NUG In Vanzam Kap Tla Ding – NUG cozah cun 2023 kum sung rori ah dothlengnak tawpter a tum thu October 7 zan ah mipi theihternak an nei ih, rampi huapin doawknak picang kan fehpi ding tin thu an rak suah.
NUG cun ralhrang doneh an tumnak ah vanzam kahnak cu thupi tuk a si bangin vanzam kahnak khal theitawk an tawlrel rero thu mipi an simthei ih, tu ahcun hmun thenkhat ah vanzam kahnak an ret zo thu an sim. Asinan, duh vekin vanzam kahnak an pe tam thei hrih lo ih, hmun thenkhat ahcun mipi ralkap pawlin vanzam kahnak an ngah thei hrih lo,mipi ralkap zatein vanzam kahnak an ngah thluh theinak dingah theitawk kan zuam rero lai tin NUG lam cun an sim.
Ralhrang ralkap in ralthuam rinsan in rampi thuneihnak an lak tikah mipi cun lamzawh duhphorhnak in ralhrang uknak an rak do. Ralhrang in lamzawh duhphorhnak nei mipi pawl ralthuam hmangin an thekdarh tikah mipi khalin ralthuam an kai ve. Mipi cun an ralthuam neihsun tetein ralhrang an rak do ih, a tlangpi thuin ralhrang pawl cu lamlak nasaten bomb puah an si.
Mipi ralkap pawlih bomb puahmi ah ralhrang pawl thi an tam tukih, ralhrang pawl mangbang vansang cun leihnuai lamzin an zawh ngam nawn lo ih, vanzam le Helicopter an hmang ciamco. Khua khat le khua khat feh ding khalah Helicopter le vanzam in a thiar aw ih, mipi umnak le mipi ralkap pawl umnak dingih an ruahmi cu tlunsang in bomb an thlak ciamco theu. Hivek ruangah mipi inn tampi a kang zo ih, mipi le mipi ralkap an thih phah rero zo.
Ralhrang in raldonak vanzam le Helicopter an hman ciamco tikah mipi ralkap hrang thupi zet cu Drone le vanzam kahnak a si. Hmaisa cu nUG cun mipi ralkap hrang Drone leinak dingah tin sumpai a rak hawl ciamco ih, cumi hnuah mipi ralkap pawlin vanzam kahnak an neih theinak dingah ttan an la bet. Tu ahcun mipi ralkap thenkhat hnenah vanzam kahnak an pe thei lo ih, tamsaw pek vivo an tum tin NUG lam cun an sim.
NUG cun “Kan hnenah vanzam kahnak a um maw in ti asile a um zo. Asinan, vanzam kahnak kan retnak hmun pawl cu rel thluh a thiang lo. Hmun hrekkhat ah kan ret zo ih, hmun hrekkhat cu kan pe thei hrih lo. Vanzam kahnak kan neihnak hmunah ralhrang pawl vanzam thawn in ra do asile kan rak kap tla thlang ding. A san cu tlunzuang raldonak an neih ruangah ralhrang pawl hro a suang rero ih, kan canvaih a thiang ve.
“Khatlam ah ralhrang raldonak vanzam le Helicopter mawngtu pawl khal cazin kan nei thluh zo ih, an tuahmi parah mawhphurh ngam ding an si. Federal Democracy uknak kan ngah tikah tuih ralhrang tirhkah pawl cu hrem thluh ding an si. Curuangah ralhrang vanzam le Helicopter mawngtu nan zaten tuisun ah kan lo theihter. Caan nan neih laiah mipi hmaizah thiam uh. Neta ahcun phuahhlam nan rel thei nawn lo a si,” tin NUG Vuanci Htin Lin Aung cun a sim.
Russia Lilawnpi A Puak – Russia In 2014 kum ih Ukraine ram an rak lonmi Crimea ramthen sungih Russia lilawn ,tlangleng zin khalih an hmanmi cu October 8 zingah a puak ih a kang vutvo ruangah,lilawn khal a siat phah zet.
Russia ralkap pawl cun Lilawn kang an theih veten theitawk suah in an mit hngal ih, siatnak thlengzat mipi an theihter hrih lo. Crimea hi Russia in Ukraine ram an rak lonmi a si tikah Ukraine lamin an kap sipei maw titu an um. Thenkhat cun lilawn ih feh datsi phur mawtaw a puak titu khal an um ve.
Ukraine president Zelenskyi cun “Russia kan domi ah thupi zet cu Crimea hmunram khal a si. Ukrane ram kan humhim ding a si ahcun Crimea ramthen khal kan lak thluhsal a tul,” tin a rak tongsuak rero zo.
Ukraine president thuronpetu Podolyak cun “A hram thoknak fang a si hrih. Diklonak cu dik lo zetin thungrul ding an si ih, Dankalh pohpoh cu siatsuah ding an si. Rukmi le lonmi khal a neitu hnenah peksal ding a si,” tin thu a rak suah.
Curuangah Ukrane in Russia lilawnpi an puah in a lang. Lilawnpi puak ah a hnuai lilawn kiak phah a um ih, a tlun tlangleng zin ah tlangleng kang le tlangleng taang khal a um. Lilawn puak ah mi paziat an thi tivek cu Russia lamin an phuang hrih lo.
Leave a Reply