NUG In Thutheng Lengvak Simfiangnak An Nei

Paletwa Ah Chinnu In Bomb Palpuak Ih Thi – Chin ramkulh Thlanglam Paletwa peng Apuang’ta khua ah tlawng sayakyi pakhat cu August 21 ah rawtuai hawl dingin hramlak a feh ih, inn a tlung nawn lo. August 24 ah a nupi cun hramlak ah a pasal a hawl ih, bomb palpuak ngah in a thi.

Khuami pakhat cun “Ralhrang lamin bomb puak awn kan thei, khuami pakhat khatin bomb an palpuak ngah siko ding tin’ in sim. Cutikah khua sungin zosi hramlak feh tin kan cek aw ih, tlawng saykayi ih nupi a rak si. A hmunah kan feh cih ih, bomb puaknak hmun ahcun a rak thi zo. A ke pahnih in a bul ih, a taksa an rak thekdarh aw thluh. ,”tin a sim.

Tlawng sayakyi hlo cu khua mipi zohman in an hawl ngam lo ih, a nupi khal a pasal hawl lo dingin an kham rero nan, khua mipi in an kham thei lo ih, amahten a rak fehsuak. A pasal hlo tlawng sayakyi cu ralhrang hnuaiah hnatuan CDM tuah lo a si.

Tlawng sayakyi hlo cu Agust 24, zanlam nazi 6 hrawngah amahten khua a thlengsal ih, palik pawlin thusut dingin an hruai cih. Fate 3 an nei ih, bomb palpuak ruangah thi a nupi cu an vuiliam cih. Hivek ruangah khuami pawl cu khua ah um ngam loin Paletwa lamih tlan an um. Zoin bomb a kam, ralhrang maw, AA lam timi cu khua mipi pawlin an thei hrih lo. Apuangtar khua kiang ahcun AA le ralhrnag an do aw theu ih,tu khalah AA le ralhrang boruak a a dai thei hrih lo.

NUG In Thutheng Lengvak Simfiangnak An Nei – A tufang thuthang hrekkhat ah NUG humhimnak vuanci palai le ralhrang hotu pawl an tongaw in, mipi lakah a darh ciamco ih, cumi thuhla thawn pehpar aw in NUG cun mipi simfiangnak an nei.

NUG Humhimnak vuanci Zung cun “NUG humhimnak vuanci U Yee Mon le ralhrang lam an be aw tin August 22 ah thu a darh ih kan rak thei ve. Thuthang ih an suahmi tongtu cu kum upa Maung Dawnah a si ih, amah khalin Maung Dawnah a si thu a rel.

“Asinan, NUG palai Yee Mon a si tin an phuah ih, Thailand ram Chaingmai khawpi ah ralhrang lam thawn an tongaw tin’ thudik lo an thehdarh. Mesoh khawpi ah Thailand palik pawlin NUG palai U Yee Mon an kai ngah ih, cumi thawn pehpar aw in biakawknak nei an si tin thuthang dik lo ahcun an tarlang.

“Thuthang dik lo pahnih an thlahmi cu a taktak ih thilthleng a silo ih, ralhrang pawlin Online hmangin NUG humhimnak vuanci an mualphoh duhnak ah an tuah hrimmi men a si. Thuthang dik lo tuahtu , thlahtu le a tongtu pawl khalin an thusuahmi an hlirsal dingah ruahsannak kan nei a si,” tin’ NUG humhimnak vuanci zung cun thu an suah.

NUG Himhimnak Vuanci In An Timtuahmi Mipi A Simthei – NUG humhimnak vuanci U Yee Mon cun a tufang ziangtin timtuahnak an nei, ziangtin ralhrang ralkap do vivo an tum tivek pawl cu NUG humhimnak vuanci U Yee Mon in mipi simtheihnak a nei.

U Yee Mon cun “Kan hmunram sungih ralut ralhrang ralkap pawl ziangtin kan rak cimit thluh ding timi hrang nasaten timtuahnak kan nei. Ziangtik tiang ralhrang in an tuar thei ding timi kan zoh ding. PDF le an tuanpi pawl cun tha zetin ralhrang an do thei vivo ih, ralhrang nungdam ih kaihmi an neih tlunah ralthuam tiang an laksak thei thlang.

“Tha teih zirsuak PDF pawl an thangso vivo ih, tuantlangnak ,khat le khat bomawknak khalah hmailam kan pan tuk thlang timi cu a tufang doawknak hmun pawlin kan hmu thei ding. Rinloparal ih rak do thutthi, bomb puah ih , do tivek lawnglawng loin hmainor ih ralhrang do thei ding khalin kannih NUG cun theitawk kan suah rero a si,” tin mipi a simthei.

Ralhrang In AA Sakhan An Tthawnter – Rakhine ramkulh Ratih Taung myone Piachuangkyi khua kiangih AA sakhan pakhat cu August 25 ni netabik retin ralhrang ralkap pawl cun tthawn an fial ih,doawknak picang suak thei a si tin kiangkap mipi cun an sim.

Khuami pakhat cun “Ralhrang lam thusuak cu khawlal hnenah an sim ih, khawlal in AA lam a theihter. Tuhrih tiang ahcun ralhrang thupek vekin AA lam tthawn an tum lemlo. Ralhrang cun August 25 tiang lawng caan an pe ih, AA lam an tthawn lo ahcun doawknak suak thei a si. Cumi ruangah khua mipi pawl cu khua dang le hmunhim ah kan tlan cia,” tin a sim.

August 13 khalah Rakhine ramkulh Ratih Tuang myone ah AA le ralhrang an rak kap aw zo ih, doawknak ruangah khua mipi tamzet cu khua dang pan in an rak tlan. A tufang Rakhine ramkulh sungih AA le ralhrang doawknak ruangah raltlan an tam deuhdeuh tin buaipitu pawl cun an sim ve.