Ralhrang ralkap cun tui kum hrang tlawngta nauhak pawl tlawng an kaiter thok zo ih, hivek ruangah thu tampi a suak. Mipi lakin tlawngkai duh le duh lo nulepa an um ih, dothlengnak pawlkom le ralthuamkai pawl cun ralhrang hnuaiah fale tlawngkaiter lo dingin mipi an sawm.
Asinan, ralhrang in tlawng an phuan taktak tiah Myanmar rampi huap in tlawngap 5.2million an um tin ralhrang cun thu an suah. Ahleice in khawpi le buainak umlonak hmunah tlawngkai an tam ih, Chin ramkulh sungah tlawngap thawng 22 lawng an um. Cucu, Myanmar rampi huap dinhmun in tlangap malnak bik a si.
Rakhine ah tlawngap zaten ting 4 tlun an um ih, Yangon ah ting 7 tlun le Ayeyarwaddy ah tlawngap zaten ting 9 tlun an um. Tlawngkai duh le duh lo an um tikah tlawnginn a puak thei ngaingai ih, tlawnginn a puak tikah khatlam khatlam in an puh aw theu. Ahleice in 2021 kum sungah Myanmar ram sungin tlawngin puak le kang a tam ngaingai.
Tlawnginn bomb puah a tikah le tlawnginn a kang tikah Mipi ralkap cun kannih tuah silo an ti ih,ralhrang ralkap kuthnuai Pyu Saw Htee lole anmah ralhrang pawl tuahmi a si tin an sim. Ralhrang lam khalin kannih tuah a si lamlam lo,tlawngkai duh lo PDF pawl ih tuahmi rori a si khat le khat an puh aw.
Hivek a si tikah NUG cozah cun June 3 ah , ziang pawlkom, ziang ralthuamkai an sikhalle tlawngin bomb puah le tlawnginn nawkkang tivek cu kan cohlhang lo lawlaw ih kan duh lo tin thu an suah. NUG cozah cun mipi ralkap pawl ih thlun dingmi daan khal an suah tharsal ih, mipi siatsuah lo dingin le leitlun ralkap daan thlun dingin an theihter.
Leave a Reply