NUG In Rohingya Pawl Thu An Tiam

Kalay Ah Ralhrang 2 An Thi – Sagaing ramthen Kalay peng sungah Kalay PDF cun August 29 le August 30 ah ralhrang pawl bomb an puah ih, ralhrang pahnih an thi tin thu an suah.

Kalay PDF cun “August 29, zinglam nazi 7 hrawngah Kalaymyo thlanglam hMiauksi khua palik sakhan sungih ralhrang mipum 20 hrawng an suak ih, kannih Kalay PDF in bomb kan rak puah. Ralhrang pawl tih le khur in dung an sip ih, avei hnihnak bomb kan puah bet. Vei 2 bomb kan puahmi ah ralhrang 2 an thi ih, ralhrang 4 hriamhma an ngah.

“August 30, zinglam nazi 6 hrawngah Kalay peng Tayawady khua in Tamu lamah ralhrang mawtaw 5 an feh , kannih Kalay PDF cun lamlak ah bomb kan rak puah. Bomb kan puahmi ah ralhrang mawtaw pakhat a siat ih, ralhrang mawtaw dang pakhat khal bomb kan puah fuh tuk. Tamu lamih feh ralhrang mawtaw bomb kan puahmi ah ralhrang thizat kan fiah thei hrih lo a si,” tin thu an suah.

Dollar Fangkhat Ah 3650 Kyats A Thleng – Ralhrang ralkap in rampi thuneihnak an lak hnuah Myanmar ram sumpai dinhmun a tlaniam cak tukih, ramdang sumpai thleng duh tikah Myanmar kyat tampi a tul thlang.

Tu khalah ramsung ahcun US dollar fangkhat cu Myanmar in Kyats 3650 a thleng. Hivekin ramdang tangka khal a kai thluh ih, Myanmar tangka ih manmual a tlaniam deuhdeuh. Himi cu Myanmar ih dollar lut lam siloin dollar hmang duh hrang Myanmar tangka in dollar an lei tikah aman zat 3650 timi a sisawn. US dollar in Myanmar ram sungih tangka kuat dingah sumthleng rate cu a hranten a um ve. Asinan, cukhal Myanmar tangka manmual a tlakniam cun a rak danglam ringring ve.

Dollar man a tam tuk tikah a buaitu cu cozah le milian pawl an si ih, ramdang thilri an lei dingih, dollar hmang an si. Dollar an hman ding tikah Myanmar tangka in dollar an lei sawng theu. Tu ahcun dollar man a kai tuk ruangah ramsung company tampi khal an buai thlang.

Myanmar tangka manmual lawng a tlaniam lo ih, ramsung thilri man a kai ciamco tikah ramsung ih um mipi pawl an harsa deuhdeuh. Thilri man ziangkim a hai ih, a zuarsuahnak lam a har deuhdeuh. Hivek a si tikah Myanmar ram cu leitlun farah ram tahnak ah hnuailam an pan vivo ih,ram a buai vivo asile leitlun ih farahbik ram dinhmun khal an thleng thei men tin mithiam pawl cun an sim.

Ralhrang In Minmaw Kun Inn An Kharsak – Ralhrang ralkap cun dothlengnak ih theitawk suahtu lemcangthiam Min Aung Hlaing ih Inn an kharsak tin thu an suah. Yangon ,Bahan myone ih Minmaw Kun ih inn cu ralhrang pawlin an kharsak rori tin amah Minmaw Kun khalin mipi a simthei.

Minmaw Kun cun “Ralhrang ralkap le an tuanpi pawlin Yangon ih kan inn in kharsak timi thu kan thei. Hivek menah ka buai phah lo ih, ka hna khal a thak lo. Nunnak hlantu pawl ruah tikah, mino pwal an kaihmi ruah tikah le PDF pawl an nunnak an hlan tikah inn kharsak tivek men cu riahsiat thlak ciamco a silo,curuangah ka theihhngilh zo. Ziangahtile, ka tlansan zomi a si ih, ka ui lo. Asinan , thil pakhat a um. Cumi cu nan tuar ve leh rori ding a si,” tin mipi a simthei.

Ralhrang ralkap in rampi thuneihnak an lak hnuah lemcangthiam Minmaw Kun cu mipi lamtang cih a si ih, lamzawh duhphorhnak khalah a rak tel rero zo. Ralhrang in kai dingin thu an suah ahcun a him nawn lo ih, a rak tlan. Neta ah a nupi le fate thawn a tlanak Karen ramkulh sungah an tongaw thei.

Tu ahcun Minmaw Kun cu Australia ram ah a thleng zo ih, Australia a fehnak san cu dothlengnak hrang nasa sin in sumpai hawl a duh ruangah tin a sim.

NUG In Rohingya Pawl Thu An Tiam – NUG cozah cun Bangladesh ih raltlan Rohingya miphun pawl Myanmar ih an tlun theinak dingah thu veihnih rori an tiam. Hmaisa sawn NUG in Rohingya thu an tiammi cu August 25, NUG in Rohingya miphun tampi an that ni kum 5 kim caan a si ih,neta ah NUG in Rohingya pawl thu an tiammi cu August 29 ah a si.

NUG Prime Minister Mann Win Khaing Than cun “Ramri ih raltlan Rohingya pawl nanmai duhthu rori in zalen zet le him zetih Myanmar nan tlun theinak dingah kannih NUG cozah, Rohingya pawlkom, tlangpar miphun pawlkom , Bangladesh cozah le UN pawlin theitawk kan zuam rero lai timi thu kan lo tiamsal non duh a si,” tin a sim.

NUG cozah cun ralhrang tuahmi 2008 daan hrampi an bal zo thu khal mipi theihternak a nei ih, NUG cozah a din thok veten Rohingya pawl Myanmar ah tlung thei dingin theitawk an suah ding thu a rak tiam zo. Tuitum veihnih thawn cun NUG cozah in Rohingya pawl thu veithum an tiam thlangih, Myanmar nan tlun theinak dingah theitawk kan zuam rero tin an simthei.

Ralhrang ralkap cun Myanmar ah Rohingya miphun an um lo,Curuangah Rohingya miphun ti zawng cun zohman kan cohlang lo. Asinan, Bangladesh ram ih tlan lakin Myamar rammi sinak nei pawl cu an tlun theinak ding hrang theitawk kan zuam rero a si tin thu an rak suah ve.

Rohingya miphun hi Leitlun ram dangdang ah thekdarh aw an si ih, India, Bangladesh, Malaysia ,China le Myanmar pawl ah an um. Rohingya zaten ram pakhat ih um thluh ding cu zokhalin an duh lo.

NUG In Drone Ralkap Din An Tum – NUG cozah cun a tufang ralhrang ralkap donak ih mipi ralkap pawl hman tangkai tukmi Drone hman vivo an tum ih, Drone ralkap din dingin sumpai an hawl thok. Drone ralkap din dingin sumpai hawl cangvaihnak cu Skywalk tiah hmin an pe.

Drone ralkap an din tummi cu ramsung hmun tinkim dothlengnak ralkap lakin Drone hmangthiam pawl an thiamnak hlawm aw khawm dingin, ralthuam ret thiam sinsin ding, sumpai bomnak an ngah theinak dingin ,ralhrang doneh sinsin an si theinak dingin tin an tarlang.’

Drone ralkap hrangih sumpai hawl ding caan cu August 30 in September 15 tiang a si ih, cumi ah a phunphun in sumpai hawlnak an nei ding. Drone ralkap burpi din dingin sumpai an hawlnak ah $1million ngah an tum. Curuangah ramsung dothlengnak pawlkom zate lakin Drone ralkap pawl cu Skywalk Projeck pehthlaih dingah theihter an si.

S.Korea ih NUG palai Yan Naing Htun cun “Tuitum cu caksawn in ralhrang kan do theinak dingah thilthar tawlrel kan si. Curuangah ramsung ramleng ih um mipi nan zaten kan mipi ralkap hrang theitawk suah dingin kan lo sawm. Kannih Korea ih thleng pawl khal Drone ralkap hrang theitawk kan suah ve ding a si,” tin a sim.

A tufang ramsung buainak ah ralhrang ralkap pawl cun raldonak helicopter le raldonak vanzam an hmang ciamco ih, mipi ralkap pawl an him lo zet. Hivek ruangah Drone hmangih ralhrang do ding thu mipi ralkap an him phah tuk ding titu an tam.

Salinkyi PDF hotu cun “Khua sungah mipi ralkap pawl rawl kan ei ih, Dalan cun ralhrang pawl a rak simthei. Cutikah ralhrang pawl cun raldonak vanzam in kan umnak khuasung an kap ciamco ih, khuami 8 le PDF 13 an thih phah. Yinpuangdaing ah ralhrang ralkap pawl thawn August 13 in kan do aw zo ih, tuini tiang kan do aw peh hrih.

“Ralhrang pawl cu Yinmarpin, Pale, Kani lamah an feh ih, tu ahcun Chindwin tiva tluanah an hrut. Kani lamah mipi ralkap komkhawm in ralhrang pawl an rak kap ih, ralhrang thi an tam. Kani lamih kan doawknak ah kanmah PDF sungin mi 30 hrawng kan thi ve. Ralhrang pawl khal a thok ahcun mi 250 hrawng an si ih, tu ahcun mi 82 lawng an dam. Cutikah reipi sung kan doawknak ah ralhrang 170 hrawng an thi.

“Tu ahcun cerek kan haidaih lo ruangah dung kan sip phah. Ralthuam kan nei famkim lo ih, duh vekin kan cangvai thei lo. Ralthuam famkim nei thluh sehla kannih Sagaing ramthen sungih PDF pawl cu Myanmar rampi tiang la thluh thei ding khop mipum kan um. Kan hnenah meithal leimi pakhat a um asile midang 10 hrawng cu kuttuah meithal hmang kan si. Hivek ruangah khua khal kan humhim thei hrih lo ih, ralhrang pawlin khua an urkang rero phah. Curuangah Sagaing ramthen sung ih dothengnak ralkap pawl in bawm hram uh,” tin RFA a simthei.

NUG cozah in humhimnak vuanci Yee Mon cun “Sagaing ramthen kan zoh tikah PDF an cak ngaingai ih, doawknak a sosang timi kan hmu thei ding. Ralhrang pawl cun Sagaing ramthen sungih PDF pawl olsamten kan thianfai thei ding tin an ruat nan, an ruat sual. Sagaing ramthen sungah ralhrang pawl sawn an tuarna ih, thi an tam. Sagaing ramthen sungih ralhrang hotu ralbawi Than Hlaing le ralbawi Phyo Thant an banter dan zoh in doawknak ah ralhrang dinhmun a tha lo timi cu a theihtheih tuk. PDF pawl an doneh lo ruangah mipi an bat ciamco thlang a si,” tin a sim ve.

UN Team In Ukraine Ih Nuclear Hmunpi An Cek – UN team pawl cun Ukraine ih Nuclear innpi zohfel dingin August 29 ah Ukraine an pan ih, cekfelnak an nei ding.

Ukraine nisuah thlanglam ih um Nuclear hmunpi cu Europe ramsung ih Nuclear hmunpi bik ti ih an relmi a si. Russia in Ukraine an do hnu March thla ah Ukraine ih Nuclear hmunpi an rak la. Asinan, Nuclear hmunpi ih hnatuan pawl cu an dawisuak cuang lo ih,a sungte an umter ringring hrih.

Ukraine lamin Nuclear hmunpi an rak duh ve tikah kan dung khalah Nuclear hmunpi kaptu an um ih, ram pahnih an puh aw. Ram pahnih cu NUclear innpi siatsuah lo dingin theihter veve an si ih Nuclear innpi a puak pang ahcun mipi in an tuar tuk ding tin UN cun thu an rak suah zo.

UN team cun Nuclear innpi ih um pawl an him maw? ziangtin hna an tuan? kan dungah Nuclear innpi ah a si ih, ziangtluk a siat tivek pawl an cek ding. Russia cun Nuclear innpi cu a tha thluh lai ko ih, kan mithiam pawlin uluk tukin an kilkhawi ringring tin thu an rak suah ve.