NUG Cozah in lailak president Duwa Lasila cun may 24 ah hmainor PDF pawl ih umnak zohfel a nei ih, may 30 ah NUG president ih cangvaihnak cu mipi theihter a si.
NUG lailak president Duwa Lasila cun PDF pawl hnenah “Mipi ralkap cu rampi hrang miraltha nan si ih, mipi hrang beiseinak nan si ruangah upatnak ka lo pe. Ram le mipi hrang thuanthu mawi ngantu ding khal nan si ih, hivekin nan pekawknak cu a lak a si hrimhrim lo ding.
“A tu ih mipi hrang pumpetu le mipi hrang zuam rerotu nan zaten Federal Democracy caan ah mi thupi dinhmun in tel thluh ding nan si. Federal Democracy uknak din dingin ralthuam kaih a tul tikhal kan zapi theih a si. Cuti rualrual in PDF zaten mipi rinsan ding le mipi sor dingmi nan si ih, mipi dokalh zawng hrimhrim cun nan cangvai lo ding. Mipi le PDF cu ngah le tidai vekin umtlang ringring ding kan si.
“Rinsan tlak ralkap si dingin daan kan neihtha a tul ih, mipi thawn lungrual zetih kan um a tul. Thupek kan thlun ding a si ih, rinsan tlak in kekar ding kan si. Tu ahcun rampi huap khalah PDF tatyin tampi kan din zo. PDF cu mipi beiseinak nan si bangin thinlung taksa ,fimnak le cahnak zaten suah in kan tan a tul a si,” tin PDF pawl a simthei.
NUG president Duwa lasila le PDF pawl khal meeting thureltlangnak an nei ih, cumi ahcun PDF pawl ih thusuhmi cu President Duwa Lasila in a let hai. Thurelkhawmnak an nei thluhah president Duwa Lasila cun PDF pawl umnak hmun a hal vivo ih, tulsammi pawl theitawk an bom ding thu khal a simthei. Cumi hnuah PDF ralkap pawl cun president cu upatnak an pe ih a thlahliam aw.
Ralhrang In Khua 2 An Nawkkang – Sagaing ramthen Tanse myone Kyuantaw kung khua le Aung Chan Thar khua cu may 29 ah ralhrang ralkap pawlin an nawkkang ih, kiangkap khua 11 khal ralthuampi in an kap ciamco.
Ralhrang ralkap cun khua 2 an urkang hnu khalah kiangkap khua pawl cu ralhtuampi in an kap ciamco ih, khua 11 pawl cu khua ah um ngam loin an tlan.
Khuami pakhat cun “Ralhrang in khua 2 an nawkkang ih,cumen ah an duhtawk lo. Kiangkap khua pawl khal ralthuampi in an kap ciamco ih, mipi cu khua ah um ngam loin kan tlan. Khua 2 in inn ziangzat ciah a kang timi cu felfai in kan thei hrih lo, ziangahtile mipi pawl khua ah an kir ngam hrih lo. Hivek cu a tufang ralkap pawl cangvaih dan cikhat a si,” tin a sim.
Leave a Reply