NUG In Ralhrang Thil 5 An Phut – Myanmar dothlegnak ah lo theih loin ralhrang biak an tul pang asile remawknak um dingin ralhrang tuah dingin thil 5 an phut thu NUG lailak president Duwa Lashila cun Reuter thuthang a simthei.
Leitlun thuthang lar Reuters cun NUG lailak president Duwa Lashila thusuhnak an nei ih,thu phunphun an sut. Cumi ahcun lo theih loin ralhrang biak tul bangta sehla ziangtin nan ti ding timi thu an suh tikah NUG lailak president Duwa Lashila cun thil 5 ralhrang an phut thu a sim.
NUG lailak president Duwa Lashila cun “Kannih NUG cozah cun tuitum dothlengnak kan tuahmi ah mipi zawn kan ruat, mipi kan ngaihtuah ih ram dinhmun khal zoh phah in lamzin phunphun kan hawl. Cumi ahcun kan theihfeng zetmi cu ralhrang in an uknak a hnget theinak dingah a phunphun a tuah ding. Mipi an that ding,khua an urkang dingih rampi an tise rero men ding. Cucu kannih in PDF hmangin ralhrang pawl kan kham rero. Asinan ralhrang pawl cun mipi dekcoknak ah raldonak vanzam tiang an hmang.
“Kannih NUG le PDF khalin raldonak vanzam nei thei ve sehla ralhrang pawl cu thla 6 sungah kan doneh thluh ding. Cuvek dinhmun ahcun anmah ralhrang lamin biak in tum rero sawn dingih ASEAN thuron pekmi khal an thlun ding. UN, US le EU pawlih thuron pekmi khal an thlun ding. Cuvek dinhmun a thlen lo ahcun thuron pekmi pawl an thlun lo ding. Curuangah kannih cun ralhrang pawl tuar lo ding khopin do dingah theitawk kan suah rero. Doawknak ruangah harsa ,rilrawng ih um mipi pawl cu ramdang in bomnak an pek ding kan beisei.
“Lo theih lo dinhmun ah ralhrang biak tengteng an tul asile ralhrang in thil 5 an tuah hmaisa a tul ding. Cucu, mipi an thah reromi an bansan ding, Politics in an suak ding, ramdang bomnak an hnaihnok lo ding,2008 Daan hrampi an bal dingih cumi felfaiter dingah ramleng theihpinak an pom ding. Ralhrang in cuvek pawl an thlun thei taktak asile lo theih lo dinhmun ahcun biakawknak a um thei men ding,” tin a sim.
Myanmar Politics thiam U Than SOe cun, “A tu ih kan ram buainak ah ramleng pawlkom le ramdang khalin biakawknak rori an forh. Cucu,kannih khalin kan hnong men ding a siloin a lang. Asinan, NUG ih phutmi 5 cu ralhrang lamin an tuah thei ka zum lo. Ralhrang in Politics bansan ding cu ziangtik hmanah an duh dah lo dingih 2008 daan hrampi bal ding khal ziangtik hmanah an duh dah lo ding. Ziangahtile, cuvek pawl an tuah asile ralhrang zaten an suak thluh a tul ding. Khatlam ahcun NUG ih phutmi cu Myanmar ram a thatnak ding a awmang bik a si ih,lamzin dik a siko. Mipi duhdan khal a si dingih keikhal in NUG ih phutmi pawl cu kan ttawmpi tuk ve a si,” tin a sim.
Beer In Ralhrang 5 An Kap That – Mandalay ramthen Ngio Oo myone Ttat Mamaw ah siah khong ralhrang palik 5 pawl cu Beer ah an cawl ih, Beer an in rero laiah PDF pawlin an kap.
Pakukko PDF hotu cun “Sun nazi 1 hrawngah a si ih,dik lo zetin siah an khon hnuah an ngahmi hmangin beer an in. Culai fangah kan kap ih, a hmunah ralhrang palik 5 an thi. Meithal zun thum khal kan laksak thei. Dik lo zetin siah khong an si ih, mipi an dekcok.
“Thuhla kan theihnak thla khat tluk a kim zo. Caantha kan bawh ringring ih, tuitum lawngah kan cangvai thei. Ralhrang lamin kan miraltha pakhat ih kawngah an kap ve. Ralhrang thi an um tikah ralhrang dang mawtaw 3 thawn an thlengih, kiangkap a cek ciamco. Ralhrang do thei vivo dingin in bawm hrih uh,” tin mipi sawmnak a nei.
Ralhrang Mawtaw An Kap Ih 5 Thi – Sagaing ramthen Mungzua khawpi ah ralhrang ralkap pawl tomi mawtaw pakhat cu PDF pawlin naiten an rak kap ciamco ih, ralhrang 5 an thi tin thu an suah.
December 2, zanlam nazi 3:10 hrawngah a si ih, Mungzua in Mandalay lamih feh ralhrang pawl tomi mawtaw pahnih cu PDF pawlin lamlak ah an rak bawh ih mawtaw pakhat sawn an kap ciamco man. Ralhrang mawtaw cu PDF pawlin an dum cih ih, an kap phah vivo nan, ralhrang dangin an rak bawm man ih, PDf pawl cu an himnak hrang dung an sip.
Mungzua PDF tuanvo neitu cun “Ralhrang mawtaw kan kah hnuah lamzin sirah a va ding. Ralthuam la dingi kan va kap ih kan pan nan ralhang dangin an rak hum man ruangah ralthuam la ngah loin dung kan sipsal. Mawtaw sungih um ralhrang 5 hnakih mal lo an thi a si,” tin a sim.
Mikhual Cazin Cek Ralhrang 15 An Thi – Kachin ramkulh Phakan khawpi ih mikhual cazin cek ralhrang ralkap pawl cu KIA pawlin bomb an rak puah ih, ralhrang 15 an thi tin mipi an theihter.
KIA thuthang cun “December 2, zan nazi 6 hrawngah a si ih, mikhual cazik cek ralhrang pawl bomb kan rak puah. Bomb puak ahcun ralhrang 15 an thi , ralhrang 7 hriamhma an ngah. Bomb kan puahnak hmun cu Kalat kung Jade City hmunram a si,” tin thu an suah.
Phakan ih um pakhat cun “Bomb a puak durdo hnuah meithal puak awn kan thei cih. Bomb puak ah ralhrang thi an tam tin thuhla kan thei ih, a hnuah ralhrang dang pawl an thleng bet ciamco. Ralhrang thi an tam ruangah ralhrang pawl cun duhduh an kap ih, khuasung an dap ciamco. Ralhrang mawtaw khal a siat phah tin kan thei,” tin a sim ve.
RC Bishop In Ralhrang Be Dingin A Sawm – A tufang Myanmar ram buainak ah remnak dingin khat le khat biakawk a tul tiah Myanmar RC hotu Bishop Charles Maung Bo cun sawmnak a nei.
Myanmar RC hotu Bishop Charles Maung Bo cun “A tufang kan ram buainak zoh rero tikah khat le khat an biakawknak lawngin remnak a um thei ding. A tu cu khatlam khatlam in thuneih le uktu si an duh ih cumi ruangah buai an si. Thuneih duh ruangah an do aw rero ih, doawknak cun ziangtik hmanah remnak a um dah lo ding. Doawknak cun remnak hawl a theih lo. Doawknak cun thihnak le siatnak lawng a thlen.
“Biakawknak a um lo cun buainak a reh dah lo ding, buainak a sosang deuhdeuh. Curuangah ram a that thei dan umsun cu khat le khat be aw ih remnak tuah ding cu a si. Ka suahsemnak Sagaing ramthen Khin Oo myone Mung HLah khua ah urkang a si ih,nauhak pakhat le upa pahnih an thi. Kan suahnak khua rori urkang a si tikah ka riahse tukih ka tuar tuk. Asinan, miphun, biaknak le sinak thleidang loin remnak le daihnak cu ka duhbik. Remnak le daihnak um ding cun biakawk a tul a si,” tin a sim.
S.Korea In Portugal An Neh – 2022 FIFA World Cup group puai netabik hrang grouop H pawl khal December 2 zan ah an lek. Group H puai netabik ahcun S.Korea in 2-1 in Portugal an neh ih, sungsuak an lut thei. Portugal in S.Korea an neh lo nan, hmat 6 an neih cia ruangah group hmaihruaitu dinhmun in sungsuak an lutih,S.Korea in pahnihnak dinhmun in sungsuak an lut ve.
Group H puai pakhat sawn ah Uruguay cun 2-0 In Ghana an neh nan, hmat 4 veve nei S.Korea le Uruguay ah S.Korea sawn an goal dinhmun a thasawn ih sungsuak an lut. Uruguay le Ghana in World Cup an mangtha.
Group G pawl khal December 3 zingah group puai netabik an lek ve. Group G puai netabik ah Cemeroon in 1-0 in Brazil an neh nan,Brazil in hmat 6 an neih cia ruangah group hmaihruaitu dinhmun in Brazil cun sungsuak an lut. Khatlam Group G puai ah Switzerland cun 3-2 in Serbia an neh ih,hmat 6 an neih ve tlunah Group G pahnihnak dinhmun in sungsuak an lut ve. Sungsuak ah Brazil vs S.Korea , Portugal vs Swizerland tin an do aw ding.
Tu cun 2022 World Cup group puai pawl an lek thluh zo ih, sungsuak ih doaw ding pawl khal a fiang thluh zo. Sungsuak ih doaw ding pawl cu Netherlands vs USA, Argentina vs Australia, France vs Poland, England vs Senegal, Japan vs Croatia, Brazil vs S.Korea, Morocco vs Spain, POrtugal vs Switzerland tipawl an si.
Tuizan December 3, Myanmar caan nazi 9:30 ah sungsuak puai hmaisabik an lek thok cih dingih Netherlands vs USA an do aw ding. Thaizing Myanmar caan nazi 1:30 ah sungsuak puai hnihnak an lek dingih Argentina vs Australia an do aw ding.
Leave a Reply