaw an suahsan zawngah bomb kan puah betih ralhrang 5 an thi.
“Zinglam nazi 5 hrawngah ralhrang pawl cun anmah kan bawh timi an zum si hmang hlaral kahnak in kap ciamco hmaisa. Curuangah, kannih mipi ralkap pawl cu theitawk in kan tlan ih, lamlak ah meithal zunkhat, phone 2 le thilri dangdang kan thlau ngah. Lamlak ahcun kan tuanpi dang pawlin in rak hmuak ih, ralhrang zetin ralhran cu rak bawh kan si.
“Tuini ih ralhrang kan donak ah Myin Mu Foce, CDSOM, mipi ralkap Myinmu, Sagaing ralkap, Black Eagle le Chuang Oo Revolution Army pawl kan tangtlang a si,” tin thu an suah.
Demoso Ih Doawknak Ah Ralhrang 5 An Thi – Kaya ramkulh Demoso myone Dawngan khua kiangih umhmun khuar ralhrang ralkap pawl cu Demoso PDF in nazi 2 sung tluk an kap ih, ralhrang 5 an thi tin thu an suah.
Demoso PDF cun “Kaya ramkulh Demoso myone Dawngan khua ih umhmun khuar ralhrang ralkap pawl cu kannih Demoso PDF in tatyin komkhawm 4 tlunah Loikaw PDF le KRU pawl in may 17 sun ah kan va kap. Zinglam nazi 11 hrawngin zanlam nazi 1 tiang nazi 2 sung khat le khat kan kap aw ih, doawknak ah ralhrang 5 an thi.
“Doawknak ah kannih mipi ralkap komkhawm lam thi kan um lo ih, himdam ten dung kan sip thei. Doawk thluh hnuah ralhrang thi 5 pawl ih ruang cu ralhrang dang pawlin mawtaw in an phursuak lai kan hmu. Mipi thilri fir ih,mipi inn nawkkang rerotu ralhrang pawl cu kan do vivo ding. Ralhrang pawl cun lamzin tluan le khua tivek ah bomb an kam vivo ih,mipi fimkhur dingah kan lo cah duh a si,” tin thu an suah.
KIA in ralhrang Mawtaw 3 An Kap Siat – Kachin ralkap KIA cun may 17 , sun hnuah kachin ramkul Pata Oo lamin feh ralhrang ralkap mawtaw an kap ih, ralhrang mawtaw 3 kan kap siat tin thu an suah.
May 17, sun nazi 1:40 hrawngah KIA cun Pata Oo lamzin feh ralhrang an rak kap ih, ralhrang mawtaw 3 a siat tin thu an suah. Khat le khat an doawknak mi ziangzat an thi timi cu an tarlang tel lo.
KIA cun “Ralhrang mawtaw 4 a si ih, ralthuam hrekkhat an phur. Ralhrang mawtaw fehkhawm cu ralthuampi in kan rak kap ih,ralhrang mawtaw 3 kan kap siat ngah a si,” tin thu an suah.
Leave a Reply