NUG In Ramleng Le Mipi Beisei – NUG cozah in lailak president Duwa Lashila cun Myanmar ram dothlengnak ah nehnak co dingin ramleng kan huat a ngah lo ih, ramleng le ramsung mipi tantlangnak in kan tumram thleng thei kan si tin a sim.
November 29 ah NUG cun meeting an nei ih, cumi meeting ahcun lailak president Duwa Lashila cun ramleng an thupitnak a sim ih, ramleng le ramsung mipi tuantlang dingin sawmnak a nei.
Duwa Lashila cun “Ramleng zaten kan rualpi si dingah tuah ahar men ding,Asinan kan ral ah kan tuah ding cu a si cuang lo. Ramleng ah rualpitha nei bet vivo dingin kan zuam a tul ih, kan lamtang dingah kan sawm rero ding. Ramsung mipi ih peknak le thazang kan rinsan ih kan zumhnget lawlaw. Ramleng ih thleng Myanmar mipi pawl ih peknak la tanlaknak khal ropi kan ti tuk lawlaw.
“Cumi rualrual in ramdang kan ngaihsak lo ding, kan theihhngilh men ding a silo ih, kan rualpi ah kan tuah vivo a tul. Ramsung mipi ih duhdan kan ngai poimawh ding tlunah ramleng khal kan thlahdah ding a silo. Mipi zum dingih kan um a tul bangin ramleng pawl ih rinsan ngam ding khalin kan cangvaih a tul. Dothlengnak kan tuahmi ah mipi dinpinak le ramleng dinpinak kan khaikhawm ringring a tul. Tlangpar ralthuamkai pawl thawn khalin kan be aw rero ih, a takih tuantlangnak um lohli dingin kan zuam rero a si,” tin a sim.
Ralhrang 21 An Thi – November 29, Myanmar rampi huap hmun tinkim ih doawknak thusuahmi ah ralhrang 21 an thi tin hmuntin PDF cun thu an suah.
Sagaing ramthen Salinkyi ah PDF pawlin ralkap pakhat an kap that ih, Tanintharyi lam doawknak sosang ah ralhrang 3 an thi. Sagaing ramthen Khin Oo myone ah doawknak a sosang peh hrih ih, ralhrang 7 an thi. Khin Oo ahcun November 15 in an rak do aw thok zo ih, doawknak ah ralhrang thi an tam tin PDF cun thu an rak suah rero zo. Ralhrang thi an tam tikah ralhrang pawl cun duhtawk in khua an luhcilh an urkang vivo ih, khua 12 in inn 777 an urkang zo. Mipi inn urkangtu ralhrang pawl cu PDF pawlin an kham rero phah ih, Khin Oo boruak a dai thei hrih lo. Watlet ih doawknak khalah ralhrang 5 an thi tin PDF cun thu an suah.
Watlet PDF cun “Hlattaw khua lamah ralhrang pawlin in nor ih, kannih PDF komkhawm cun kan rak kap. Ralhrang 5 cu felfai zetin an thi kan hmu ih, ralhrang 4 khal lamzin ah an let tupti ih hriamhma an ngah. Ralhrang thi le hriamhma ngah pawl cu mawtaw dangin an phur. Kanmah lawng siloin mipi ralkap pawl lungrual in ralhrang kan rak domi a si,” tin mipi an theihter.
Sagaing ramthen Chindwin tiva tluan le Shwebo myone sungih doawknak khalah ralhrang 5 an thi. Sagaing ramthen sung hmun tinkim ah doawknak a sosang tuk. Doawknak thuhla le ralhrang thi pawl cu PDF pawlih thusuahmi an si.
Mipi Sumpai Diltu An Kap That – Mon ramkulh Kyaik Hto myone ih Meisa cetzung hnatuan pakhat cu mipi hnenih sumpai tamtuk a dil ruangah an kap that.
Kyaik Hto palai cun “November 29, zanlam nazi 5 hrawngah lamzin ah an rak kap that. Kyaik Hto myone sungih khua hrekkhat ah meisa a pe duh lo. Meisa nan duh asile meisa man pe hmaisa uh tin thu a suah. Khua khat ah ting 80, ting 600, ting 3000 tin a dil vivo ih, cumi a pek hlansung ah meisa pek a tum lo.
“Tuih meisa ngah lo khua le veng pawl khal amai thupek ruangah meisa ngah lo an si. A parah mipi an lungawi lo ngaingai ih, tu ahcun an kap that. A tuahmi bangin a parah a thleng a si,” tin a sim.
Ralhrang In NLD Palai Kum 24 An Hrem – Central NLD sungtel U Htun Htun Hein cu rampi na dokalh tin ralhrang in thubuai an tuahsak hnuah November 29 ahcun kum 20 sung thawngtla dingin hremnak an pe ih, a hlanah kum 4 sung thawngtla dingin hremnak an rak pe zo thawn ralhrang in U Htun Htun Hein an hremnak zaten kum 24 a kim.
Buaipitu pakhat cun “A hlanah kum 4 sung thawngtla dingin hremnak an pe zo ih, cumi hnuah kum 20 sung thawngtla dingin hremnak an pe bet. Tu khalah thubuai dang pakhat an tuahsak bet. Cumi khalah hremnak an pe bet ko ding. Kannih lamin a dik tin ttang rero khal sehla ralhrang pawl cun duhduh in hremnak mi an pe rero men a si,” tin a sim.
Ralhrang pawl cun Central NLD sungtel U Htun Htun Hein cu rampi dokalh thubuai pahnih tlunah hrilawknak dik lo tuahtu tin thubuai dang an tuahsak bet. 2021 , December 22 ah kum 4 sung thawngtla dingin hremnak an rak pe zo ih, 2022 November 29 ah kum 20 sung thawngtla dingin hremnak dang an pe bet.
Kum 73 mi U Htun Htun Hein cun 2020 rampi hrilawknak ah NLD palai dinhmun in Shan ramkulh ah a rak zuam ve ih nehnak a rak co. Asinan, ralhrang in rampi thuneihnak a lak tikah Central NLD sungtel a si bangin ralhrang pawl cun Daw Aung San Suh Kyi le Win Thein rualah an rak kai cih ve. Ralhrang in U Htun Htun Hein an kaih hnuah Naypidaw in a umnak Shan ramkulh ah a rak kuat nan, a hnu reilo ah an kaisal ih, Lashio thawnginn ah tutiang an khum.
Ralhrang le MNDAA An Kap Aw – China le Myanmar ramri Kokang hmunram sungah MNDAA le ralhrang ralkap an do aw tin MNDAA lam cun thu an suah.
MNDAA cun “November 28 in Kokang hmunram sungah kannih MNDAA le ralhrang pawl kan kap aw zo. Ralhrang lamin in nor ih, kan umnak hmun in kah hmaisa ruangah kan kap aw. Ralhrang mipum 90 hrawng cun November 27 ah in nor thokih November 28 ah in kap. November 28, zinglam nazi 8 in kan kap aw thokih minute 20 sung lawng kan kap aw. Cumi ahcun ralhrang 2 an thi ih, ralhrang hriamhma ngah 7 an um.
“Ralhrang lam thi an um hnu ahcun dung an sip ih, kannih khal boruak kan ngaicang. Sun nazi 2 hrawng ahcun ralhrang mipum 140 hrawng kanmah do dingin an ra ih, zan nazi 7 hrawngah kanmah do dingin ralhrang mipum 20 an thleng bet. Zan nazi 11 hrawngin ralhrang pawl cun in kap thok.
“November 29, zinglam nazi 9:30 hrawngah ralhrang mipum 350 hrawng cun dunglam le hmailam thawn in kulh ih in kap. Cuveten kannih khalin mah le mah humhimawknak hrang ralhrang pawl kan rak kap ve ih, sun nazi 1:10 tiang ralhrang pawl thawn kan kap aw. Ralhrang pawl cun kahcawlh thu kan phuang an ti ih, an hotu Min Aung Hlaing khalin tlangpar ralthuamkai pawl a be rero. Asinan, hnuailam ahcun a takin raltho cu anmah ralhrang pawl an si. Ralhrang mipum tamzetin in nor nan, kannih MNDAA pawl cun kan hmunram kan humhim thei a si,” tin thu an suah.
Min Aung HLaing In A Kuthnuai Pawl A Hro – Ralhrang ralkap hotu Min Aung Hlaing cun ralhrang kuthnuai ih hnatuan zokhal felfei zetih dilnak nei lo cingin ramri lan an um ih, PDF pawlin an rak kai asile kan lo buaipi lo ding tin a kuthnuai hnatuan pawl a hro.
Min Aung Hlaing in a kuthnuai pawl a hro rualin a kuthnuai khualtlawng sukso pawl ih thlun dingmi daan khal a rak theihter zo. Cumi ahcun cozah hnatuan khualtlawn ding an um asile ralhrang theither dingin, bulpak thu ah khualtlawng dung asile fawm hruh loin mipi vekih khualtlawng dingin, khualtlawn tikah vuanhtan sinak zianghman keng lo dingin le keng lo dingin timi pawl an si.
Naypidaw ih ralhrang thuthup phuangtu cun “Zokhal ralhrang hnuai ih hnatuan an sile khual a tlawn ding tikah tlunlam theihter hmaisa ding a si ih, tlunlam theihter loin khual an tlawngih kaih an tong asile ralhrang lamin an buaipi lo ding tlunah an cawh bet ding. Kaih an si caan ah an buaipi lo dingih an zalen sal pang asile an cawh bet lam ding. Bulpak thu ah ralkap le palik khualtlawng ding pawl cu mipi vek rori’n khualtlawng dingah theihter an si. Hivek cu zung tinkim ah an theihter zo,” tin Ralhrang sunglam thu a suak.
World Cup Group A le B A Lek Theh – 2022 FIFA World Cup Group A le B pawl cu November 29 zan le November 30 zingah an lek theh ih, Netherlands, Senegal , England le USA pawlin sungsuak an lut.
Group 1 ah team 4 ciar an um ih vei 3 ciar lek ding an si. Group A le B pawl cu vei 3 ciar an lek kim zo ih, group hmaihruaitu le a sangtu pawlin sungsuak an lut.
Group A puai netabik ah Netherlands cun 2-0 in Inntek Qatar an neh ih, Group A ah hmaihruaitu dinhmun in sungsuak an lut. Group A puai dangah Ecuador le Senegal an do aw ih, 2-1 in Senegal cun nehnak an co. Group A an lek theh tikah Netherlands hmat 7, Senegal hmat 6, Ecuador hmat 4 le Qatar hmat nei lo tin Table an khar ih Netherlands le Senegal in sungsuak an lut. Inntek Qatar cu World Cup thuantu ah inntek dinhmun in puai 3 sung thluh thei hminsin an tuah.
Group B ah England le Wales, USA le Iran tin an do aw. England cun 3-0 in Wales an neh ih,group B ah hmaihruaitu dinhmun in sungsuak an lut fel. England hrang Raford in goal 2 a thun ih Foden in goal 1 a thun ve. USA cun 1-0 in Iran an neh thei ih, Group B pahnihnak in sungsuak an lut ve. Sungsuak ah Netherland le USA an tongaw dingih, England le Senegal an tongaw cih ding.
Tuizan November 30 ah group C le D pawl an lek theh ve ding. Myanmar caan zan nazi 9:30 ah group D pawl an lek dingih Australia le Denmark , France le Tunisia an tongaw ding. Tu ah France in hmat 6 thawn sungsuak an lut fel zo ih, hmat 4 nei, hmat 1 nei Denmark le Tunisia pawlin sungsuak hmun pakhat an cuh aw ding.
Group C pawl cu zan nazi 1:30 ah an lek dingih Argentina le Poland, Mexico le Saudi Arabia an tongaw ding. Tu ah Poland hmat 4, Argentina hmat 3, Saudi Arabia hmat 3 le Mexico hmat 1 pawl cu sungsuak lut thei thluh an si ih ,an lakin team 2 in sungsuak an lut ding.
Leave a Reply