NUG In Thawnginn Puak An Zingzoi

NUG In Thawnginn Puak An Zingzoi – October 19, zinglam nazi 9:30 hrawngah Yangon ih Insein thawnginnpi sungah bomb a puak ih, mi 8 a rak thih phah. Mithi lakah mi 5 cu mipi an si tin an sim ih, NUG cun mipi thih phah dingin bomb puahtu an zingzoi thu mipi an theihter.

NUG cun “Insein thawnginn sungih bomb puak ruangah mipi 5 an thih phah tin kan thei. Bomb puak caan cu ram buainak ruangih kaihmi pawl Court an feh ding caan le an sungte pawl thawn an tonawk caan a si tin kan thei. Curuangah, kannih NUG cozah cun mipi thih phah ding khopih cangvaitu pawlkom pawl kan zingzoi rero lai.

“Kannih NUG cozah in ralhrang cimit dingin kan donak ah leitlun ralkap daan thlun dingin thusuah a si ih, anmah ralhrang ralkap lawng thah cimit ding, mipi tuarter hrim lo ding timi a um. Cucu, kan ralkap zaten an thlun dingmi a si ih, an thlun lo asile hremnak pek ding an si.

“Mipi tuar ding zawngih cangvaihnak hrimhrim kannsih NUG cun kan dokalh ih kan mawhthluk tuk lawlaw. Curuangah mipi thih phah khopih cangvaitu cu hrem a si rorinak dingah theitawk kan suah ding a si,” tin thu an suah.

Yangon ih cangvai Special Task Agency of Burm -STA pawlkom cun Yangon ih bomb puak cu anmai puahmi a si thu casuah in mipi an rak theihter man zo ih, bomb puak ruangah tlawnginn hotu bik le ralhrang dang an thih phah tin an thusuahmi ahcun an tarlang.

Special Task Agency of Burm -STA cun “Yangon insein thawnginn sungah kannih STA cun bomb vei hnih kan puah. BOmb kan puahnak san cu Min Aung HLangih naule pawlin Insein thawnginn sungih dothlengnak ruangah an kaihmi pawl an nautat tuk ruangah a si. Bomb kan puahmi ahcun thawnginn kiltu lakin hotu bik telin ralhrang 4 an thi ih, , mipi khal thih phah an um timi kan theisal.

“Kanmah STA lam cu kan him. Kannih cu ralhrang uknak a tawp tiang dotu ding pawlkom pakhat kan si. Kannih pawlkom cu dothlengnak sungah pawlkom dang thawn lungkimnak kan nei lo ih, zoi kuthnuai hmanah kan um lo. Kanmahten dothlengnak tuah men kan si. Curuangah ralhrang uknak kan do vivo digih, ralhrang pawl kan cimit vivo ding a si,” tin thu an suah.

Insein thawnginn ih bomb puak thuhla ah mipi ruahdan a bangaw lo ih, dothlengnak pawlkom pawl khal an hmuhdan a bangaw lo. Mipi a thih phah ruangah STA cangvaihdan mawhthluktu an um bangin, ralhrang pawl an thih phah cun a tawk, mipi cu doawknak a um tikah tuar phah ve ding kan siko titu khal an um ve.

Chinram Ah Ralhrang 25 An Thi – Chin ramkulh Hakha le Thantlang karlak ih ni 6 sung doawknak ah ralhrang 25 an thi tin CNA cun October 19 zan ah mipi theihternak an nei.

CNA cun “Kannih CNA le CDF hmunram sungah October 13 in 18 tiang ralhrang ralkap thawn kan do aw ih, doawknak thuhla pawl cu a hnuailam bang tuk an si. October 13 ah Hakha in Thantlang lamih feh ralhrang pawl cu kannih CNA le CDF in Timit kiangah kan rak kap ih, tuini tiang doawknak a sosang hrih.

“Doawknak a um tikah Thantlang lamin ralhrang mipum 40 hrawng khal doawknak hmun an pan ih, doawknak ah ralhrang thi an tam. Cutikah ralhrang pawl cun Thantlang le Hakha karlak ih doawknak tlunzuang raldonak an hmang. Doawknak ah kannih mipi ralkap komkhawm cun ralhrang 25 kan thianfai thei ih ralhrang 20 tlun hriamhma an ngah. Ni 6 sung doawknak ah kannih CNA lamin 3 le CDF Hakha pakhatg cun ram le miphun hrang an nunnak an hlanih, pakhat hriamhma ngah a um.

“Thantlang le Hakha karlak ahcun kannih CNA, CJDC, CDF Thantlang, CDF Zophei, CDF Lautu, CDF mara le CDF Hakha pawlin ralhrang kan do a si,” tin thu an suah.

CDF Pakhat Mual A Liam – Chin ramkulh Hakha le Thantlang karlak ih doawknak ah CDF thantlang sungtel Salai Biak Than Sang ( kum 18 ) cun October 19 ah ram le miphun hrang a nunnak a hlan.

Ralhrang in Thantlang le Hakha karlak ih Timit lilawn an tuah thluh hnuah Hakha ih ralhrang pawl cu Thantlang lamah feh peh vivo an tumih, cucu CDF Lamin an rak kham tikah doawknak a sosang. October 19 khalah Thantlang le Hakha karlak ah doawknak a um ih, CDF lamin Salai Biak Than Sang cun ram le miphun hrang a nunnak a hlan.

CDF Thantlang cun “CDF Thantlang sungtel Salai Biak Than Sang cu rampi thuneihnak latu ralhrang pawl lakin Chinram humhim dingah dothlengnak ih thu a tiam zo bangin October 19 ah ram le miphun hrang a nunnak a hlan.

“Ram le miphun hrang nunnak hlantu Salai Biak Than Sang ih tantami sungte pawl cu kannih CDF Thantlang in kan lo tuarpi tuk. Salai Biak Than Sang ih thu rak tiammi Chinram zalennak le Federal uknak hrang kannih a damlai pawlin theitawk suah in ke kan kar vivo ding. Dothlengnak hrangih na nunnak na pekmi cu upatnak kan lo pe a si,” tin thu an suah.

Ralhrang Ruangah Chin Nauhak 2 Thi – October 19, zanlam nazi 3 hrawngah ralhrang ralkap cun Chin ramkulh Hakha peng Buanlung khua kiangkap cu ralthuampi in an kap ciamco ih, tlawginn ih inn lamih tin nauhak pahnih an kap that ngah.

Buanlung khuami pakhat cun “Kum 6 nauhak an si ih, KG 2 an kai lai. Tlawnginn ihsin inn lamih an tinnak lamzin ah ralhrang kahsuakmi ralthuampi cu an kiangte ah a tla. Cutikah hriamhma naazet an ngah ih, a hnu minute 30 hrawngah nauhak pakhat a thi. Neta ah nauhak pakhat a thi bet.

“Nauhak thi pahnih cu James Siang Zauk ( kum 6 ) le Henry Bawi Zalian ( kum 6) an si ih, Mai Nancy Calen Par ( kum 6 ) cu a hriamhma ruangah sizung ah tuanhlawm rero lai a si,” tin a sim.

Buanlung khua cu Hakha in peng 20 hrawng hla ih um khua pakhat a si ih, an khua kiangkap ah doawknak a um lo, ralhrang pawlin duhduh in ralhtuampi an kapsuak men tin an sim.

Iran In Russia Bawm Peh Tum – Russia in Ukraine an do hnuah Iran cun Russia ralkap pawl Drone raldonak a rak pe tin thu a suak ih a thokah Iran cun an pha ciamco nan, tu ahcun Russia an bawm peh ding thu Iran lamin an sim.

Iran humhimnak lamih tuanvo neitu pakhat cun October 18 lamah Russia an bawm peh ding thu a rak sim zo ih , tuitum ahcun Drone le Missile pek an tum. Ralthuam thuhla ah ram pahnih palai pawl cu October 6 ah an rak tongaw ih, lungkimnak an nei hai tin Ira lam cun an sim.

Hivekin Iran in thu an rak suah tikah leitlun ramdang pawl cun nasaten Iran an mawhthluk ih, dankalh cangvaihnak tawmpitu nan si tin an sim.