NUG le Burmese Army An Kom Aw – NUG hnuai ih PDF pawl le Burmese Army ( BPLA ) pawl cu hmunkhat te ah ralhrang an dotlang thlang ding tin NUG cun thu an suah.
NUG le Burmese Army tuantlang dingin NUG humhimnak vuanci U Yee Mon, Burmese Army lamih hotu Maung Saung Khah le midang pawl cu October 26 ah a rak tongaw ih, remawknak an nei. Burmese Army hi ralhrang in rampi thuneihnak an lak hnu 2021 April 17 ah an ding.
Burmese Army hotu Maung Saung Khah cun “Tongaw lo , be aw loih um hnakin tongaw ih thurelnak kan neih tikah thiltha a suak. Kannih Burmese Army le NUG ih bangawknak cu ralhrang uknak cemral ko ding cu a si. Cumi ruangah remawknak nei thei kan si ih, dothlengah dinhmun thasawn, hmailam kan pan phah a si,” tin a sim.
NUG cun “October 26 ah Burmese Army hotu pawl thawn kan tongaw ih, thureltlangnak kan nei. Tonawknak ahcun dothlengnak sungih tulsammi pawl zalen zetin kan reltlang. Thureltlangnak ahcun Kannih NUG le Bumrse Army pawl ralhlrang donak ah tuantlang dingin kan lungkim ih, Politics dinhmun khalah khat le khat theithiam aw ton dingin lungkimnak kan nei a si,” tin thu an suah.
Ralhrang Thu Ah ASEAN Meeting Thusuak – Myanmar ram buainak thawn pehparaw in ASEAN pawlih ramdang vuanci pawl cu manhlap zetin meeting an nei ih, an meeting an theh zo thu mipi an theihter.
ASEAN ramdang palai meeting ih tel Singapore ramdang palai cun “Tuih Myanmar thuhla manhlap zetih kan relmi cu November thla ah ASEAN meetingpi a um dingih, cumi ah ziangvek thuhla kan rel ding, ziangtin Myanmar thuhla kan buaipi ding tivek a siko. Ralhrang in Kachin ramkulh ih mipi bomb an thlakmi thuhla khal kan rel.
“Tuhrih ahcun manhlap zetin thucat kan rel hrih lo ih, ralhrang pawl remawknak kan tuahmi 5 pawl ralhrang in an pitlin theinak digah nasaten kan nor hrih ding. November thla meeting ahcun Myanmar hrang poimawh zet le thupi zet relcatnak neih thei kan tum ih, cumi hrang thuhla rak relcia deuh cu kan si,” tin a sim.
ASEAN pawlkompi hi Myanmar telnak a si ruangah nasaten Myanmar buainak tawlreltu bik deuh an si ih, Myanmar thuhla ah meeting an nei rero zo. Tutiang ahcun ASEAN pawlkompi ruangah Myanmar buainak in thatlam a pannak , ralhrang an phihnak tivek hmuh ding a um hrih lo ih, November thla ih ASEAN meeting cu thupi zet a si tlunah leitlun ih thlirmi khal a si.
Iran Buainak A Reh Thei Hrih lo – Iran fala Amini a thih thu ah Iran mipi an lungawi thei hrih lo ih, Iran ramsung hmun tinkim ah lamzawh duhphorhnak neih peh rero lai a si.
Amini ( kum 22 ) cu a hmai a tuamtha lo tin Iran palik pawlin an kai ih, an vel that. Cumi ruangah Iran mipi pawl lungawi thei lo an si ih, a thlatel in lamzawh duhphorhnak an nei thlang. Lamzawh duhphorhnak cu Iran nunau pawlin an kaihruai ih, Iran mipa le nauhak khal an tel thluh.
Nunau pawl cun mipi vantlang umnak ah an vai khuhnak an phelh, an nawkkang ih, an sam an tan. Thuneihnak atcilhtu ralkap uknak an duh lo zia an langter ih, Democracy an duh thu khal an ausuahpi. A thlatel in buai zo an si tikah mipi lam khal thi an tam zet thlangih, Iran ralkap le palik khal an thih phah nasa ve.
Mipi lungawi lo, lamzawh duhphorhnak nei pawl cu Amini thlan ah an pungkhawm ih, cukhal Iran ralkap pawlin mithli tlaknak bomb le cerek ngai in an kap ciamco. Cutlukin Iran buainak a sosang ih, cozah cun mipi dilnak an ngaihsak duh lo. 1979 kum ah nasaten Iran an rak buai zo ih, cumi hnuah tuitum ih Iran ram buainak sosang bik caan a si tin an sim.
An ram buainak ruangah Iran cun Internet a phit ih, an ram sung buainak ramdang ah darh lo dingin an thup tum. Asinan, leitlun milian bik Elon Musk cun Iran mipi pawl hman theih dingin boruak khalih hman theih Starlink a pe zo ih, Iran mipi cun duhtawk in a ram sungih thilthleng pawl Social ah a ausuahpi thei. Buainak ruangah mipi 234 an thi zo tin hminsin tuahtu pawl cun an rak tarlang ve.
Russia In Ramdang A Hro – Russia in UKraine an donak ah ramdang tel lo dingin thu an suahsal ih, Ukraine bawmtu pohpoh kan kap ding tlunah an ram mipi tuar ding zawngin kan cangvai ding tin Russia lam cun thu an suah.
Russia cun 2022, February 24 in Ukraine ram a rak do thokih, thla 10 sung Ukraine an do thlang. Thla 10 sung an doawknak ah a takin leitlun ramdang an tel hrih lo nan, ralthuam le sumpai in Ukraine bawmtu an um hnuaihni. Cutikah Russia lam duh vekin an cangvai thei lo ih,tongkam in hro an suang bet.
Russia ramdang palai cun “Ukraine kan thianfainak ah ramdang nan tel asile nan sipuazi kan tisiat thluh ding tlunah US thawn tuantlang ih nan neihmi satellites pawl khal kan kapse thluh ding. Ramdang nan tel asile zalen zetin innpi le mipi umnak kan kap thlang ding. Cucu, kan ram pahnih buainak ah ramdang pawl nan cangvaihnak parah tthum aw a si,” tin ramdang pawl ralrinnak a pe.
Netabik Russia ram ih, Lilawnpi puak ruangah Russia cun Ukraine cangvaihnak a si tin Ukraine khawpi sung an kap ciamco ih, mi tampi an thih phah tlunah innpi tampi a siat phah. Tu ahcun ram pahnih Donbas ramthen sung lamah hmunram cuh aw in an kap aw peh ih,khawpi lam boruak a daisal deuh hrih in a lang. Russia cun Donbas ramthen sungin hmun 4 an ram ah an phuang zo.
Leave a Reply