NUG Cozah in ramdang vuanci Daw Zin Mar Aung cu ram buainak thuhla thawn pehpar aw in Washington a thlengih, Washington ah US ramdang vuanci zungin bawmtu palai thawn May 12 ah an tongaw.
US palai cun NUG ramdang vuanci Daw Zin Mar Aung hnenah “Myanmar mipi kan lo tan ringring dingih, kan lo dinpi ringring ding. Theitawk in Myanmar mipi harsa pawl khal kan bawm vivo dingih , Myanmar ram democracy a ngah theinak dingah theitawk in kan lo bawm ding a si,” tin a tiam.
Myanmar ram buainak ah daihnak um lohli dingin US le ASEAN pawlkom sungtel pawl cu tuantlang an tum zetih, theitawk in ralhrang nor vivo an tum. Ralhrang ralkap cun 2021, February 1 ah rampi thuneihnak an rak la ih, tuisun nitiang lal kan si tin thu an nei lai hrih.
Malaysia In Myanmar Buainak Thu 5 An Suah – A tufang ah US cozah hruaitu pawl le ASEAN sungtel pawl cu Washington ah thurelnak an nei rero ih, cumi ah Malaysia cun Myanmar ram buainak thawn pehpar aw in thu 5 US an relpi.
Cumi pawl cu ASEAN le Myanmar ralkap in remawknak kan tuahmi 5 pitlin dingin kannih Malaysia cu kan zuam hrih ding. Ralhrang In Myanmar UN palai Myanmar ram sungih an luhter duh lo cu kannih malaysia in kan dokalh. kannih Malaysia cun ASEAN meeting ah Myanmar ralkap tel rem kan ti hrih lo. ASEAN in NUG le CRPH kan biak a tul ih,Myanmar mipi harsa pawl khal ASEAN in theitawk in kan bom a tul a si tin Malaysia cun Myanmar ram buainak thawn pehpar aw in thu 5 an suah.
American ram hruaitu pawl le ASEAN pawlkom sungtel pawl tonawknak ahcun Myanmar ram aiawh in palai ah zohman sawm an silo ih, ralhrang ralkap khal an telter lo. American le ASEAN sungtel pawl tonawknak ahcun American in ASEAN sungtel pawl hnenah nasa ten Myanmar ralkap nor dingin a forh hai.
Leave a Reply