NUG In UN Thu An Tiam

NUG In UN Thu An Tiam – NUG cozah cun UN hnenah Myanmar ram sungih harsa mipi pawl raltha zetin bawm dingin an dil betih, doawknak sosanak hmunah bomnak nan pe asile nan himnak hrang kanmah NUG in kan lo kilhim ding a si tin thu an tiam.

NUG cun doawknak sosannak hmun Sagaing le Makui pawlah UN in bomnak an pe asile an himnak hrang kannih NUG hnuai ih PDF le Pah-kah-phah pawlin an kilhim ding. UN in theitak in Myanmar ram sungih raltlan pawl an bomnak ah ralhrang lamtang Pyu Saw htee pawl cu PDF vekin lem an cang ih,bomnak petu UN hnatuan pawl an hnaihnok.

“Ramsung buainak le doawknak ruangah minungpi duhdawtnak ruangih bomnak pe duhtu pawlin harsatnak an nei timi khal kan theihthiampi tuk. Asinan, hivek ruangah mibawmtu pawlkom in ralhrang nan pehtlaih ding cu kan duh hrimhrim lo ih, ralhrang tuanpi hlah uh. Doawknak sosannak hmunah bomnak na pe ding asile kanmah NUG in kan lo kilhim ding a si,” tin NUG cun thu an suah.

Ramsung buainak ah ralhrang pawl cun raltlan pawl bomnak pek tivek an ngaina lo zetih Rakhine ramkulh khalah ralhrang pawl cun UN mibawmtu pawl luh an siang lo. Leitlun ramdang pawlkom le mibawmtu pawlkom pawl cun ralhrang hnenah raltlan le harsa bomnak pek ding cu siansak dingin an dil rero zo nan, ralhrang pawl cun mipi harsa bomnak an don ding khal an rak duh lo vivo cu a si.

Tamu Ah Ralhrang Pawlin Mipi Hman Tangkai An Tum – Tamu khawpi ih um ralhrang ralkap pawl cu anmahten khawpi leng an suak ngam nawn lo ih, mipi hman tangkai an tum tin Tamu ih um pawl cun an sim.

Tamu ih um ralhrang pawl cu Kalay ih um ralhrang pawl thawn thlengaw ding an sinan, Kalay le Tamu karlak lamzinpi tluanah mipi ralkap pawlin in ra kap ding timi an thei cia tukih anmahten an suak ngam lo. Curuangah mipi mawtaw tivek an bawh ih,mipi phenah relh in Kalay lam pan an tum.

Tamu ih um pakhat cun “Tamu ih ralhrang pawl hmundang ih an tthawn tumnak zarhkhat tlun a si zo. Asinan, khawpi an suahsan asile khua lengah kah an tong ding timi an thei cia ih, an suak ngam hrih lo. Curuangah mipi mawtaw hmangih feh khal an um. Tukhal mipi hmang tangkai in suah an tumih, cumi ahcun mipi mawtaw khal a si thei,” tin a sim.

Tamu PDF cun “Ralhrang pawl mipi hmang tangkai in khawpi suahsan an tum. Curuangah mipi nan zaten ralhrang naivai ah um lo dingin kan lo cah duh a si,” tin an sim ve.

CDM Pawl An Cek Thlang Ding – Ralhrang bawi Myo Min Tun cu ralhrang bawi sinak tlansan in Mipi lam a rak tangih, CDM a tuah ve nan, a tum vekin Australia ram a feh thei lo ruangah CDM a tuahmi a bansan sal ih, ralhrang ah a lutsal. Curuangah CDM pawl buaipitu pawlkom cun ralbawi Myo Min Tun cu mipi phatsantu tin hmin an pe ih,amah ruangah CDM tuah pawl thaten cek that thluh ding an si tin CDM pawl buaipitu pawlkom thu an suah.

Ralbawi Myo Min Tun nupi khal tlawng sayakyi a si ih,a pasal cu ralhrag ah lutsal dingin thlem rerotu pakhat a si. Ralbawi Myo Min Tun khal ralhrang ih a luhsal hnuah nasaten mipi ralkap pawl a soisel ih, mipi ralkap pawl cu a takah tih ding an um lo, an cau tuk zo, ei ding khal an nei mumal lo, ralthuam khal an nei tha lo ih, an tongkam le online vek men lawngah hrosuang men an si tin ralhrang pawl hnenah a phuang aw.

Hivek ruangah CDM buaipitu pawl cun “Zokhal mipi lam kan tang duh asile ram thumnak feh duh men ah si hlahseh. Uknak tha lo do duh taktaktu pawl le mipi lamtang duh taktak pawl lawngin CDM nan tuah pei. Tu ihsin CDM tuah pawl cu rintlak an sile silo uluk tukin kan cek ringring thlang ding a si,” tin thu an suah phah.

Ralhrang Hrang Ralthuam Hawlsaktu An Hrem – Ralhrang ralkap hrang ralthuam hawl saktu Aung Moe Myint, Hlaing Moe Myingt le Myo Titsa pawl cu US cozah in an ramsung lut thei lo dingin an hrem hnuah an sum tuahnak khal an kham sak.

US cun “Ralhrang ralkap in rampi thuneihnak an lak hnuah an uknak feh tluang vivo dingin mipi an that ciamco ih, mi tampi inn ah um ngam loin an tlan phah. Ralhrang ralkap pawl cun Democracy duhtu pawl cu an kai ih, hremnak phunphun an pe. Curuangah kannih US cozah cun ralhrang hrang ralthuam hawl sak ih lei saktu Aung Moe Myint, HLaing Moe Myint, Myo Titsa le Danasty International Company pawl cu US ram sungah lut thei nawn lo dingin hremnak kan pe ih, US thawn pehparaw in an sum tuahnak pawl khal kan kharsak thluh.

“Ralhrang an dinpi, ralhrang an tuanpi ih, ralhrang hrang ralthuam an lai ruangah mi tampi an thih phah zo. Ralhrang in an kaihmi mi 4 an thlai that thu siseh nauhak 11 an thihnak khalah mawhphurhtu an si ve. Anmah ruangah ralhrang pawl cun tlunzuang raldonak duhduh an hman phah ih, ralhrang sual tuahmi ah mawhphurtu pakhat an si,” tin thu an suah.

US cun ralhrang tantu siseh Russia tantu pawl cu hremnak pek vivo an tumih, an sum tuahnak lamzin phihsak vivo an tum. Tu ih US cozah hremmi mi 3 khal Yangon ah Company nei an si ih, an company khal hrem a si tikah US le an tuanpi ram pawl ah suah tuahnak zianghman an nei nawn lo dingih US le an tuanpi ram pawl ah feh sian an si nawn lo.

US cozah cun a hlan khalah ralhrang ralkap hotu pawl le ralhrang pawlih tuanpi tlunah ralhrang company tamzet khal hremnak an rak pe rero zo ih, ralhrang pawl sumdawnnak a fiak phah tlunah zalen zetin ralhrang pawl khual an tlawng thei nawn lo phah.

US Parah Russia An Thinheng – Russia in Ukraine an do pekte ihsin US cun tuisun nitiang theitawk in Ukraine an bawm rero ih, kan dung khalah US tlangsuak upa pawl cun $2billion rori’n Ukraine bomsal dingah lungkimnak an nei fel zo.

Hivek a si tikah Russia cu Ukraine parah an thinheng tukih US in Ukraine an bawm vivo asile kanmah Russia le US doawk caan a thleng mai ding tin US an simthei. Russia lam ziangtlukin thusuah khal sehla US cun Russia tongkam an ngaihsak lo ih, UKraine bom vivo a tum.

Curuangah Russia le US ih an do aw taktak men thei tin leitlun Politics thiam pawl cun an sim. Asinan, tuhrih ahcun a cangvai hmaisatu si an tum hrih lo ih, tongkam in an hro aw rero zo.

US cun nasaten Ukraine an bawm ih, US bomnak zarah tuini tiang Ukraine cun Russia ralkap pawl an do thei phah. Ukraine khawpi lam le Central lam cu Russia ralkap pawlin an suahsan ih, Ukraine ralkap pawlin hmunram an lasal rero. Asinan, Ukraine nisuahnak lam Donbas ramthen sungin hmunram 4 pawl cu Russia ralkap pawlin an lakfel hnuah Russia President Putin cun a sungih um mipi duhdan vekin Donbas ramthen sungih hmunram 4 pawl cu Russia ram ah lakluh an si tin kan dungah thu a rak suah zo.

Hivek hnu khalah US cun theitawk in Ukraine an bawm hrih ih, Ukraine ralkap pawl khalin theitawk in Russia ralkap pawl an do peh rero lai.