NUG Parah PDF An Lungawi Lo

NUG Parah PDF An Lungawi Lo – Sagaing ramthen Yinmarpin myone sungih cangvai Pale Joker PDF pawl cu NUG hnuaiah an lut nan, ralthuam an ngah thei cuang lo ruangah an beidong zetih raldo an cawlhsan hrih thu mipi theihter an nei.

Pale Joker PDF cun “Duhdawtmi mipi nan zaten kannih Yinmarpin tatyin 19 Pale Joker PDF pawl hi 2021 dothlengnak thok Pale myone sungih bomb a puak hlan, meithal a puak hlanah rak dingsuak dothlengnak ralkap kan si. Tu ahcun kan sumpai dinhmun le ralthuam dinhmun a that lo ruangah ralhrang do kan cawlhsan hrih ding.

“NUG kuthnuai ih kan luh tikah an kuthnuai tatyin pakhat ciar hrang ralthuam pekmi bikhiah a um thluh nan, kannih tuini tiang NUG hnenin ralthuam kan ngah hrih lo. NUG kuthnuai ih um pDF kan si bangin NUG hnen ahcun kan theihter rero nan, zianghman in simthei duh lo ih, thei lo bangin in umsan men.

“NUG hnuai ih um lo tikah ralthuam ngah a har ih ram buainak reipi a daih thei ti’n anmah NUG cun thuron in pek ruangah NUG hnuaiah kan lutih theitawkin dothlegnak hrang kan zuam rero. Asinan, tuini tiang theihhngilh men kan si ih, hmailam kan pan thei lo. Thinlung taksa ah harsatnak tampi kan neih phah.

“Curuangah mipi pawl kan lo dil duhmi cu NUG in ralthuam in pek thei lo ruangah kanmahten ralthuam kan buaipi a tul thlang. Cumi hrang mipi bomnak kan tul tuk. Eiin thu ahcun buainak zianghman kan nei lo. Ralthuam leinak tal cu in bawm hram dingin zangfah kan lo dil a si,” tin thu an suah.

Pale Joker PDF hotu Boe Pale cun “NUG kan biak hlan khalah kanmahten kan neihsun le kan tuahmi thawn ralhrang kan do rero zo. Tu khalah kanmahten ralthuam kan tuah rero lai. Ralhrang pawl cu bomb in kan puah tlangpi ih kan neihsun meithal siate thawn kan kap phah theu. Cuvek lai caan khalah kan beidong lo ih dothlengnak ah phur zetin ke kan kar.

“Asinan, neta lam cun anmah NUG lam sawnin hmunkhat ih um dingin an hnenah lut dingin in sawm. An hnenih lut lo cu ralthuam an pek thei cu in sim bet. Curuangah kannih khal lungrualnak duh in le ralthuam khal ngah thei beisei in NUG hnuai ahcun kan rak lut. Cutin Yinmarpin tatyin 19 tiah hmin in pe. NUG hnuai ih kan luh hnu ahcun an thutiam bangin ralthuam kan dil rero nan, tutiang pek kan silo. Curuangah, kanmahten lamzin hawl tum sawn kan si. Dothlengnak kan bansan kan tinak a silo ih NUG beisei an um lo ruangah kanmahten lamzin kan dap ih mipi bomnak kan dilmi a si,” tin a sim.

Pale Joker PDF pawl hi Pale myone sungah ralhrang ralkap le an tuanpi Pyu Saw Htee pawl do rerotu an si ih, ralhrang kaihmi le thahmi khal an nei tam zo. An hnenih ralhrang pe aw khal an um.

NUG President Le EU Palai An Be Aw – NUG cozah ih lailak president Duwa Lashila le Europe pawlkom EU palai cu March 10, tuini ah online in biakawknak an nei.

Palai pahnih tonawknak ahcun Myanmar ramsung dinhmun, mipi harsatnak, Eu in ziangtin Myanmar a bawm thei ding tivek pawl relnak an nei.

NUG President zung thuphuangtu cun “EU in Myanmar mipi hrang bomnak an pek ding thu an sim. Myanmar mipi in Democracy hrang an zuamnak khalah theitawk an bom ding thu an sim. Ralhrang pawl hremnak an pek rero bangin hremnak pek tul pawl hremnak an pe bet vivo ding. Myanmar mipi le dothlengnak tuahtu pawl lamah Eu an tang ringring ih nasa sin’n in bawm ding.

“NUG president khalin dothlengnak ah Myanmar mipi, NUG le tlangpar ralthuamkai pawl an tantlang thu simnak a nei ve. Hmailam khalah NUG president le EU palai cu biakawk vivo an tum. EU cun ralhrang miupm 93 le pawlkom 18 hremnak an pe zo a si,” tin a sim.

China President Thar Xi – China cun an ram president tuantu ding hrilawknak an nei ih, tu ih China president tuan rero lai Xi Jinping cu China president tuan peh dingah an nemhnget.

China president tuan caan hi term khat ah kum 2 sung a si ih, an tling bet asile term hnih ( kum 10 ) tiang lawng china president tuan a theih ti’n daan an nei. 2013 kum ihsin China president tuan thok Xi Jinping cun 2018 kum ah China president tuan caan cu a tling peh a si ahcun term thum tiang khal tuan a theih ti’n 2018 kum ah thu a rak suah ve.

Thu a suah bangin tuhi Xi Jinping in China president a tuan term thumnak a si thlangih tern 2,( kum 10 ) sung China a rak uk zo. Tui hnu kum 5 dang China president a tuan hrih ding. Xi Jinping hi CHina president lakah huham ngah bik le thilti thei bikih an relmi pakhat a si ih, tuih a caan a cem hlan khala a uknak feh peh vivo dingin khua a khang ko ding titu khal an um.

Xi Jinping hnuaiah CHina hi nasaten an thangso ih ,sipuazi ah siseh ralthuam dinhmun khalah US zuam ngam vohvohtu ram pakhat an si thlang. Asia tlunah Africa lam khalah hmunram an la ciamco ih, Europe lam tiang ciahneh tum vivo an si ve. Xi Jinping in China president a tuan peh cu leitlun Democracy ram pawl cun an duh lo lawlaw. Ziangahtile, CHina hi communist uknak vekin feh an si.