NUG Le PDF Dokalhnak An Nei

Ralhrang Pawlin Pidawta An Suahsan Sal – July 28 zanlam ah ralhrang mipum 100 tlun cu Kalay peng saklam Pidawta khua Biakinn sungah an riak ih, bel le eiin an phurh ruangah an um rei pang pei maw tin mipi lam an thinphang zet.

Asinan, ralhrang ralkap pawl cu July 29 zingah Pidawta khua an suahsan sal ih Sedaw Oo lamah an feh tin mit hmutu pawl cun an sim. Pidawta ah ralhrang pawl ziang an tuah duak, khawilam an pan vivo ding timi cu theih a silo.

A thok ahcun Letpanchaung le Tahan fehnak ih an zawhmi Pidawta khua ah ralhrang pawl Check Gate an tuah ding sipei maw tin mipi lam an thinphang zet lawk nan, tu ahcun ralhrang pawl Pidawta khua in an suah fel tikah ziang duhsan ih vak an si tikhal theih a silo.

Ralhrang In Chin Mipi 30 Hrawng An Kai – Ralhrang ralkap mipum tamzetin Chin ramkulh matupi peng Zotung hmunram sung cu July 20 ihsin an luhcilh thokih, Chin mipi 30 tluk an kaih tlunah mipi thilri an siatsak vivo tin CDF Zothung cun thu an suah.

CDF Zotung cun “July 20 ihsin ralhrang cun Zotung hmunram pawl an luhcilh ih, khua tampi sungin mipi thilri an laksak tlunah inn hrekkhat khal an urkang. Cumi tlunah mipi 30 hrawng an kai. July 28 ah avei hnihnak ralhrang pawl cun zotung hmurnam an luhcilh salih Rangci, Zungnah, Singhangthawng, Dawngcung khua le Zodaedin khua pawlin mi tampi an tlansuak.

“Tu ah raltlan mipi pawl cu an harsa tukih,eiin, thosilen, datsi tivek an nei lo. Phone line a that lo tikah thenkhat raltlan pawl cu pehtlaih theih an silo. Tu ah ralhrang pawl cu Rangci khua ah an umhrih ih,mipi pawl cu khua ah an tlung ngam hrih lo. Hivek ruangah Gangaw le Rezua khua karlak lamzin ah zohman zawh hrih lo dingin theihter nan si,” tin mipi an simthei.

Kalay Ah Mi 4 An Kai – Kalaymyo ah ralhrang ralkap pawl cun ni 2 sungah mi 4 an kai ih, an kaihmi lakah mibawmtu pawlkom sungtel le CDm sibawi khal an tel.

Kalaymyo Pinlung vengih um Kyi Aung cu July 28 ah ralhrang pawlin an kai ih, ziangruangah an kai timi a san theih a silo. July 27 khalah ralhrang ralkap pawl cun Kalaymyo Be-in vengih um CDM sibawi khal an rak kai zo ih, CDM sibawi ih inn luahmi innsangnu le a fapa khal ralhrang ralkap pawlin an kai tel.

Kalay ih um pakhat cun ‘CDM sibawi an kaihmi ih hmin le sinak cipciar cu kan theithei hrih lo. Inntek tei cu Kan Myint ih unaunu a si ih, nga zuarin pumcawm aw an si. A tlangpi thuin ralhrang cun CDM sibawi le zirhtu an hua zetin an kaihmi a tam. Culo ih an kaihmi pawl cu PDF pehtlaih rinhlelh le dothlengnak ih tel rinhlelh thu ruangah kai an sibik,” tin a sim.

Min Aung Hlaing Ih Inn An Zuarmi Tamsawn An Khong Zo – NUG cozah cun ralhrang hotu Min Aung Hlaing ih Yangon innpi pakhat cu dothlengnak hrangah tin an zuar ih $10 Million an ngen. Asinan, neitu sinak cu mi tampi lei thei dingin Dollar 100 tete khalin an zuar.

Tu ahcun Yangon ih Min Aung Hlaing innpi leitu an tam vivo thlangih $10 Million an ngenmi sungin $9 Million man an khong zo. Tuih an zuar laimi cu $1 Million fang lawng a um thlang tin NUG lam cun mipi theihternak an nei.

Min Aung Hlaing ih Innpi an zuarmi cu $100 man tetein leitu an tam. Tuih dinhmun ah Min Aung Hlaing ih innpi leitu pawl cun dothlengnak hrang sumpai kan thawh timi thinlung an pu ih, an sumpai neih kirsal beisei nawn lo an tam.

NUG cun ‘Tuih innpi kan zuarmi cu dothlengnak ih nehnak kan co tikah a takin kan zuar dingih, mankhung zetin kan khong thei ding. Mankhung zetih kan zuar fel thei ahcun tuih leitu pawl khalin hlawknak tampi an tel ve ding. Asinan,dothlengnak ah nehnak kan co lo asile tuih a leitu pawlin an sumpai cu dothlengnak hrang an thawh cih tin a feh ding. Min Aung Hlaing ih innpi kan zuarmi man sumpai kan ngahmi zate dothlengnak hrang hmang ding kan si,” tin mipi an simthei.

NUG cozah cun tuih Min Aung Hlaing innpi an zuarmi an khong fel tikah Min Aung Hlaing ih inndang pawl khal zuar vivo an tum. Min Aung Hlaing in dik lo zetin mipi hmunram a lonmi pawl an si ruangah dothlengnak hrang kan zuar thluh ding a si tin an sim.

NUG Le PDF Dokalhnak An Nei – Yangon ramthen Kauk Tadar myone maha Bandula pangpar hmuan kotah ralhrang dinpitu mipi thenkhat cu July 29 zingah hmunkhat ah an pungkhawm aw ih, NUG le PDF duhlonak an langter.

NUG le PDF duhlonak tuah dingin USDP party sungtel hlutdaw pakhat Hla Shwe in a tawlrel ih, a kaihruai hai tin mipi lam cun an sim.

Hla Shwe cun mipi hmaiah “NUG cozah le PDF cangvaih dan cu kan pom lo ih, ralkap in ralthuam ruangih an kaihmi mi 4 pawl an thlaithat khal a tulmi a si tlunah kannih cun tha kan ti.Dankalh pawlkom cangvaihnak hrimhrim kan dokalh , sualnak nei lo phungki thattu pawl kan dokalh, mipi tuar ding zawngih cangaihnak kan dokalh, dankalh ralthuamkai khal kan dokalh a si,” tin simnak a nei.

NUG le PDF dokalh ih pungkhawm mipi cu a tlangpi thu in USDP tantu pawl, kawl miphun buaipitu pawl le ralhrang sungte pawl an si ih, mipum 500 hrawng an si tin mit hmutu pawl cun an sim.

Ralhrang Mawtaw 2 Siat Ah Ralhrang 10 An Thi – karen ramkulh Tandaungkyi khua le Pali Khi’ khua karlak ih feh ralhrang ralkap mawtaw 5 cu July 28, zinglam nazi 9 hrawngah KNU ralkap KNLA pawlin bomb puah in an rak kap ih, ralhrang mawtaw pahnih a siat tlunah ralhrang 10 an thi tin KNLA lam cun mipi an theihter.

KNLA ralkap pakhat cun “Taung Ngu lamih ra ralhrang ralkap mawtaw 5 cu Tandaungkyi khua kiangah kan rak bawh ih, bomb kan rak puah. Tandaungkyi khua ih ralhrang pawl hrang eiin phur an si. Bomb kan puahmi ah ralhrang mawtaw 2 a siat ih, ralhrang 10 an thi. Ralhrang 5 hriamhma an ngah ih, ralhrang thi lakah ralbawi pakhat a tel.

“Minute 30 hrawng kan kap ih, ralhrang thi pawl tantami ralthuam kan la man lo. Ziangahtile ralhrang dang tampi an thlen bet tikah kan himnak hrang dung kan sip. Ralhrang thleng bet pawl cun ralthuampi in lamzin tluan an kap vivo phah. Kan doawknak lamzin tluan ahcun ralhrang sakhan 5 rori a um a si,” tin a sim.

Iraq Mipi In Rampi Thurelnak Hmunpi An Luhcilh – Iraq ram Prime Minsiter hrilnak ah Mohammed Shia Al Sudan thehlut a si ve cu Shiite Cleric dungthluntu mipi pawl an lungawi lo ih, Iraq rampi thurelnak innpi an luhcilh.

Iraq ram cun kan dung October thla ah rampi hrilawknak an rak nei nan, Covid 19 natnak ruangah hrilawknak ih nehnak co tamsawn Shiite Cleric party hnenah thuneihnak an rak pe theilo. Hivek ruangah cozah thar din dan ding thu ah nasaten an buai ih, duhphorhnak neitu tiang an um.

Duhphorhnak neitu pawl cun rampi thurelnak innpi an luhcilh hnuah innpi sung ahcun duhtawk in an um. Rampi thurelnak hmunpi ih mipi an luh ruangah mithi tivek an rak um lo ih, MP pawl cu an ra suak thluh man.

Innpi luhcilhtu pawl cu zamrangten Innpi suahsan dingin theihter an si ih, Iraq palik pawl cun duhphorhnak nei mipi pawl dawisuaknak ah mitthli thlaknak bomb tiang an hmang.

N.Korea In US Do An man – N.Korea president Kim Jong Un cun an ram ralthuam dinhmun leitlun simtheihnak a nei ih, leitlun ih ralthuam nei thabik an timi US do kan ngam zo tin July 27 ah a relsuak.

S.Korea le N.Korea do aw nawn lo dingin remnak an tuahmi kum 69 kimnak ni July 27 ah N.Korea hotu Kim Jong Un cun thurelnak a nei ih, cumi ahcun N.Korea le S.Korea buai lo dingin US an thupit thu. S.Korea le N.Korea karlak ah US hrolhaw tuk lo dingin an duh thu, an hrolh aw vivo asile buainak a suak thei ih, buainak a suak asikhalle kannih N.Korea cun Nuclear ralthuam khamnak kan nei zo ih, ralthuam dinhmun khalin US kan do ngam zo a si tin N.Korea president Kim Jong Un a tongsuak.

Tui dinhmun ih leitlun Neclear bomb nei tam lam dinhmun ah N.Korea cu 8-nak dinhmun luah theitu an si ih, thupten an tuahmi thawn N.Korea in Nuclear bomb an nei tam thlangih hro an suang sipei maw titu khal an um.